Tej Police Times
राज्यसभा नको, विधानसभेलाही लढणार नाही; रावसाहेब दानवे म्हणतात, आदेश आला तर सरपंचही होईन
मुंबई : महाराष्ट्रातील राज्यसभेच्या दोन जागांसाठी पोटनिवडणूक कार्यक्रम निवडणूक आयोगाने जाहीर केला आहे. महाराष्ट्रातून केंद्रीय मंत्री पियुष गोयल आणि उदयनराजे भोसले हे दोघेही लोकसभेवर निवडून गेल्याने राज्यसभेच्या दोन जागा रिक्त झालेल्या आहेत. त्यामुळे येत्या तीन सप्टेंबर रोजी या दोन जागांसह १२ ठिकाणी पोटनिवडणुका पार पडणार आहेत.
राज्यसभेतील रिक्त जागेवर माजी केंद्रीय मंत्री रावसाहेब दानवे यांची वर्णी लागेल अशी चर्चा सध्या जोरात आहे. त्यासंदर्भात प्रश्न विचारले असता रावसाहेब दानवे यांनी ती धुडकावून लावली.
काय म्हणाले रावसाहेब दानवे?
‘मी पूर्णपणे सांगितलंय की माझं नाव चर्चेत नाही. मी राज्यसभा मागणार नाही. विधान परिषदही मागणार नाही. मी विधानसभेची निवडणूकही लढणार नाही. मी पक्षाचा एक शूर सैनिक आहे. मला पक्षाने जर म्हटलं की एखाद्या ग्रामपंचायतीचा सरपंच व्हा आणि पक्षाने आदेश दिला, तर मी सरपंच पण व्हायला तयार आहे.’ असं दानवे म्हणाले.
रावसाहेब दानवे माजी केंद्रीय मंत्री आहेत. मागील लोकसभा निवडणुकीत त्यांचा जालना लोकसभा मतदारसंघात पराभव झालेला आहे. मराठवाड्यात मराठा समाज बांधवांमध्ये त्यांचा दबदबा आहे.. आगामी राज्यसभा निवडणुकीत त्यांना उमेदवारी दिली तर विधानसभा निवडणुकीत त्याचा पक्षाला फायदा होईल असा एक मतप्रवाह भाजपात आहे. त्या अनुषंगाने रावसाहेब दानवेंची दावेदारी मजबूत समजली जात आहे.
कुणाकुणाचे पुनर्वसन होणार?
याच पार्श्वभूमीवर महादेव जानकर यांनी पण राज्यसभेची उमेदवारी मिळावी असा दावा केला आहे. परभणी लोकसभा मतदारसंघातून महायुतीकडून उपमुख्यमंत्री अजित पवार यांच्या नेतृत्वातील राष्ट्रवादी काँग्रेस पक्षाकडून लढलेल्या जानकरांना महाविकास आघाडीकडून शिवसेना (उद्धव बाळासाहेब ठाकरे) पक्षाचे उमेदवार संजय जाधव यांनी पराभवाचा धक्का दिला.
Uddhav Thackeray : जागावाटपाचं सूत्र ठरवणारे कुटुंबासह दिल्लीचे उंबरे झिजवतायत, ठाकरेंवर भाजपची टीका
लोकसभेला पराभूत झालेल्या किंवा तिकीट न मिळालेल्या नेत्यांचे नुकत्याच झालेल्या राज्यसभा निवडणुकीत पुनर्वसन झाले. पंकजा मुंडे, भावना गवळी यांची राज्यसभेवर वर्णी लागली आहे. आता इतरांपैकी कोणाला संधी मिळते, याकडे सर्वांचे लक्ष आहे.