पाठीवर संघाचा हात अन् आता छापून आलेली ‘ती’ जाहिरात; फडणवीस होणार भाजपचे बॉस?

मुंबई: राज्यात विधानसभेची निवडणूक तोंडावर आलेली असताना उपमुख्यमंत्री देवेंद्र फडणवीसांच्या नावाची चर्चा सुरु आहे. फडणवीस दिल्लीत जातील आणि भाजपचे अध्यक्ष होतील, अशा चर्चा गेल्या काही दिवसांपासून सुरु आहेत. या महिन्याच्या सुरुवातीला फडणवीस सहकुटुंब पंतप्रधान नरेंद्र मोदींना भेटले. तेव्हापासून चर्चांनी अधिक जोर धरला. आता फडणवीसांचा फोटो असलेल्या पानभर जाहिराती वृत्तपत्रात छापून आल्यानं चर्चांना आणखी उधाण आलं आहे.

राज्यातील काही वृत्तपत्रांमध्ये देवेंद्र फडणवीसांचा फोटो असलेल्या पानभर जाहिराती प्रसिद्ध झाल्या आहेत. या जाहिरातीत हर हर महादेव असा उल्लेख आहे. त्यामुळे फडणवीस भाजप अध्यक्ष होतील या चर्चांनी आणखी जोर धरला आहे. विधानसभा निवडणूक अवघ्या दोन महिन्यांवर आली आहे. राज्यात महायुतीचं सरकार आहे. पुढील वर्षी राष्ट्रीय स्वयंसेवक संघाच्या स्थापनेला १०० वर्षे होत आहेत. त्यावेळी राज्यात आपलंच सरकार असावं यासाठी भाजपचे प्रयत्न सुरु आहेत.
Ladki Bahin Yojana Promotion: ‘लाडकी बहिण’वरुन शिंदे, दादा जोमात; भाजप मागे का? काय घडतंय मोठ्या भावाच्या गोटात?
अमित शहा राज्यात लक्ष ठेवून आहेत. लोकसभेतील कामगिरीमुळे ते चिंतेत आहेत. गेल्याच महिन्यात त्यांनी पुणे दौरा केला. आता ते १६ ऑगस्टला पुन्हा राज्यात येणार आहेत. त्यांचा दौरा ३ दिवसांचा असेल. राज्यात भाजप फडणवीसांवर अवलंबून आहे. मराठा आरक्षणावरुन फडणवीस विरोधकांच्या निशाण्यावर आहे. मनोज जरांगे पाटीलदेखील त्यांनाच लक्ष्य करत आहेत. लोकसभेला मराठा फॅक्टरचा फटका भाजपला मोठ्या प्रमाणात बसला. मराठवाड्यात पक्षाला भोपळा मिळाला.

फडणवीस दिल्लीला गेल्यास अन्य नेत्याला पक्ष संघटनेवर मांड पक्की करण्यास कमी वेळ मिळेल. विनोद तावडे राज्यात परतू शकतात. पण तशी शक्यता सध्याच्या घडीला कमी आहे. महाराष्ट्रातील काही वृत्तपत्रांमध्ये फडणवीसांचा फोटो असलेल्या पानभर जाहिराती प्रसिद्ध झाल्या आहेत. त्यात हर हर महादेव असा उल्लेख आहेत. जरांगेंच्या पुण्यातील रॅलीआधी या जाहिराती प्रसिद्ध झाल्या आहेत. त्यामुळे फडणवीसांच्या काशी कनेक्शनची चर्चा सुरु झाली आहे.
Maharashtra Politics: विधानसभेला तिकीट कोणाला? भाजपाच फॉर्म्युला ठरला, लोकसभेतून धडा; बऱ्याच आमदारांना नारळ?
राज्यात मुख्यमंत्रिपदाचा ५ वर्षांचा कार्यकाळ पूर्ण करण्याचा मान फडणवीसांना मिळाला आहे. चारवेळा मुख्यमंत्रिपद भूषवणाऱ्या शरद पवारांनादेखील ही किमया साधता आलेली नाही. फडणवीसांकडे प्रशासनाचा चांगला अनुभव आहे. ते आता केवळ ५३ वर्षांचे आहेत. राष्ट्रीय राजकारणात जाण्यासाठी आवश्यक कौशल्यं त्यांच्याकडे आहेत. पण सध्यातरी टायमिंग त्यांच्या बाजूनं नाही.

फडणवीस आता केंद्रात गेल्यास राज्यातील विरोधक महायुतीवर भारी पडू शकतात. भाजपचं अध्यक्षपद किंवा कार्यकारी अध्यक्षपदाच्या नियुक्तीसाठी सध्या तरी कोणताही दबाव नाही. पक्षाकडे डिसेंबरपर्यंतची मुदत आहे. पक्षानं जे. पी. नड्डांना मुदतवाढ दिली होती. ही मुदत जूनमध्ये संपली. आता पक्षात संघटन पर्व सुरु आहे. राष्ट्रीय अध्यक्षाच्या नियुक्तीआधी हे पर्व सुरु होतं. भाजप महाराष्ट्रातील निवडणूक पार पडल्यावर फडणवीसांकडे अध्यक्षपद सोपवण्याची शक्यता अधिक आहे.