सरला बेटाचे महंत रामगिरी महाराजांनी नको तो विषय काढला, मुस्लिमांचा संताप, गुन्हाही दाखल; जाणून घ्या काय नेमके काय घडले

अहमदनगर (विजयसिंह होलम) : नाशिकच्या सिन्नर तालुक्यातील पंचाळे गावात एका धार्मिक कार्यक्रमात प्रवचन करताना नगर जिल्ह्यातील सरला बेटाचे महंत मठाधिपती रामगिरी महाराज यांनी मुस्लिम धर्मीयांच्या भावना दुखावणारे वक्तव्य केले आहे. मोहंमद पैगंबर यांच्यासंबंधी आक्षेपार्ह विधान केल्याचा व्हिडिओ व्हायरल झाला आहे. त्यावरून मुस्लिम सामाजात संतापाची लाट आली आहे. नाशिक, छत्रपती संभाजीनगरनंतर आज नगर जिल्ह्यातही मुस्लिमांनी आंदोलन केले. नगर शहर व राहाता येथे शुक्रवारी दुपारी शेकडो मुस्लिमांनी रस्त्यावर येत रास्तोरोको केला. राहाता येथे रामगिरी महाराज यांच्याविरोधात गुन्हाही दाखल करण्यात आला आहे.

शहरात शेकडो आंदोलक रस्त्यावर आले. महंत रामगिरी महाराज यांना अटक करण्यात यावी, अशी मागणी आंदोलकांकडून करण्यात आली. छत्रपती संभाजीनगर रस्त्यावरील डीएसपी चौकात मोठा जमाव जमला. काही वेळ तेथे रास्तारोको करण्यात आला. राहाता येथेही आंदोलन झाले. राहाता शहरातील छत्रपती शिवाजी महाराज चौकात कार्यकर्ते जमले. यावेळी जोरदार घोषणाबाजी करण्यात आली. अचानक एवढा मोठा जमाव रस्त्यावर आल्यामुळे पोलिसांचीही धावपळ उडाली. डीवायएसपी शिरीष वमने यांनी बंदोबस्त तैनात केला. धार्मिक भावना दुखावल्या प्रकरणी गुन्हा दाखल करण्यात आला आहे. नागरिकांनी शांतता राखावी, अफवा पसरवणारे प्रक्षोभक मेसेज फॉरवर्ड करु नयेत. गैरसमज करणारे संदेशही पाठवू नयेत, असे आवाहन पोलिसांनी केले.

दरम्यान रामगिरी महाराज आपल्या वक्तव्यावर ठाम आहेत. ते म्हणाले की, जे बोलायचे होतो ते बोललो आहे. सध्या धार्मिक कार्यक्रमांचा सप्ताह सुरू आहे, त्यामुळे यावर काही बोलणार नाही. गुन्हा दाखल झाला असेल तर नोटीस आल्यावर पाहू. आमचा धर्म आणि संस्कृती शांततेच्या मार्गाने चालले आहेत. पण कुणी शांतता भंग करण्याचा प्रयत्न केला तर अशावेळी आपल्याला प्रत्युत्तर देण्याची तयारी ठेवावी लागते. हिंदूंनी मजबूत आणि संघटित राहावे, हा आमचा उद्देश आहे. असंघटितपणामुळे हिंदू समाजाचे नुकसान होत आहे.
J&K and Haryana Election 2024 Date: जम्मू-काश्मीरसह हरियाणा विधानसभा निवडणुकीची घोषणा; जाणून घ्या संपूर्ण वेळापत्रक

दोन समाजात तेढ निर्माण करणाऱ्या एमआयएमच्या नेत्यांवर कारवाई करा

रामगिरी महाराजांच्या वक्तव्यानंतर एमआयएमचे काही नेते तलवारी काढण्याची भाषा करत आहेत. मात्र तलवारी काढण्याची भाषा करणाऱ्यांना आम्ही जशास तसे उत्तर देऊ शकतो. हे नेते दोन समाजात तेढ निर्माण करण्याचे काम करत आहे.राज्यात कायद्याचं राज्य आहे.त्यामुळे त्यांच्यावर कारवाई करण्यासाठी आम्ही शिष्टमंडळासह पोलीस आयुक्तांना निवेदन दिला आहे.