Nashik News: सलग दुसऱ्या वर्षी राष्ट्रध्वज ‘तेजीत’; हातमागावरील सुताअभावी दरात १० टक्क्यांची वाढ

म. टा. प्रतिनिधी, नाशिक : महागाईची झळ यंदा तिरंगी राष्ट्रध्वजालाही बसली आहे. हातमागावरील कच्चे सूत आणि कापूस उपलब्ध नसल्याने स्वातंत्र्यदिनाच्या पार्श्वभूमीवर यंदा सलग दुसऱ्या वर्षीही राष्ट्रध्वजाच्या दरात दहा टक्क्यांपर्यंतची वाढ झाली आहे.

शहरातील खादी ग्रामोद्योग संघामध्ये कर्नाटकातील हुबळी, तसेच राज्यातील नांदेडहून राष्ट्रध्वज विक्रीसाठी दाखल झाले आहेत. त्यातील दोन बाय तीन फुटांचा राष्ट्रध्वज शंभर रुपयांपर्यंत महागला आहे, तर तीन बाय चार आणि चार बाय सहा फुटांचा राष्ट्रध्वज अडीचशे रुपयांनी महागला आहे. दि. १५ ऑगस्ट रोजी देशाचा स्वातंत्र्यदिन साजरा होत आहे. त्यासाठी शाळा-महाविद्यालयांसह विविध आस्थापना, संस्थांकडून राष्ट्रध्वज खरेदीला सुरुवात झाली आहे. खादीपासून तयार होणारे राष्ट्रध्वजच वापरावे असा नियम आहे. देशात हुबळी आणि नांदेड येथे राष्ट्रध्वजाची निर्मिती होते, तेथनू शहरात राष्ट्रध्वज दाखल झाले आहेत. मात्र, गतवर्षीच्या तुलनेत राष्ट्रध्वजांच्या किमतीत शंभर ते अडीचशे रुपयांपर्यंतची वाढ झाली आहे. त्यामुळे राष्ट्रध्वजालाही महागाईचा फटका बसल्याचे चित्र आहे. कच्च्या सुताचे पीळ महाग झाल्याने राष्ट्रध्वज महागल्याचे सांगितले जात आहे.

कारागिरांची संख्या घटली

राष्ट्रध्वजाची निर्मिती करण्यासाठी सहा ते सात तासांच्या मेहेनतीनंतरही अवघे दीडशे ते दोनशे रुपये कामगारांच्या हाती पडतात. त्यामुळे यंदा हातमागावर काम करणाऱ्या कारागिरांची संख्या घटली आहे. राष्ट्रध्वजासाठी लागणारे हातमागावरील सुती कापडही मिळेनासे झाले आहे. परिणामी गत दोन वर्षांपासून राष्ट्रध्वजांच्या दरात वाढ होत असल्याचे दिसून येत आहे.
Har Ghar Tiranga: भाजपतर्फे राज्यभर ‘हर घर तिरंगा’; एक कोटी घरांवर राष्ट्रध्वज लावण्याचा संकल्प
आकारमानानुसार राष्ट्रध्वजाचे दर…
आकार जुने दर नवे दर

दोन बाय तीन १०५० ११५०
तीन बाय चार २२०० २४५०
चार बाय सहा २८२३ ३०८०

राष्ट्रध्वजासाठी लागणारा कच्चा माल म्हणजेच हातमागावरील सूत कमी प्रमाणात उपलब्ध होत आहे . त्यामुळे गतवर्षीप्रमाणेच यंदाही राष्ट्रध्वजाचे दर दहा टक्क्यांनी वाढले आहेत . स्वातंत्र्यदिनाच्या पार्श्वभूमीवर शाळा-महाविद्यालयांसह विविध आस्थापनांकडून राष्ट्रध्वजाच्या मागणीत वाढ झाली आहे. -सचिन पवार, व्यवस्थापक, खादी ग्रामोद्योग