बबनराव पाचपुतेंना श्रीगोंद्यात डोकेदुखी; सुवर्णाताई म्हणतात, मीच जनतेच्या मनातली आमदार

प्रसाद शिंदे, अहमदनगर : लोकसभा निवडणुकीनंतर आता अनेकांना वेध लागले आहेत ते विधानसभा निवडणुकीचे. विधानसभा निवडणूक आता काही महिन्यांवर येऊन ठेपली आहे. त्यामुळे सर्वच इच्छुक उमेदवार आपल्या पद्धतीने कामाला लागले आहेत. मात्र या विधानसभा निवडणुकीत सर्वच पक्षांना उमेदवार कोण द्यायचे याबाबत चांगलीच डोकेदुखी होणार आहे. कारण एकाच मतदारसंघात अनेक इच्छुक उमेदवार असल्याने उमेदवारीची माळ कोणाच्या गळ्यात टाकायची याबाबत वरिष्ठांना मोठी तारेवरची कसरत करावी लागणार आहे.

अहमदनगर जिल्ह्यातील श्रीगोंदा मतदारसंघ सध्या चांगलाच चर्चेत आहे. या ठिकाणी भाजपचे विद्यमान आमदार बबनराव पाचपुते असून भाजपमधूनच अनेक जण इच्छुक असल्यामुळे आता बबनराव पाचपुते यांनाच पुन्हा उमेदवारी मिळणार का? की ठिकाणी खांदेपालट होणार याकडे श्रीगोंदाकरांचे लक्ष लागून आहे.
Hasan Mushrif : महायुतीचा पहिला उमेदवार जाहीर, अजितदादांची थेट घोषणा, भाजप इच्छुकाच्या मनसुब्यांना सुरुंग
कारण माजी मंत्री शिवाजी कर्डिले यांच्या पाठोपात आता भाजपमधूनच सुवर्णा पाचपुते यांनी निवडणुकीची तयारी केली असून निवडणुकीसाठी गेल्या वर्षभर त्या श्रीगोंदा मतदारसंघात जनसंपर्क करत आहेत. मागील वेळी सर्व तयारी झाली होती मात्र ऐन वेळेस पक्षातील वरिष्ठांनी थांबण्यास सांगितल्यामुळे आपण थांबलो होतो. मात्र यावेळेस सर्वच वरिष्ठ नेते आपल्याबरोबर असून भाजपचे सर्व कार्यकर्ते आपल्याला उमेदवारीसाठी गळ घालत आहेत. जनतेच्या मनातील आमदार असल्यामुळे यावेळेस भाजपकडून श्रीगोंदा मतदारसंघात आपल्याला उमेदवारी मिळेल अशी अपेक्षा सुवर्णा पाचपुते यांनी व्यक्त केली आहे.

भाजपमधूनच अनेक जण इच्छुक असल्यामुळे विद्यमान आमदार बबनराव पाचपुते यांच्यासमोर आता मोठे राजकीय संकट उभा राहणार आहे. पक्षातील काही नेत्यांसह बबनराव पाचपुते यांच्या घरातील त्यांची पत्नी आणि त्यांच्या मुलाच्याही नावाची उमेदवारीसाठी चाचपणी सुरू आहे. त्यामुळे आता भाजपकडून नेमकी उमेदवारी कोणाला मिळते याकडेच श्रीगोंदा वासियांचे लक्ष लागून राहिले आहे.
Shital Farakate : मोठ्या साहेबांना दिल्लीची स्वप्नं, महिला जिल्हाध्यक्षांची टीका, वडिलधाऱ्यांवर टीका नको, अजितदादांनी खडसावलं

याआधी, भाजपचे माजी खासदार सुजय विखे पाटील यांनी राहुरी आणि संगमनेर विधानसभा मतदारसंघातून निवडणूक लढवण्याची इच्छा व्यक्त केली होती. त्यामुळे राहुरी विधानसभा मतदारसंघावर दावा असणारे माजी आमदार शिवाजी कर्डिले यांची प्रतिक्रिया विचारण्यात आली असता, लोकशाहीत प्रत्येकाला इच्छा व्यक्त करण्याचा अधिकार आहे, मात्र याबाबत पक्ष निर्णय घेईल, असं सूचक उत्तर शिवाजी कर्डिले यांनी दिलं होतं. तर कर्डीले हे श्रीगोंदा विधानसभा मतदारसंघातून निवडणूक लढवतील अशीही चर्चा सुरु झाली होती.