हत्याराचा धाक दाखवून बंगल्यातून चंदनचोरी, पुण्यातल्या ‘त्या’ चोरीची सर्वत्र चर्चा

म. टा. प्रतिनिधी, पुणे : पुण्यातील उच्चभ्रू आणि वर्दळीच्या अशा प्रभात रस्त्यावरील भारती निवास कॉलनीतील ‘श्री ठाकूरधाम’ बंगल्यात हत्यारे घेऊन आलेल्या सात ते आठ जणांच्या टोळक्याने महिलेला जिवे मारण्याची धमकी देत ७० वर्षे जुन्या चंदनाच्या झाडाचा बुंधा कापून नेण्याची घटना दहा ऑगस्टला पहाटे पावणेचारच्या सुमारास घडली.या प्रकरणी अनघा परळीकर (वय ४१) यांनी तक्रार दिली आहे. त्यावरून डेक्कन पोलिस ठाण्यात सात ते आठ जणांच्या टोळक्यावर गुन्हा दाखल करण्यात आला आहे. पोलिसांनी दिलेल्या माहितीनुसार, तक्रारदार ‘श्री ठाकूरधाम’ बंगला येथे राहतात. हा परिसर कर्वे रस्ता आणि प्रभात रस्त्याच्या मधील भागात आहे. या परिसरात दिवसाही वर्दळ कमी असते. रात्रीच्या वेळेला अपुरा प्रकाश असतो. घटनेच्या दिवशी सात ते आठ जणांचे टोळके तक्रारदार यांच्या बंगल्याच्या आवारात घुसून चंदनाचे झाड कापत होते. त्या वेळी झाड कापताना झालेला आवाज ऐकून तक्रारदार आणि त्यांचे पती अॅड. रोहित एरंडे दोघे जागे झाले. रोहित यांनी दरवाजा उघडून बाहेर पाहिले असता, सात ते आठ जणांचे टोळके त्यांना दिसले. टोळक्याकडे शस्त्र असल्याने तक्रारदाराने रोहित यांना घरात बोलावले. त्यानंतर तक्रारदार खिडकीतून बाहेर डोक्यावल्या असता, एका चोरट्याने त्यांना शस्त्र दाखविले. त्यानंतर चोरट्यांनी झाडाचा बुंधा कापून तेथून पळ काढला.
Chhagan Bhujbal: हिंमत असेल, तर निवडणूक लढवा; छगन भुजबळांचे मनोज जरांगेंना खुलं चॅलेंज

‘बुंधा चोरून नेलेले चंदनाचे झाड सुमारे १८ वर्षांपूर्वी दोन वेळा कापण्याचा प्रयत्न झाला होता. त्यानंतर त्या झाडाला मजबूत असा सहा फुटी उंच चौथरा बांधून घेण्यात आला होता. त्यावर पाच फूट लोखंडी ग्रील करून घेतले होते,’ अशी माहिती अॅड. रोहित एरंडे यांनी दिली.

सुरक्षेचा प्रश्न ऐरणीवर

जुलै महिन्याच्या सुरुवातीला याच परिसरातील भावे रस्त्यावर एका बंगल्यात सराइत चोरट्याने चोरी करून सुमारे १४ लाख रुपये किमतीचे दागिने लंपास केले होते. गुन्हे शाखेच्या पोलिसांनी आठवड्याभरातच चोरट्याला मुद्देमालासहीत पकडले. मात्र, ही घरफोडीची घटना आणि नुकत्याच घडलेल्या चंदन चोरीची घटनेमुळे येथील बंगल्यांच्या सुरक्षिततेचा प्रश्न निर्माण झाला आहे.
Manoj Jarange: मराठ्यांची ताकद दाखवा! आरक्षणासाठी जरांगेंचे आवाहन, २९ ऑगस्टला निवडणुकीबाबत घेणार निर्णय

‘पोलिस गस्त वाढवा’

भांडारकर रस्ता, प्रभात रस्ता आणि कर्वे रस्ता या परिसरात जुने बंगल्यांचे अस्तित्व आजही टिकून आहेत. येथील रस्ते अरुंद असून मुख्य रस्त्यांच्या तुलनेने वर्दळ खूपच कमी असते. रात्रीच्या वेळेला अंधाराचे साम्राज्य असते. त्यामुळे या रस्त्यावर पुरेशी प्रकाश व्यवस्था असावी; तसेच रात्रीच्या वेळेला पोलिस गस्त वाढवावी, अशी मागणी होत आहे.

पोलिस १५-२० मिनिटांनी दाखल

सोसायटीच्या रस्त्याच्या दुसऱ्या बाजूकडून कोणी येऊ नये म्हणून आरोपींनी दुचाकी रस्त्याला आडव्या लावून ठेवल्या होत्या. हा प्रकार लक्षात आल्यानंतर पोलिसांच्या ११२ नंबरला फोन लावला. सुमारे १५ ते २० मिनिटांनी पोलिस बिट मार्शल घटनास्थळी दाखल झाले. तोपर्यंत चोरटे झाड घेऊन गेले होते. आवाजामुळे आजूबाजूचे लोक जागे झाले; परंतु हत्यारबंद आरोपी पाहिल्यानंतर त्यांनी तक्रारदाराला फोन करून बाहेर येऊ नका, असे बजावले होते.