अजितदादांच्या बाजूला झोकात उभे, तरी झिशान म्हणतात मी काँग्रेससोबत, माझा पक्ष ठरवणारे फक्त…

मुंबई : उपमुख्यमंत्री अजित पवार यांच्या नेतृत्वातील राष्ट्रवादी कॉंग्रेस पक्षाची जनसन्मान यात्रा आज मुंबईत दाखल झाली आहे. वांद्रे पूर्व ते चेंबूर अणूशक्तीनगर भागात ही यात्रा सुरु आहे. यावेळी माजी मंत्री बाबा सिद्दिकी आणि त्यांचे सुपुत्र असलेले वांद्रे पूर्व विधानसभा मतदारसंघाचे कॉंग्रेस आमदार झिशान सिद्दिकी यांनी अजितदादांचे जोरदार स्वागत केले आहे. यावेळी झिशान सिद्दिकींनी भव्य बाईक रॅलीचे आयोजन केले आहे. विशेष म्हणजे अजित पवार ज्या कारमध्ये उभे आहेत, त्यात झिशान बाजूलाच उभे राहिले होते. त्यामुळे त्यांच्या राष्ट्रवादी प्रवेशाच्या चर्चांना जोर आला आहे. मात्र सिद्दीकी पितापुत्रांनी पक्षप्रवेशाचं वृत्त फेटाळून लावलं.

अजित पवार येथे आले ही आपल्या सौभाग्याची गोष्ट आहे. आज वांद्रे पूर्व येथे अजित दादा त्यांच्या लाडक्या बहिणींना भेटणार आहेत. यावेळी कोणत्याही प्रकारचा पक्षप्रवेश होणार नाही. अजित पवार हे महाराष्ट्राचे उपमुख्यमंत्री आहेत. त्यामुळे एक स्थानिक आमदार या नात्याने मी त्यांचे स्वागत केले, मी कोणत्या पक्षातून निवडणूक लढवायची, याचा फैसला जनता घेईल, असेही झिशान सिद्दीकी म्हणाले. तर बाबा सिद्दीकी यांनीही आधी लेकाच्या पक्षप्रवेशाचं वृत्त फेटाळलं होतं. परंतु अजित पवारांच्या रॅलीत झिशानचा सहभाग काँग्रेसला मान्य होणार का, हा सवाल आता विचारला जात आहे.

Abhijeet Patil : फक्त खेळायला नाही, कुस्ती मारायला आलोय; अभिजित पाटलांचा शड्डू, माढा विधानसभेत रिंगणात उतरणार?
नुकत्याच झालेल्या विधान परिषद निवडणुकीत काँग्रेसच्या सात आमदारांनी क्रॉस व्होटिंग केले होते. गुप्त मतदानामुळे त्या आमदारांची नावं समोर आली नव्हती, परंतु काँग्रेसने सात जणांना ओळखल्याचं बोललं जातं. यात झिशान सिद्दीकींच्या नावाचाही समावेश होता.
Ramdas Kadam vs Ravindra Chavan : तोंड सांभाळून बोला, नाहीतर तोंड फोडू; रामदास कदम यांच्या ‘कुचकामी’ टीकेवर रवींद्र चव्हाण यांचा इशारा

झिशान सिद्दीकी यांचे पिता आणि माजी आमदार बाबा सिद्दीकी यांनी लोकसभा निवडणुकीच्या आधी म्हणजे फेब्रुवारी महिन्यातच काँग्रेसला सोडचिठ्ठी दिली होती. सिद्दीकी ४० वर्षांहून अधिक काळ काँग्रेसमध्ये होते. त्यांनी अजित पवार यांच्या नेतृत्वाखालील राष्ट्रवादी काँग्रेसमध्ये त्यांनी प्रवेश केला. विधानसभा आणि मुंबई महापालिका निवडणुका लक्षात घेता बाबा सिद्दीकी यांच्या रुपाने राष्ट्रवादी काँग्रेसला मुंबईत ताकद मिळण्याची अपेक्षा व्यक्त होत आहे. तेव्हापासूनच झिशान सिद्दीकीही राष्ट्रवादीच्या वाटेवर असल्याची चर्चा होती. मात्र सहा महिने उलटल्यानंतरही ते काँग्रेससोबत आहेत.