Tej Police Times
काँग्रेसकडे उमेदवारी मागणाऱ्या २१ इच्छुकांची नावं जाहीर, आता चेंडू हायकमांडच्या कोर्टात
म. टा. प्रतिनिधी, पुणे : पुणे जिल्ह्यातील आठ विधानसभा मतदारसंघांमधून काँग्रेसकडून उमेदवारी मागितलेल्या दोन आमदारांसह २१ इच्छुकांची नावे पुणे जिल्हा काँग्रेस कमिटीकडून जाहीर करण्यात आली आहे. यात ‘पुरंदर’मधून आमदार संजय जगताप आणि ‘भोर’मधून संग्राम थोपटे या दोघांनीच उमेदवारी मागितली आहे.
महाराष्ट्र प्रदेश काँग्रेस कमिटीच्या सूचनेनुसार जिल्ह्यातील आठ विधानसभा मतदारसंघांतील इच्छुकांचे अर्ज मागविले होते. जिल्हा काँग्रेस कमिटीकडे आलेले हे अर्ज प्रदेश काँग्रेसकडे पाठवले आहेत. प्रदेश काँग्रेसकडून या अर्जांची छाननी केल्यानंतर ते अर्ज राष्ट्रीय काँग्रेसकडे पाठवण्यात येतील. त्यानंतर उमेदवारीचा निर्णय राष्ट्रीय काँग्रेसकडून जाहीर करण्यात येईल.
जुन्नरमधून सत्यशील सोपानशेठ शेरकर यांनी काँग्रेसकडून उमेदवारी मागितली आहे. महाविकास आघाडीत जुन्नर मतदारसंघ शरदचंद्र पवार राष्ट्रवादी काँग्रेस पक्षाकडे जाण्याची दाट शक्यता आहे. या पार्श्वभूमीवर शेरकर आणि माजी आमदार शरद सोनावणे यांना ‘राष्ट्रवादी’कडून उमेदवारी मिळेल, अशी शक्यता वर्तविण्यात येत आहे.
जुन्नरप्रमाणेच आंबेगाव, शिरूर, मावळ आणि खडकवासलातून काँग्रेसकडे इच्छुक उमेदवार असले, तरी हे मतदारसंघ ‘राष्ट्रवादी’कडे राहतील, अशीच शक्यता आहे. मावळमधून काँग्रेसकडून नऊ इच्छुकांनी उमेदवारी मागितली आहे. जिल्ह्यातील इतर कुठल्याही मतदारसंघांत इतक्या मोठ्या संख्येने उमेदवारी मागितली गेली नाही.
इंदापूर, दौंडमध्ये इच्छुकच नाहीत
इंदापूर आणि दौंड मतदारसंघांतून काँग्रेसकडे कोणीही उमेदवारी मागितलेली नाही. या दोन्ही मतदारसंघांत दोन्ही राष्ट्रवादी काँग्रेस आणि भाजपचे प्राबल्य असल्याने या ठिकाणाहून काँग्रेसकडे कोणीही उमेदवारी मागितलेली नाही. इंदापूर येथील काँग्रेसचे माजी नेते हर्षवर्धन पाटील यांनी भाजपमध्ये प्रवेश केल्यानंतर येथील काँग्रेसचे प्राबल्य संपुष्टात आले आहे.
Congress MLA joins NCP : मातोश्रीचं अंगण, अजितदादांचा सुरुंग आणि ‘हाता’ला झटका, काँग्रेस आमदार घड्याळ बांधण्याच्या तयारीत
राज्यसभेसाठीही उमेदवारी अर्ज
दुसरीकडे, आगामी राज्यसभा निवडणुकीत काँग्रेसचे ज्येष्ठ नेते व प्रख्यात विधीज्ञ अभिषेक मनु सिंघवी हे तेलंगण राज्यातून उमेदवारी अर्ज दाखल करणार आहेत. यापूर्वी गेल्या वर्षी त्यांनी हिमाचल प्रदेशातून राज्यसभेसाठी नशीब आजमावले होते. त्यात त्यांना यश मिळू शकले नव्हते.
तेलंगणमध्ये काँग्रसेचे सरकार आहे. मुख्यमंत्री ए. रेवंथा रेड्डी, त्यांचे मंत्री सहकारी, तेलंगणातील पक्षाच्या प्रभारी दीपा दास मुन्सी यांनी सिंघवी यांच्यासोबत तेलंगणातील सत्ताधारी काँग्रेस विधिमंडळ पक्षाने रविवारी रात्री राज्यसभेच्या पोटनिवडणुकीसाठी सिंघवी यांच्या उमेदवारीवर शिक्कामोर्तब केले. बैठकीनंतर मुख्यमंत्री आणि काँग्रेस प्रदेशाध्यक्ष रेवंत रेड्डी म्हणाले की, बैठकीत सिंघवी यांची काँग्रेस आमदार आणि खासदार यांच्याशी ओळख कून देण्यात आली. सिंघवी म्हणाले, की तेलंगणातील राज्यसभेच्या पोटनिवडणुकीसाठी पक्षाचे उमेदवार म्हणून नामांकन मिळणे हा त्यांच्यासाठी सन्मान आहे.