पोरगा PSI झाल्याचे कळले आणि बापाच्या अश्रूंचा बांध फुटला, आईने मटामटा मुके घेतले

By tejpolicetimes On Aug 6, 2024

दीपक पडकर, दौंड : पुणे जिल्ह्यातील दौंड तालुक्यातील असणाऱ्या देऊळगाव गाडा येथील संदीप आनंदा कोकरे या मेंढपाळ मुलाने राज्य लोकसेवा आयोगाची परीक्षा उत्तम गुणाने उत्तीर्ण होत पोलीस उपनिरीक्षक पदाला गवसणी घातली आहे. शाळेला सुट्टी असताना नेहमी मेंढ्या वळणाऱ्या संदीप कोकरे याला मिळालेले यश पाहून, परिसरात त्याचे सर्वत्र कौतुक होत असून शुभेच्छांचा वर्षावही होत आहे.

संदीप कोकरे यांचे वडील आनंदा कोकरे व आई चांगुना हे आई वडील निरक्षर आहेत. त्यांनी संदीप याला मेंढ्या बकऱ्यांचा व्यवसाय सध्या कठीण होत चालला आहे. तू शाळा शिक.. असा सल्ला दिला. त्यानुसार संदीप शाळा शिकू लागला. संदीप पीएसआय झाल्याचे कळले तेव्हा त्याचे आई-वडील बकऱ्या घेऊन माळरानात होते. निकालानंतर संदीपच्या घरी लोकांची रीघ लागली होती. उपस्थित असणाऱ्या लोकांच्या चर्चेमधून संदीपच्या आई-वडिलांना आपल्या मुलाने मोठी काहीतरी कामगिरी केली आहे.. तो मोठा साहेब झाला आहे, असे समजले. संदीप फौजदार झाल्याने गावातील लोकांच्या आनंदाला पारावर राहिला नाही.
MPSC Results: पोलीस उपनिरीक्षक परीक्षेत साताऱ्याच्या अमोल घुटुकडे राज्यात पहिला; पहिल्याच प्रयत्नात बाजी मारली

आईवडिलांच्या कष्टाचे चीज

पीएसआयचा निकाल लागल्यानंतर संदीप तीन दिवसांनी घरी आला. बापाला कडकडून मिठी मारली. तेव्हा त्यांचे वडील आनंदा कोकरे यांच्या अश्रूंचा बांध फुटला. आई चांगुनाबाई यांनी तर लहान बाळासारखे आपल्या साहेब झालेल्या लेकाचे मटामटा मुके घेतले.
Dhule News: मुलाची मेहनत, वडिलांचं प्रोत्साहन, बाप अन् लेक एकाच दिवशी PSI, धुळ्यातील पानपाटलांची पंचक्रोशीत चर्चा

एनटी प्रवर्गातून संदीप राज्यात नववा

महाराष्ट्र लोकसेवा आयोगाच्या या परीक्षेत संदीप एन टी प्रवर्गातून राज्यात नववा आला आहे. त्याचे शिक्षण शिरूर तालुक्यातील न्हावरे येथील मल्लिकार्जुन विद्यालयात झाले असून उच्चशिक्षण दौंड तालुक्यातील वरवंड येथील एकनाथ दिवेकर महाविद्यालयात झाले. या परीक्षेसाठी संदीपने खूप परिश्रम घेतले. चौथ्या प्रयत्नात त्याला यश आले.

भाऊ माझा सर्वकाही, त्याला माझ्यावर खूप विश्वास होता!

माझे मामा मस्कु तांबे, रामभाऊ तांबे, संजय तांबे यांच्यामुळेच माझे शिक्षण पूर्ण होऊ शकले. माझा भाऊ उमेश यानेही शिक्षणासाठी मोठी मदत केली. मला प्रत्येक गोष्ट त्याने पुरवली. पहिले तीन प्रयत्न अपयशी ठरल्यावर अनेकांनी नकारात्मक बोलणे सुरू केले होते. पण माझ्या भावाला माझ्यावर विश्वास होता. त्याच्यामुळेच मला यश मिळाले. तोच माझ्यासाठी सर्व काही आहे, असे संदीप सांगतो.

Source link