महिलेची विमानात दाम्पत्याला लाथाबुक्क्यांनी मारहाण, कॉन्स्टेबलच्या हाताला चावा अन्…

म. टा. प्रतिनिधी, येरवडा: लोहगाव विमानतळावर ‘इंडिगो’च्या विमानातून पुणे ते दिल्ली प्रवास सुरू होण्यापूर्वी सीटवर बसण्याच्या कारणावरून महिलेने प्रवाशी दाम्पत्याशी वाद घालून लाथाबुक्क्यांनी मारहाण केली. विमान कंपनीने तत्काळ केंद्रीय औद्योगिक दलाच्या जवानांना (सीआयएसएफ) पाचारण केले. विमानातील प्रवाशांची भांडणे सोडविण्यासाठी आलेल्या महिला कॉन्स्टेबलला या महिलेने मारहाण केली; तसेच हाताचा चावा घेतला. यामुळे विमानात एकच गोंधळ उडाला. मारहाण करणाऱ्या महिलेला ‘सीआयएसएफ’ने ताब्यात घेऊन विमानतळ पोलिसांच्या ताब्यात दिले.या प्रकरणी सीआयएसएफच्या महिला कॉन्स्टेबल प्रियांका रेड्डी (वय २६) यांनी तक्रार दिली. त्यावरून सुरेखा सिंह (वय ४४, रा. संतोषनगर, वाकड) या महिलेवर विमानतळ पोलिस ठाण्यात गुन्हा दाखल करण्यात आला आहे.

सीटवर बसण्यावरुन वाद

पोलिसांनी दिलेल्या माहितीनुसार, ‘इंडिगोचे शनिवारी सकाळी पुणे ते दिल्ली विमान होते. आरोपी सुरेखा सिंह शनिवारी दिल्लीला जाण्यासाठी ‘इंडिगो’च्या विमानात आली. त्या वेळी सीटवर बसण्याच्या कारणावरून हिने दोन प्रवाशांशी वाद घालून त्यांना लाथाबुक्क्यांनी मारहाण केली. त्यामुळे विमानात एकच गोंधळ उडाला. त्यामुळे विमान कर्मचाऱ्यांनी तत्काळ कंपनीच्या अधिकाऱ्यांनी माहिती दिली. अधिकाऱ्यांनी ‘सीआयएसएफ’ला पाचारण केले. त्यानंतर दोन महिला कॉन्स्टेबल विमानात दाखल झाल्या. कॉन्स्टेबलनी भांडणे करणाऱ्या महिलेला समजावून सांगण्याचा प्रयत्न केला. त्या वेळी सुरेखा सिंहने त्यांना मारहाण केली; तसेच त्यांच्या हाताचा चावा घेतला.

पोलिसांनी महिलेला बळाचा वापर करून विमानातून खाली उतरवले आणि विमानतळ पोलिसांना या घटनेची माहिती दिली. पोलिसांनी संबंधित महिलेवर गुन्हा दाखल केला

लोहगाव आंतरराष्ट्रीय विमानतळावर ‘इंडिगो’च्या विमानात बेकायदा प्रवेश करून, बनावट तिकीट काढून विमानातून प्रवास करण्याचा प्रयत्न केल्याची घटना गेल्या आठवड्यात घडली होती. त्यामुळे अतिसंवेदशील लोहगाव विमानतळाच्या सुरक्षेचा मुद्दा समोर आला होता. त्यांनतर आता सीटवर बसण्याच्या कारणावरून हाणामारीची घटना घडली. एरवी बस स्थानक आणि रेल्वेत सीट वर बसण्याच्या कारणावरून होणारी हाणामारी आता थेट विमानात सुरू झाल्याने आश्चर्य व्यक्त होत आहे.