Tej Police Times
मुस्कान झूठी है…! इन्स्टावरील मैत्री महागात; मॉडेल बनण्याच्या नादात तरुणीसोबत भयंकर, भांडुपमधील घटना
मुंबई : भांडुप येथे वास्तव्यास असलेल्या १९ वर्षीय तरुणीला इन्स्टाग्रामवर ओळख झालेल्या एका तरुणाने आणि त्याच्या दोन मित्रांना मॉडेलिंगमध्ये करिअर करून देण्याच्या बहाण्याने फसविल्याचे समोर आले आहे. वेगवेगळी कारणे सांगून या तरुणीकडील दागिने आणि पैसे असा एकूण ४५ लाखांचा ऐवज या तिघांनी लुटला. इतकेच नाही तर या तरुणाने कधी जवळीक साधत तर कधी धमकावून, या तरुणीसोबत शारीरिक संबंध ठेवले. दागिने गेले, पैसेही परत केले नाही आणि मॉडेलिंगमध्येही मदतही झाली नाही, अशा आर्थिक- शारीरिक शोषणानंतर तरुणीने भांडुप पोलिस ठाण्यात तक्रार दाखल केली. त्यानंतर तिघा तरुणांविरुद्ध गुन्हा दाखल करण्यात आला आहे.
काय आहे प्रकरण?
भांडुपमधधील राधिका (बदललेले नाव) ही इंजिनीअरिंगच्या दुसऱ्या वर्षात शिक्षण घेते. इन्स्टाग्रामवर तिचे प्रोफाइल पाहून राहुल नावाच्या तरुणाने तिला मॉडेलिंगमध्ये नशीब अजमावण्याचा सल्ला दिला. यासाठी मदत करेन, असेही त्याने सांगितले. राहुल अनोळखी असल्याने राधिकाने त्याचे प्रोफाइल तपासले असता तो अनेक प्रॉडक्शन हाऊससोबत जोडलेला असल्याचे दिसले. सुरुवातीला इन्स्टाग्रामवर चॅटिंग झाल्यानंतर दोघांची मोबाइल क्रमांकाची देवाणघेवाण केली आणि त्यानंतर दोघेही एकमेकांशी बोलू लागले. मॉडेलिंगमध्ये करिअर करायची इच्छा असेल तर २० हजार रुपये भरून नोंदणी करण्यास राहुलने सांगितले.
राधिका हिने याबाबत आईवडिलांना सांगितले. त्यांनी सुरुवातीला विरोध केला मात्र नंतर राहुलला दिलेल्या क्रमांकावर ही रक्कम पाठवली. पैसे दिल्यानंतर राहुल वेगवेगळी कारणे सांगून राधिकाला भेटायला बोलवू लागला. एका उत्पादनाची जाहिरात करायची असून दहा लाख रुपये मिळतील, असे सांगून राहुलने तिच्याकडे एक लाख रुपयांची मागणी केली. इतकी रक्कम नसल्याने सांगताच राहुलने तिला घरातील दागिने आणण्यास सांगितले. राधिकाने सुरुवातीला स्वतःचे आणि नंतर घरातील सर्वच दागिने राहुलला दिले.
दागिने दिल्यानंतर राहुलने शारीरिक संबंध ठेवण्यासाठी धमकावल्याचे राधिका हिने तक्रारीत म्हटले आहे. राधिका हिने नकार देताच दागिने परत मिळणार नाही आणि मॉडेलिंगमध्येही मदत न करण्याची धमकी त्याने दिली. वारंवार वेगवेगळ्या प्रकारे धमकी देऊन राहुलने तिच्यावर अत्याचार केले. घरातील दागिने गायब असल्याचे कळताच राधिकाने सर्व हकीकत वडिलांना सांगितली. वडिलांनी राहुल याच्यासोबत संपर्क साधला असता दागिने गहाण ठेवले असून ते सोडविण्यासाठी पैसे हवेत असे सांगून पैशाची मागणी केली. दरम्यान राहुलचे मित्र हार्दिक आणि श्रेयस यांनी मॉर्फिंग केलेल्या व्हिडिओच्या माध्यमातून धमकावण्यास सुरुवात केली. आपण तिघांच्या जाळ्यात अडकल्याचे लक्षात येताच राधिका हिने भांडुप पोलिस ठाण्यात तक्रार केली.