हात-पाय बांधून विष पाजलं, १७ दिवसांनी कोल्हापूरच्या जवानाचा मृत्यू, पत्नी-बॉयफ्रेंडवर गुन्हा

कोल्हापूर: जम्मू-काश्मीर येथे कर्तव्य बजावणारा जवान नवरा सुट्टीवर गावी आल्यावर वारंवार भांडण काढून त्रास देत असल्यामुळे प्रियकराच्या मदतीने हात-पाय आणि डोळे बांधून पत्नीने विष पाजल्याचा धक्कादायक प्रकार कोल्हापुरात घडला होता. हा जवान गेल्या १७ दिवसांपासून मृत्यूला झुंज देत होता. अखेर त्याची मृत्यूशी झुंज अपयशी ठरली असून शनिवारी रात्री त्याची प्राणज्योत मालावली. अमर भीमगोंडा देसाई (वय ३९, रा. कसबा नूल, गडहिंग्लज, जि. कोल्हापूर) असे या जवानाचे नाव आहे. सोमवारी (५ ऑगस्ट) त्याचं जन्म गाव असलेल्या नूल येथे त्याच्यावर अंत्यसंस्कार करण्यात येणार आहेत. दरम्यान, पत्नीने गुन्हा कबूल केला असून पत्नीसह प्रियकरावर गुन्हा दाखल करण्यात आला आहे.

१७ दिवसांपासूनची जवानाची मृत्यूशीत झुंज अपयशी

याबाबत मिळालेली अधिक माहिती अशी की, भारतीय सैन्य दलातील जवान अमर देसाई हे जम्मू-काश्मीर येथे कर्तव्यावर होते. दरम्यान, सुट्टीसाठी ते आपल्या परिवाराला भेटायला गावी आले होते. १८ जुलै रोजी ते पाटणे सिमेंट पाइप कारखान्याजवळील आपल्या बंगल्यात झोपले होते. यावेळी अचानक संशयित आरोपी पत्नी तेजस्विनी आणि तिचा प्रियकर सचिन परशूराम राऊत (रा. हेब्बाळ, कसबा नूल) या दोघांनी त्यांच्यावर हल्ला करत जबरदस्तीने विषप्रयोग केला. अचानक घडलेल्या या प्रसंगामुळे अमर झोपेतून खडबडून जागे झाले आणि आरडाओरडा सुरू केली.
Crime News: माझ्याशी बोल, मला भेट, नाही तर मी डीपीवर चढेन! तरुणी धमक्यांना कंटाळली अन् नको ते घडलं
आवाज ऐकून आजूबाजूच्या लोकांनी तात्काळ घरात दाखल होत पत्नी आणि तिच्या प्रियकराला पकडले. तसेच, अमर यांना उपचारासाठी येथील उपजिल्हा रुग्णालयात दाखल केले. प्राथमिक उपचारानंतर त्यांना कोल्हापूर शहरातील सीपीआर रुग्णालयात आणण्यात आले आणि तेथून पुण्यात उपचार सुरू होते. मात्र गेल्या १७ दिवसांपासून अमर यांची मृत्यूची सुरू असलेली झुंज अखेर अपयशी ठरली. शनिवारी रात्री त्यांची प्राणज्योत मालवली.

त्यांच्या पश्चात पत्नी, मुलगा, मुलगी, वडील, दोन भाऊ असा परिवार आहे. त्यांच्यावर आज सोमवारी त्यांचं मूळ गाव असलेल्या नूल गावी प्रमुख मार्गावरून अंत्ययात्रा काढून त्यांच्यावर अंत्यसंस्कार करण्यात येणार आहेत. या पार्श्वभूमीवर गावात चोख पोलीस बंदोबस्त ठेवला आहे.

आत्महत्या केल्याचे भासवण्याचा प्रयत्न

दरम्यान, अमर यांनी स्वतःच विषारी औषध घेऊन करून आत्महत्या केल्याचा बनाव पत्नी तेजस्विनी आणि तिच्या प्रियकराकडून सुरू होता. मात्र, दोन्ही संशयितांकडून अमर यांच्यावर विषप्रयोग सुरू असताना त्यांनी केलेली आरडाओरड ऐकून मदतीसाठी धावून आलेले शेजारी संतोष खाडे यांनी दरवाजा तोडून आत प्रवेश घेतला. यावेळी प्रियकर सचिन त्यातून पळून जात असताना शेजारच्यांनी त्यांच्यावर हल्ला केला आणि त्याला पकडून धरले यामुळे ही घटना उघडकीस आली.

दरम्यान, पोलिसांनी पत्नी आणि तिच्या प्रियकराला अटक केली असून भांडण काढून त्रास देत असल्यामुळे प्रियकराच्या सहकार्याने अमरला विष पाजल्याची कबुली तेजस्विनीने चौकशीदरम्यान पोलिसांना दिली. त्यावरून तिच्यासह तिचा प्रियकर सचिनवरही भारतीय न्यायसंहितेनुसार गुन्हा दाखल केला आहे. दरम्यान, १९ जुलै २०२४ रोजी तेजस्विनीचा प्रियकर संशयित सचिन राऊत यानेही विषारी औषध प्राशन करून आत्महत्या करण्याचा प्रयत्न केला असून त्याची प्रकृती देखील चिंताजनक आहे. त्याच्यावर सध्या बेळगाव येथील सरकारी दवाखान्यात उपचार सुरू आहेत.