विधानसभेपूर्वीच शिवसैनिक नाराज! परभणी जिल्ह्याला मंत्रीपद द्या, ओमराजे निंबाळकरांसमोर मागणी

परभणी, डॉ.धनाजी चव्हाण : परभणीला शिवसेनेचा बालेकिल्ला मानला जातो. स्वर्गीय बाळासाहेब ठाकरे यांना मानणारा हा जिल्हा आहे. परभणी जिल्ह्यामुळेच शिवसेनेला धनुष्यबाण हे चिन्ह मिळाले. अशी परिस्थिती असताना देखील परभणी जिल्ह्याला शिवसेना न्याय कधी देणार? मराठवाड्यातील अन्य जिल्ह्यामध्ये शिवसेनेकडून मोठ्या प्रमाणावर मंत्रिपदे देण्यात आली, पण परभणी जिल्ह्याला मंत्रीपद देण्यापासून का वंचित ठेवण्यात आले? असा सवाल उपस्थित होत आहे. परभणी जिल्ह्याला मंत्रीपद कधी देणार परभणीला न्याय कधी देणार? असा सवाल शिवसैनिकांनी खासदार ओमराजे निंबाळकर यांनाच विचारला.

परभणी लोकसभा मतदारसंघातील सहा विधानसभा मतदारसंघाचा आढावा घेण्यासाठी शिवसेना उद्धव बाळासाहेब ठाकरे पक्षाची बैठक आज परभणीच्या सावली विश्रामगृहावर संपन्न झाली. विधानसभा निहाय आढावा यावेळी खासदार ओमराजे निंबाळकर यांनी घेतला. परभणी लोकसभा मतदारसंघात परभणी गंगाखेड पाथरी जिंतूर घनसांगवी आणि परतुर असे सहा विधानसभा मतदारसंघ येतात. या सहा विधानसभा मतदारसंघांपकी परभणी विधानसभा मतदारसंघांमध्ये शिवसेना उद्धव बाळासाहेब ठाकरे गटाचा आमदार आहे. आज दिवसभर खासदार ओमराजे निंबाळकर यांनी या सहा विधानसभा मतदारसंघातील पक्ष संघटनेची स्थिती जाणून घेतली त्याचबरोबर येणाऱ्या विधानसभा निवडणुकीच्या अनुषंगाने चालू असलेली तयारी आणि त्यामध्ये करावयाचे बदल याचा देखील आढावा घेतला.
अंत:करणातून इच्छा आहे, उद्धव ठाकरेंनी पुन्हा CM बनावे! राष्ट्रवादीच्या खासदाराने घेतले चॅलेज

परभणी विधानसभा मतदारसंघाचा आढावा चालू असताना उपस्थित असलेल्या पदाधिकाऱ्यांपैकी एक पदाधिकारी उभा राहिला. त्याने थेट खासदार ओमराजे निंबाळकर यांना जाबच विचारला. परभणी जिल्हा हा शिवसेनेचा बालेकिल्ला आहे असे म्हणतात पण परभणी जिल्ह्याला मंत्रीपद का मिळत नाही. येणाऱ्या विधानसभा निवडणुकीनंतर तरी परभणीला मंत्रिपद मिळणार आहे का असा थेट सवालच या पदाधिकाऱ्यांनी उपस्थित केला. यावेळी तेथे उपस्थित असलेल्या अन्य शिवसेनेच्या पदाधिकाऱ्यांनी देखील या बाबतीत आपला सुर मिसळला. २०१४ साली राज्यात सत्तेवर आलेले महायुतीचे सरकार आणि त्यानंतर महाविकास आघाडीचे सरकार असताना परभणी जिल्ह्याला मंत्रीपद मिळेल अशीच अपेक्षा होती. पण दोन्ही वेळेस परभणीच्या आमदारांना मंत्रिपदाची माळ घातलीच नाही. त्यामुळे परभणी जिल्ह्यातील शिवसैनिकांसह शिवसेनेला मानणारा मतदारही प्रचंड नाराज आहे. शिवसैनिकाची नाराजी पक्ष निरीक्षक खासदार ओमराजे निंबाळकर यांच्यासमोरच पदाधिकाऱ्यांनी मांडली.
जुने साथी पुन्हा परतीच्या वाटेवर, दिलीप सोपल लवकरच तुतारी फुंकणार, विधानसभा लढणार

मंत्रीपद न देऊन परभणी जिल्ह्यावर झालेल्या अन्यायाबाबत शिवसैनिकांनी मांडलेल्या भूमिकेवर खासदार ओमराजे यांनी देखील उत्तर दिले. खासदार ओम राजे म्हणाले की, मला देखील मान्य आहे की परभणी जिल्ह्यावर थोडाफार अन्याय झालेला दिसतो. पण आता एकमेकांचे उणीधुनी काढण्याची वेळ नाही. आता काही दिवसांवर विधानसभेच्या निवडणुका आल्या आहेत. या विधानसभा निवडणुकीमध्ये शिवसेनेच्या पदाधिकाऱ्यांनी भरभरून काम करावे जेणेकरून शिवसेनेचे जास्तीत जास्त उमेदवार निवडून येतील. जेव्हा आपण सत्तेमध्ये जाऊ तेव्हा मी स्वतः उद्धव ठाकरे यांच्याकडे परभणी जिल्ह्याची व्यथा मांडणार आहे. परभणीला मंत्रीपद मिळवून देण्यासाठी मी स्वतः प्रयत्न करणार असल्याचे ओमराजे निंबाळकर म्हणाले.

एकंदरीतच शिवसैनिकांनी आपल्या मनातील खदखद खासदार ओमराजे निंबाळकर यांच्यासमोर व्यक्त केली. ही खतखत केवळ शिवसैनिकांची नसून परभणी जिल्ह्यातील शिवसेनेवर प्रेम करणाऱ्या त्या तमाम नागरिकांची आहे. शिवसेना पक्षश्रेष्ठी या विधानसभा निवडणुकीनंतर याकडे गांभीर्याने घेतील का हे आपल्याला पाहावे लागणार आहे. पण सध्या तरी शिवसैनिकांनी खासदार ओम राजे यांच्यासमोर मांडलेली व्यथा उद्धव ठाकरे यांच्यापर्यंत जाणार हे मात्र नक्की.