Tej Police Times
लहानपणी ज्याला जपलं, त्याच लहान भावावर कुऱ्हाडीचे वार, चंद्रपुरात कुटुंबासमोरच हत्येचा थरार
चंद्रपूर: चंद्रपुरात एक भयंकर घटना घडली आहे. येथे एका भावाने आपल्याच लहान भावाची हत्या केली केली. याप्रकरणी पोलिसांनी मोठ्या भावाला लहान भावाच्या हत्येप्रकरणात अटक केली आहे. या घटनेने परिसरात एकच खळबळ माजली आहे.
कामधंदा करत नसलेल्या लहान भावासोबत मोठ्या भावाचा वाद झाला. हा वाद विकोपाला गेला. या वादातून मोठ्या भावाने कुऱ्हाडीने सपासप वार करून लहान भावाला ठार केल्याची खळबळजनक घटना चंद्रपुरात घडली आहे. गणेश पुंडलिक गेडाम असे मृतकाचे नाव आहे. तर, आरोपी मंगल पुंडलिक गेडाम याला पोलिसांनी अटक केली आहे.
प्राप्त माहितीनुसार, मंगल आणि गणेश यांचे एकत्र कुटुंब आहे. ते चंद्रपूर शहरातील प्रादेशिक परिवहन कार्यालयाच्या मागे उडिया मोहल्ला येथे वास्तव्यास आहेत. बुधवारी (७ ऑगस्ट) रात्री दहा वाजण्याच्या सुमारास गणेश घरी बसलेला होता, तेव्हा मंगल घरी आला. गणेश हा काहीही काम करत नसल्याने मंगलने कामधंदा का करत नाही असे विचारलं. यामुळे दोन भावांमध्ये मोठा वाद झाला. हा वाद विकोपाला जाऊन त्यांच्यात हाणामारी झाली.
रागाच्या भरात मंगलने कुऱ्हाड घेतली आणि थेट गणेशच्या डोक्यावर, मानेवर दोन वार केले. कुऱ्हाडीने वार केल्याने गणेश रक्ताच्या थारोळ्यात खाली कोसळला. हे दृश्य बघून कुटुंबीय हादरले. त्यांनी आरडाओरडा केली. त्यांचा आवाज एकूण शेजारी धावून आले. समोरील दृश्य पाहून शेजाऱ्यांनाह धक्का बसला. त्यानंतर शेजाऱ्यांनी जखमी गणेशला सामान्य रुग्णालयात दाखल केले. मात्र, तिथे डॉक्टरांनी गणेशला तपासून मृत घोषित केले.
मृताच्या बहिणीने याबाबत रामनगर पोलिसांत तक्रार दाखल केली. रामनगर पोलिस स्टेशनचे ठाणेदार असिफराजा शेख, पोलिस उपनिरीक्षक दीपेश ठाकरे यांनी घटनास्थळ गाठून पंचनामा केला. पोलिसांनी आरोपी मंगल गेडाम याला अटक केली आहे. आरोपीविरुद्ध भारतीय न्याय संहिता १०३ (१) अन्वये गुन्हा दाखल केला आहे. पुढील तपास रामनगर पोलिस करत आहेत.