Tej Police Times
बदलापूर MIDC ब्लास्ट प्रकरण; जखमी घनश्याम मेस्त्रींचा मृत्यू, कुटुंबाचा आधार गेला
बदलापूर: बदलापूरच्या माणकिवली एमआयडीसीतील रेअर कंपनीमध्ये झालेल्या स्फोटामुळे परिसरात राहणारे मिस्त्री कुटुंबीय उध्वस्त झाले आहे. या कंपनीतील एक पार्ट त्यांच्या घरावर येऊन पडला. त्यांच्या घराचं छत फाडून तो तुकडा त्यांच्या घरात पडला. या दुर्घटनेत धनश्री मिस्त्री यांच्या एक पायला जबर जखम झालू आणि घनश्याम मिस्त्री यांचे दोन्ही पाय तुटले. तर, चिमुकली गंभीर जखमी झाली होती. दरम्यान, घनश्याम मेस्त्री यांच्यावर मुंबईच्या जेजे हॉस्पिटलमध्ये उपचार सुरू होते. पण, त्यांची मृत्यूशी झुंज अपयशी ठरली आणि मंगळवारी उपचारादरम्यान त्यांचा मृत्यू झाला आहे.
रिऍक्टरचा एक १०० किलो वजनाचा एक तुकडा उडून तब्बल ४०० मीटर अंतरावरील खरवई परिसरातल्या चाळीवर जाऊन कोसळला आणि मिस्त्री कुटुंबाचा आधार गेला.
१०० किलो वजनाचा रिऍक्टरचा तुकडा पायावर पडला
माणकिवली एमआयडीसीत सोमवारी (५ ऑगस्ट) रेअर फार्मा या कंपनीत भीषण स्फोट झाला. पहाटे सव्वा चारच्या सुमारास दोन स्फोट झाल्याने माणकिवली सह खरवई आणि बदलापूर शहरातील काही परिसर हादरला होता. या स्फोटाची भीषणता इतकी होती, रिऍक्टरचा एक १०० किलो वजनाचा एक तुकडा उडून तब्बल ४०० मीटर अंतरावरील खरवई परिसरातल्या चाळीवर जाऊन कोसळला. चाळीत राहणाऱ्या मेस्त्री कुटुंबाच्या घराचा छताचा पत्रा फाडून गाढझोपेत असलेल्या घनश्याम मेस्त्री यांच्या पायावर हा तुकडा कोसळला.
उपचारादरम्यान मंगळवारी घनश्याम यांचा रुग्णालयात मृत्यू
यात घनश्याम यांचे दोन्ही पाय शरीरापासून वेगळे झाले. तर त्यांची मुलगी आणि पत्नी यांनाही दुखापत झाली. यानंतर गंभीर जखमी अवस्थेत घनश्याम यांना मुंबईच्या जेजे हॉस्पिटलमध्ये दाखल करण्यात आलं. त्यांच्या पायावर रात्री शस्त्रक्रिया सुद्धा करण्यात आली. मात्र, यानंतर उपचारादरम्यान मंगळवारी त्यांचा मृत्यू झाला.
अवघ्या ३५ वर्षांच्या घनश्याम मेस्त्री यांच्या मृत्यूमुळे मेस्त्री कुटुंबावर दुःखाचा डोंगर कोसळला आहे. दरम्यान, या स्फ़ोटामुळे आजूबाजूच्या जवळपास १० ते १५ घरांचं किरकोळ नुकसान झाले आहे.