पिंपरी चिंचवड पालिका आयुक्तांची गाडी नेत्रहीन तरुणाने फोडली, ध्वजारोहणावेळी प्रकार, कारण काय?

प्रशांत श्रीमंदिलकर, पिंपरी चिंचवड : महापालिका आयुक्त आपली कामं करण्यात वारंवार टाळाटाळ करतात, वेळोवेळी त्रास दिला जातो, आमचं कोणतंही काम केले जात नाही, टपरीवर सतत अतिक्रमण हटवण्याची कारवाई होते, या रागातून एका नेत्रहीन तरुणाने चक्क पिंपरी चिंचवडच्या महापालिका आयुक्तांची गाडीच फोडली. भारताच्या ७८ व्या स्वातंत्र्य दिनी हा प्रकार घडला आहे. महापालिकेत ध्वजारोहण सुरु असताना आयुक्त शेखर सिंह यांचे वाहन अंध व्यक्तीने फोडले. पोलीस या प्रकरणाचा तपास करत असून ताब्यात घेणाऱ्या पोलिसांनी मारहाण केल्याचा आरोपही अंध तरुणाने केला आहे.

अंध तरुणाचं म्हणणं काय?

गेल्या चार वर्षांपासून मी रमाई योजनेअंतर्गत घराची मागणी करत आहे. मात्र ते अद्याप पर्यंत मिळाले नाही. माझ्या टपरीवर महापालिकेकडून अतिक्रमण कारवाई करण्यात आली आहे. अतिक्रमण हटवण्यासाठी आलेल्या माणसांना जाब विचारला असता त्यांनी “शेखर साहेबांनी फक्त अपंगांना त्रास देण्यास सांगितल्याचा” दावा अंध तरुणाने केला आहे. या रागातून त्याने पिंपरी चिंचवड महापालिका आयुक्त शेखर सिंह यांच्या गाडीची तोडफोड केली आहे. महानगर पालिकेत स्वातंत्र्य दिन साजरा केला जात असताना एका अंध व्यक्तीने ही गाडी फोडली आहे. या घटनेने एकच खळबळ उडाली आहे.
Ajit Pawar Mistake : प्रजासत्ताक दिनाच्या शुभेच्छा, अजित दादांची गफलत, चूक लक्षात येताच हसून म्हणाले…
“पिंपरी चिंचवड महापालिकेमध्ये सामान्यांसाठी लोकशाही संपलेली आहे. सध्या फक्त हुकूमशाही सुरु आहे. या अधिकाऱ्यांना लोकशाहीची जाणीव करून देण्यासाठी ही गोष्ट केल्याचे” या अंध व्यक्तीकडून सांगण्यात आले आहे. गाडी फोडल्यानंतर पोलिसांनी आम्हाला ताब्यात घेऊन मारहाण देखील केली असल्याचे या अंध व्यक्तीकडून सांगण्यात आले आहे.

पोलिसांकडून घटनेचा तपास सुरु

दिव्यांग व्यक्तींवर महापालिकेकडून अन्याय होत असल्याच्या रागातून हा प्रकार घडल्याचे प्राथमिक माहितीत समोर येत आहे. या घटनेवेळी संबंधित अंध व्यक्तीसोबत आणखी कोण होते, याचा शोध घेण्याचे काम सुरु आहे. या घटनेचा पुढील तपास करणे सुरु आहे. याबाबात आयुक्तांकडून कोणतीही प्रतिक्रिया देण्यात आलेली नाही.