Tej Police Times
राष्ट्रवादीच्या मतांवर काँग्रेस विजयी, माझ्यासारखा सक्षम मुस्लीम उमेदवार हवा, दुर्रानी आक्रमक
धनाजी चव्हाण, परभणी : “पाथरी विधानसभा मतदारसंघ हा पारंपारिकरित्या शरद पवार यांना मानणारा आहे. १९८० च्या एस काँग्रेसपासून आतापर्यंत या विधानसभा मतदारसंघामध्ये राष्ट्रवादी काँग्रेसचंच प्राबल्य राहिलं आहे. २०१९ च्या विधानसभा निवडणुकीत राष्ट्रवादी काँग्रेसच्याच मताधिक्यावर काँग्रेसचे विद्यमान आमदार सुरेश वरपूडकर विजयी झाले, लोकसभेला मुस्लिम समाजाने महाविकास आघाडीला भरभरून मते दिल्यानंतर आता विधानसभेला जास्तीत जास्त मुस्लिम उमेदवार देऊन न्याय मिळावा, अशी भावना मुस्लिम समाजाची आहे. त्यामुळे माझ्यासारख्या सक्षम मुस्लिम उमेदवाराला उमेदवारी देऊन महाविकास आघाडीने मुस्लिम समाजाला न्याय मिळवून द्यावा” अशीच भावना राष्ट्रवादी काँग्रेस शरद पवार गटात प्रवेश केलेले माजी आमदार बाबाजानी दुर्रानी यांनी व्यक्त केली आहे.
दोन दिवसांपूर्वी काँग्रेस पक्षाकडून नांदेड येथे नांदेड, परभणी, हिंगोली या तीन जिल्ह्यातील विधानसभानिहाय मतदारसंघांचा आढावा घेण्यात आला. हा आढावा घेत असताना प्रदेशाध्यक्ष नाना पटोले यांनी पाथरी विधानसभा मतदारसंघ हा काँग्रेसकडेच राहील अशी घोषणा केली होती. या मतदारसंघाचं काँग्रेसचे विद्यमान आमदार सुरेश वरपूडकर प्रतिनिधित्व करत आहेत. सुरेश वरपूडकर हे पाथरीतून दुसऱ्यांदा लढण्यास इच्छुक आहेत. त्याचबरोबर राष्ट्रवादी शरद पवार गटाकडून माजी आमदार बाबाजानी दुर्रानी यांची देखील पाथरी विधानसभेतून निवडणूक लढण्याची इच्छा आहे. त्यामुळे महाविकास आघाडीमध्ये उमेदवारीवरुन चांगलाच पेच निर्माण झाला आहे.
पुढे बाबाजानी दुर्रानी म्हणाले की मुस्लिम संघटनांच्या वतीने महाविकास आघाडीकडे या विधानसभा निवडणुकीत वीस सक्षम मुस्लिम उमेदवारांना उमेदवारी देण्याची मागणी करण्यात आली आहे. नुकत्याच झालेल्या लोकसभा निवडणुकीत मुस्लिम समाजाने एकगठ्ठा मतदान महाविकास आघाडीला केल्याने चांगलेच यश मिळाले, पण त्या प्रमाणात मुस्लिम समाजाला न्याय मिळाला नाही. त्यामुळे विधानसभा निवडणुकीत या सक्षम २० मुस्लिम उमेदवारांना तिकिटे देऊन निवडून आणावे अशीच मागणी मुस्लिम संघटना करत आहेत. या २० जणांमध्ये खुद्द बाबाजानी दुर्रानी यांचेदेखील नाव आहे.
माजी आमदार बाबाजानी दुर्राणी हे राष्ट्रवादी अजित पवार गटामध्ये होते. पण काही दिवसांपूर्वीच त्यांनी मुस्लिम समाजाच्या रेट्यामुळे आपण राष्ट्रवादी काँग्रेस शरदचंद्र पवार गटात प्रवेश करत असल्याचे जाहीर केले. छत्रपती संभाजीनगर येथे त्यांनी शरद पवार यांच्या उपस्थितीत पक्षप्रवेश केला. प्रवेश करतानाच दुर्रानींच्या कार्यकर्त्यांनी पाथरी विधानसभा मतदारसंघ राष्ट्रवादी काँग्रेससाठी सोडून घ्यावा अशी मागणी केली होती. यावर शरद पवारांनी महाविकास आघाडीशी चर्चा करून निर्णय घेऊ असे सांगितले होते. त्यामुळे बाबाजानी दुर्रानी यांना पाथरी विधानसभा मतदारसंघातून उमेदवारी मिळू शकते, असा कयास लावला जात होता.
१९८० पासून पवारांना मानणारा मतदारसंघ
१९८० पासून पाथरी विधानसभा मतदारसंघ हा शरद पवारांना मानणारा आहे. शरद पवारांनी एस काँग्रेसची स्थापना केल्यापासून आत्तापर्यंत या मतदारसंघामध्ये राष्ट्रवादी काँग्रेसच्याच विचाराचा आमदार निवडून आला आहे. २०१९ च्या विधानसभा निवडणुकीतही काँग्रेसचे सुरेश वरपूडकर हे राष्ट्रवादी काँग्रेसच्या मताधिक्यावर आमदार झाले. कारण यापूर्वी त्यांनी स्वतंत्र निवडणूक लढवली होती, त्यावेळेस त्यांचा पराभव झाला होता. त्यामुळे आता २०२४ च्या विधानसभा निवडणुकीत पाथरी विधानसभेची जागा राष्ट्रवादीला सोडावी अशीच मागणी दुर्रानी यांनी केली आहे.
Parth Pawar : श्रीरंग बारणेंना लोकसभेला कोणी मदत केली, त्यांच्या मुलाला विचारा, पार्थ पवारांचं सूचक भाष्य
जागा कोणालाही सुटो, महाविकास आघाडीचा धर्म पाळणार
मुस्लिम समाजाचा प्रचंड रेटा असल्यामुळे मी पाथरी विधानसभा मतदारसंघातून महाविकास आघाडीकडे उमेदवारी मागत आहे. पण महाविकास आघाडीत पाथरी विधानसभा मतदारसंघ कोणत्याही पक्षाला सुटला आणि माझ्या व्यतिरिक्त दुसरा कोणीही उमेदवार आला तरी मी महाविकास आघाडीचा धर्म पाळणार आहे. जो उमेदवार महाविकास आघाडी देईल त्याला निवडून आणण्याचे जबाबदारी आमची संयुक्तरित्या असेल असेही माजी आमदार बाबाजानी दुर्रानी म्हणाले.