रक्षाबंधन सणाच्या पार्श्वभूमीवर ‘लाडक्या बहिणींना’ गुडन्यूज, एकाच दिवशी तीन हजार येणार

म. टा. विशेष प्रतिनिधी, मुंबई : राज्य सरकारची महत्त्वाकांक्षी योजना असलेल्या मुख्यमंत्री माझी लाडकी बहीण योजनेचे पैसे महिलांच्या बँक खात्यात जमा होण्यास बुधवारपासूनच सुरुवात झाली आहे. राज्य सरकारकडून १७ ऑगस्ट रोजी रक्षाबंधन सणाच्या पार्श्वभूमीवर जुलै व ऑगस्ट या दोन महिन्यांचे तीन हजार रुपये एकाच दिवशी जमा होणार असल्याचे सांगण्यात आले आहे. मात्र, १४ ऑगस्ट अर्थात, बुधवारपासूनच ही रक्कम लाभार्थी महिलांच्या बँक खात्यात जमा होण्यास सुरुवात झाली आहे. भाजप आमदार राम सातपुते यांनी ‘एक्स’द्वारे ही माहिती दिली. तसेच त्यांनी महिलांच्या बँक खात्यात रक्कम जमा झाल्याचे स्क्रीनशॉटही जोडले आहेत. दरम्यान, मुख्यमंत्री एकनाथ शिंदे यांनीही यास दुजोरा दिला असून प्रत्यक्ष अंमलबजावणीपूर्वीची ही रंगीत तालीम असून, जमा झालेले हे पैसे परत घेण्यात येणार नसल्याचे स्पष्ट केले.राज्यातील बहिणींना मुख्यमंत्री माझी लाडकी बहीण योजनेचा प्रत्यक्षात लाभ मिळायला सुरुवात झाली आहे. काही दिवसांवर येऊन ठेपलेल्या रक्षाबंधनचे औचित्य साधून स्वातंत्र्यदिनाच्या पूर्वसंध्येला महाराष्ट्रातील बहिणींना मुख्यमंत्री माझी लाडकी बहीण योजनेचा लाभ मिळू लागला आहे. ३१ जुलैपूर्वी अर्ज सादर केलेल्या बहिणींच्या बँक खात्यावर जुलै आणि ऑगस्ट या महिन्यांच्या लाभाची रक्कम, प्रत्येकी तीन हजार रुपये वर्ग करण्यात आले आहेत. ३१ जुलैनंतर अर्ज सादर केलेल्या बहिणींच्या खात्यावरही लवकरच लाभाची रक्कम जमा करण्यात येईल, असेही आमदार सातपुते यांनी एक्सवर म्हटले आहे.
Mumbai Marine Drive: पर्यटकांसह मुंबईकरांची नाराजी, मरिन ड्राइव्हचं सुशोभिकरण रखडलं; कारण….

१.४ कोटी महिलांची नोंदणी पूर्ण

मुख्यमंत्री लाडकी बहीण योजना सुरू होऊन एक महिनाही झालेला नसताना राज्यात १ कोटी ४० लाख महिलांची नोंदणी पूर्ण झाली आहे. शासन-प्रशासनाच्या परिश्रमामुळे हे शक्य झाल्याचे मुख्यमंत्री एकनाथ शिंदे यांनी म्हटले आहे. मुख्यमंत्री माझी लाडकी बहीण योजना सुरू करण्यासाठी सरकारी स्तरावर १० महिन्यांपासून काम सुरू होते. या योजनेसाठी ३३ हजार कोटी रुपयांची तरतूद करण्यात आली असून ती यापुढेही सुरूच राहणार असल्याचे मुख्यमंत्र्यांनी म्हटले आहे. ज्या महिला भगिनींना या दोन महिन्यांचा लाभ मिळाला नाही, त्यांना सप्टेंबरमध्ये एकूण ३ महिन्यांचा लाभ मिळणार असून, त्यांच्या खात्यात साडेचार हजार रुपये जमा होतील, असेही मुख्यमंत्र्यांनी नमूद केले.

‘दिलेला शब्द आम्ही पाळत आहोत’

‘आम्ही याबाबत शब्द दिला असून त्यानुसार पात्र महिलांच्या खात्यात पैसे जमा होतील. त्याची आता सुरुवात झाली आहे. माझ्या लाडक्या बहिणींना मी सांगतोय, की सावत्र भावांपासून सावध राहा,’ असे मुख्यमंत्री म्हणाले. ‘हे पैसे मिळू नयेत यासाठी अपप्रचार झाला, उच्च न्यायालयात याचिका दाखल करण्यात आली; परंतु न्यायालयाने ती फेटाळून लावली. आम्ही जे बोललो ते सुरू झाले असून, १७ ऑगस्टच्या कार्यक्रमाआधी रंगीत तालीम म्हणून हे पैसे जमा करण्यात येत आहेत. हे पैसे परत घेण्यात येणार नाहीत,’ असेही त्यांनी स्पष्ट केले.