लोकसभा निवडणुकीप्रमाणेच विधानसभेसाठीही कोकणात शीतयुद्ध रंगणार? रत्नागिरीच्या जागांवर दावे-प्रतिदावे

प्रसाद रानडे, रत्नागिरी : कोकणातील राजकारण हे नेहमीच चर्चेत राहते. लोकसभा निवडणुकीनंतर आता विधानसभा निवडणुका डोळ्यासमोर ठेवून सर्वच पक्षाकडूंन रणनीती आखण्यात येत आहे. यातच आता दौऱ्यांचे सत्र सुरु झाले आहे. लांजा राजापूर विधानसभा मतदारसंघात किरण सामंत व त्यांची कन्या अपूर्वा सामंत यांनी दौरे आणि बैठका योजल्या आहेत. किरण सामंत हे अलीकडे राजापूर लांजा तालुक्यात सातत्याने जनसामान्यांच्या संपर्कात आहेत. त्यामुळे आगामी विधानसभेसाठी लांजा राजापूर विधानसभा मतदारसंघातून किरण ऊर्फ भैय्या सामंत यांचे नाव शिवसेनेकडून चर्चेत आहे. तर दुसरीकडे भाजपा देखील रत्नागिरी जिल्ह्यातील राजापूर व गुहागर या दोन्ही विधानसभा मतदारसंघावर प्रबळ दावा करण्याच्या तयारीत आहेत. इतकच नाही तर राजापूर विधानसभा मतदारसंघासाठी भाजपकडून रणनीती आखण्यात आल्याची माहिती आहे.

रत्नागिरी विधानसभा राजकारणात किरण सामंतांची महत्वाची भूमिका

जिल्ह्यात महायुतीकडून चिपळूण, गुहागर, राजापूर या तीनही मतदारसंघाबाबत दावे प्रतिदावे करण्यात येत आहेत. किरण सामंत हे मंत्री उदय सामंत यांचे मोठे बंधू आहेत. उदय सामंत यांच्या रत्नागिरी विधानसभा मतदारसंघातील आजवरच्या प्रत्येक निवडणुकीत किरण सामंत यांची महत्त्वाची भूमिका राहिली आहे. रत्नसिंधू या शासनाच्या योजनेचे सदस्य असलेले किरण सामंत यांना रत्नागिरी सिंधुदुर्ग लोकसभा मतदारसंघातून उमेदवारी देण्यात आली नसल्याने शिवसेनेच्या गोटात नाराजी पसरली होती. ती नंतर दूर देखील झाली होती मात्र आता राजपूर विधानसभेत सामंतांना संधी देऊन नाराजी दूर केली जाऊ शकते.
Ajit Pawar: ‘अर्थ’चा विरोध असूनही दादांच्या आमदाराला २ कोटींचा निधी; शरद पवारांच्या भेटीनंतर चक्रं फिरली

सामंत विरुद्ध राणे वाद होण्याची शक्यता

नुकत्याच पार पडलेल्या लोकसभा निवडणुकीत विद्यमान खासदार माजी केंद्रीय मंत्री नारायण राणे यांना रत्नागिरी जिल्ह्यातून एकाही विधानसभा मतदारसंघातून मताधिक्य मिळू शकले नाही. रत्नागिरी राजापूर येथेही हे मताधिक्य मिळालेले नाही. या मुद्द्यावरुन भाजपाचे माजी खासदार निलेश राणे यांनी सामंत यांचे नाव न घेता थेट सूचक इशाराही दिला होता. नारायण राणे यांना रत्नागिरी जिल्ह्यातून मताधिक्य मिळू शकले नाही, याची मोठी सल भाजप पदाधिकारी व कार्यकर्त्यांमध्ये आहे. त्यामुळे या सगळ्याचा मोठा राजकीय परिणाम येत्या विधानसभा निवडणुकीत पाहायला मिळू शकतो, तशा स्वरूपाच्या हालचाली देखील महायुतीमध्ये सुरू असल्याची चर्चा आहे.

कोणत्याही परिस्थितीत राजापूर व गुहागर या दोन्ही मतदारसंघावर भाजपाकडून विद्यमान खासदार नारायण राणे यांनी रविंद्र चव्हाण यांच्या उपस्थितीत दावा केला आहे. प्रसंगी आम्ही तिसऱ्या जागेवरही दावा करू, असेही मोठे विधान नारायण राणे यांनी केले आहे. त्यामुळे भाजपचे नेते खासदार नारायण राणे यांनी सामंतांना हा इशारा दिल्याचे बोलले जात आहे. यातच गुहागरमधून माजी आमदार डॉ.विनय नातू यांनी गेल्या वर्षभरापासून तयारी सुरू केली आहे.
Maharashtra Politics: अब की बार, मविआ सरकार! विधानसभेला विरोधकांना कौल, सर्व्हे आला; ३ विभागांत महायुती वरचढ ठरणार
राजापूर मतदारसंघातून भाजपकडून रवींद्र नागरेकर यांना तयारी सुरू करण्यासाठी सूचना देण्यात आल्याची चर्चा आहे. याच पार्श्वभूमीवर रविंद्र नागरेकर यांनीही आगामी विधानसभा निवडणुकीसाठी चाचपणी व तयारी सुरू केली आहे. रविंद्र नागरेकर हे नारायण राणे यांचे जवळचे विश्वासू सहकारी मानले जातात. राजापूर विधानसभा मतदारसंघ हा कुणबी बहुल मतदारसंघ आहे. रविंद्र नागरेकर हे कुणबी समाजाचे आहेत. त्यामुळे भाजपकडून राजापूर लांजा विधानसभा मतदारसंघासाठी जोरदार तयारी सुरू आहे. भाजपाने मैत्रीपूर्ण लढत करण्याचाही इशारा दिला आहे. पण शिवसेनेकडून चर्चेत असलेले किरण सामंत यांचा गेले काही महिने सातत्याने सुरू असलेले दौरे संपर्क या पार्श्वभूमीवर राजापूर विधानसभा मतदारसंघातून महायुतीकडून ही जागा शिवसेना अथवा भाजप कोणाला सुटते हे पाहणं महत्त्वाचं ठरणार आहे.

महाविकास आघाडीकडूनही राजापूर विधानसभा मतदारसंघावर दावे प्रतिदावे सुरू आहेत. शिवसेनेच्या ठाकरे गटाचे राजन साळवी हे विद्यमान आमदार असतानाही साळवी यांच्याविरोधात वक्तव्य करत काँग्रेसकडून या मतदारसंघावर दावा केला जात आहे. त्यामुळे महाविकास आघाडीकडून ही जागा ठाकरे गटाला की काँग्रेसला सुटणार हे पाहणं महत्त्वाचं ठरणार आहे. त्यामुळे सध्या महायुतीकडून सुरू असलेले दावे व येत्या काही दिवसांत विधानसभा निवडणुकांसाठी निश्चित होणारे उमेदवार यामध्ये राजापूर लांजा विधानसभा मतदारसंघाबाबत महायुतीच्या नेत्यांकडून उमेदवारी देण्याबाबत कोणता निर्णय घेतला जातो, याकडे संपूर्ण जिल्ह्याचे लक्ष लागले आहे.