Tej Police Times
२४ तासांत ८० लाख महिलांच्या खात्यात पैसे जमा; लाडकी बहिण योजनेसाठी १.६२ कोटी महिलांची नोंदणी
म. टा. खास प्रतिनिधी, मुंबई : मुख्यमंत्री माझी लाडकी बहीण योजनेच्या पहिल्या हप्त्याचा लाभ देण्याची प्रक्रिया सुरू झाली आहे. गेल्या २४ तासांत ८० लाखापेक्षा अधिक पात्र महिलांना लाभ देण्यात आला आहे, अशी माहिती महिला व बालविकास मंत्री आदिती तटकरे यांनी दिली. स्वातंत्र्यदिनाच्या पूर्वसंध्येला ३२ लाख, तर स्वातंत्र्यदिनाच्या पहाटे चार वाजता ४८ लाख महिलांच्या बँक खात्यात योजनेचा निधी पोहोचता करण्यात आला.
आतापर्यंत ८० लाख महिलांच्या बँक खात्यात पैसे जमा
याविषयी माहिती देताना महिला व बालविकास मंत्री आदिती तटकरे म्हणाल्या की, १४ ऑगस्टपासूनच योजनेचा लाभ देण्याची प्रक्रिया सुरू झाली आहे. आतापर्यंत राज्यात ८० लाख महिलांच्या बँक खात्यात दोन महिन्यांच्या लाभाची रक्कम, म्हणजेच ३ हजार रुपये जमा करण्यात आली आहे. उर्वरित पात्र महिलांच्या बँक खात्यात सुध्दा १७ ऑगस्टपर्यत योजनेचा निधी जमा होईल, असा विश्वास त्यांनी व्यक्त केला.
महिला व बाल विकास विभागाच्या वतीने मुख्यमंत्री माझी लाडकी बहिण ही योजना जाहीर झाल्यापासून या योजनेला महिलांचा उत्स्फूर्त प्रतिसाद मिळत असून १४ ऑगस्टपर्यत एक कोटी ६२ लाखापेक्षा अधिक महिलांची नोंदणी झाल्याची माहिती विभागाकडून देण्यात आली आहे.
Ganeshotsav 2024: गणेशोत्सवाआधी रस्ते चमकणार, मुख्यमंत्री शिंदेंकडून गणेशभक्तांना ‘टोल फ्री’ गिफ्ट
योजनेच्या प्रसिद्धीसाठी कोट्यवधींचा निधी
राज्यात येत्या काही काळात विधानसभा निवडणूका होणार आहेत. याच निवडणुकांच्या पार्श्वभूमीवर मुख्यमंत्री एकनाथ शिंदे आणि उपमुख्यमंत्री अजित पवार यांच्या सरकारने मुख्यमंत्री लाडकी बहिण योजनेची घोषणा केली. ही योजना जाहीर केल्यापासून या योजनेवरुन अनेक आरोप प्रत्यारोप होत आहेत.
१४ ऑगस्टपासून महिलांना दोन हप्ते मिळू लागले आहेत. या योजनेच्या प्रसिद्धीसाठी महायुती सरकारने कोट्यवधींची तरतूद केली आहे. या योजनेच्या प्रसिद्धीसाठी १९९ कोटी ८१ लाख ४७ हजार ४३६ रुपयांचा निधी मंजूर करण्यात आला आहे. चित्रपटगृह, फोन कॉल, एसटी बस स्टँड, मेट्रो रेल्वे तसंच इतरही महत्वाच्या ठिकाणी माध्यम आराखड्यास महिला व बाल विकास विभागाची मंजुरी मिळाली आहे.