Ladki Bahin: माझा सख्खा दादा वारला, पण तुम्ही भावासारखे धावलात, फडणवीसांवर बोलताना ‘लाडकी बहीण’ भावुक

नाशिक : माझ्या भावाचा मृत्यू झाला आहे. त्यामुळे मला सख्खा भाऊ नाही. पण, देवाभाऊ तुम्ही सख्ख्या भावासारखे धावून आलात. त्यामुळे आता तुम्हीच माझे सख्खे भाऊ आहात. ‘तुमच्यासारखा भाऊ जन्मोजन्मी मिळो’, अशा भावना नाशिकमधील लाडक्या बहिणींनी रविवारी उपमुख्यमंत्री देवेंद्र फडणवीस यांच्याबद्दल व्यक्त केल्या. रक्षाबंधनाच्या पूर्वसंध्येला ‘सन्मान स्त्री शक्तीचा’ या कार्यक्रमात राज्यभरातील लाडक्या बहिणींपैकी प्रातिनिधीक स्वरुपात काही बहिणींनी व्हिडीओ कॉन्फरन्सिंगद्वारे उपमुख्यमंत्री देवेंद्र फडणवीस यांच्याशी संवाद साधला. मुंबईत झालेल्या कार्यक्रमाला उपमुख्यमंत्री फडणवीस यांच्यासह आशिष शेलार, प्रवीण दरेकर, चित्रा वाघ, विजया रहाटकर आदी उपस्थित होते. नाशिकमध्येदेखील छत्रपती संभाजीनगर रस्त्यावरील लक्ष्मी लॉन्समध्ये कार्यक्रम घेण्यात आला.

या कार्यक्रमाला आमदार अॅड. राहुल ढिकले, भाजप शहराध्यक्ष प्रशांत जाधव, सुनील केदार, हिमगौरी आडके, रोहिणी नायडू आदी मान्यवरांसह महिला मोठ्या संख्येने उपस्थित होत्या. यावेळी व्हिडीओ कॉन्फरन्सिंगच्या माध्यमातून पंचवटी परिसरातील मानेनगरमधील ज्योती शिंगाडे आणि सिडकोतील भाजीविक्रेत्या लता हाके यांनी फडणवीस यांच्याशी संवाद साधला. ‘मला सख्खा भाऊ नाही. पण, लाडकी बहीण योजनेच्या माध्यमातून तुम्ही सख्ख्या भावाप्रमाणे धावून आलात. तुमच्यासारखा भाऊ जन्मोजन्मी मिळो’ अशी सद्भावना त्यांनी व्यक्त केली. सिडको परिसरात भाजीविक्रीचा व्यवसाय करणाऱ्या लता हाके म्हणाल्या, ‘माझ्या बँक खात्यात सरकारने राखी पौर्णिमेपूर्वी तीन हजार रुपयांची भेट दिल्याने माझ्या कुटुंबात आनंदाचे वातावरण आहे. देवाभाऊ तुम्ही अशीच साथ जन्मोजन्मी द्यावी’अशी अपेक्षा हाके यांनी व्यक्त करीत ‘काजू का स्वाद बातो में नही देवाभाऊसारखा नेता लाखो में नही’ अशी घोषणा दिली. ‘तुमचे आणि आमचे नाते सख्ख्या बहीण भावाप्रमाणेच राहील’, अशी ग्वाही यानिमित्ताने देवेंद्र फडणवीस यांनी दिली.
Devendra Fadnavis: आशीर्वाद द्या, पाच वर्षे पैसे देऊ! उपमुख्यमंत्री फडणवीसांचा लाडक्या बहिणींना शब्द
‘दरमहा पंधराशे रुपये ही आमची गॅरंटी’

मुख्यमंत्री माझी लाडकी बहीण योजनेच्या अंमलबजावणीला सुरुवात झाली असून बहिणींच्या बँक खात्यात पैसे येऊ लागले आहेत. आमच्या विकास निधीला कात्री लावून सरकार बहिणींच्या बँक खात्यामध्ये पैसे टाकत आहे. हे वचन पूर्ण करणारे सरकार असून, या योजनेमुळे बहिणींसोबतचे नाते अधिक दृढ झाले आहे. सरकारला पुन्हा सेवा करण्याची संधी बहिणींनी द्यावी. दरमहा बहिणींच्या बँक खात्यामध्ये १५०० रुपये येतील ही आमची गॅरंटी असल्याची ग्वाही आमदार अॅड. ढिकले यांनी यावेळी दिली. काही सावत्र भाऊ बहिणींकडून ओटीपी मागून त्यांच्या बँक खात्यातून पैसे काढून घेत आहेत. त्यामुळे बहिणींनी सावधानता बाळगावी, असे आवाहन प्रशांत जाधव यांनी केले.