Tej Police Times
पिशवी अन् विळा बनले ढाल; कृषिकन्येचे वर्षभरानंतर पुन्हा बिबट्याशी दोन हात, सिन्नरमधील घटना
नाशिकरोड: बिबट्याशी मानवाशी संघर्ष नवा नाही. मात्र, एकाच व्यक्तीशी एकाच ठिकाणी वर्षभराच्या अंतराने दुसऱ्यांदा बिबट्याशी संघर्ष होण्याचा प्रसंग एका महिलेवर ओढवला आहे. ही घटना जोगलटेंभी (ता. सिन्नर) येथे रविवारी सकाळी साडेअकराला घडली. मात्र, बिबट्याच्या या दोन्हीही हल्ल्यांत दोन हात करण्याचे धैर्य दाखवून आपला जीव वाचवल्याने या शेतकरी महिलेचे परिसरात कौतुक होत आहे.
नेमकं काय घडलं?
संगीता लक्ष्मण काळे (वय ५०) असे या लढाऊ कृषिकन्येचे नाव असून, रविवारी झालेल्या बिबट्याच्या हल्ल्यात संगीता काळे जखमी झाल्या आहेत. संगीता काळे ही शेतकरी महिला पती लक्ष्मण काळे आणि काही शेतमजुरांसोबत रविवारी त्यांच्या शेतातील बांधावरील गवत कापण्यासाठी गेल्या होत्या. सर्व जण सकाळी साडेअकराला शेतातील बांधावरील गवत कापण्याचे काम करीत असताना संगीता काळे यांच्यावर मागून बिबट्याने झेप घेऊन हल्ला केला. हल्ल्यात संगीता काळे यांची पाठ, मान आणि डोक्याला जखमा झाल्या आहेत. या अनपेक्षित हल्ल्यामुळे सुरुवातीला घाबरलेल्या संगीता काळे यांनी मदतीसाठी आरडाओरड केली आणि हातातील विळ्याचे प्रहार बिबट्याच्या जबड्यावर केले. संगीता यांच्याकडून झालेल्या प्रतिकारामुळे बिबट्याचा आवेश कमी झाला. तोपर्यंत आजूबाजूला गवत कापणारे लक्ष्मण काळे, संदीप काळे मदतीला धावून आल्याने बिबट्याने जवळच्याच उसाच्या शेतात धूम ठोकली. बिबट्याच्या हल्ल्याची माहिती मिळताच सिन्नर विभागातील वन विभागाचे वनरक्षक संजय गिते पथकासह घटनास्थळी दाखल झाले. त्यांनी परिसरात बिबट्याचा शोध घेतला. या वेळी शेतकऱ्यांनी परिसरात बिबट्याचा बंदोबस्त करण्यासाठी पिंजरा लावण्यासाठी मागणी केली.
गेल्या वर्षी पिशवीची केली होती ढाल !
गेल्या वर्षी २५ ऑगस्ट रोजी याच शेतात बिबट्याने संगीता काळे यांच्यावर हल्ला केला होता. या वेळी संगीता शेतात निंदणीचे काम करण्यासाठी गेल्या होत्या. शेतीकाम आटोपून घरी येत असताना बिबट्याने त्यांच्यावर हल्ला केला. या वेळी संगीता यांनी हातातील पिशवीत असलेल्या जेवणाच्या डब्याची ढाल बनविली. हातातील पिशवी गोफणीसारखी फिरवून बिबट्यावर प्रतिहल्ला चढवल्याने बिबट्याने पळ काढला होता. बिबट्याच्या हल्ल्याच्या या दोन्हीही घटनांचा संगीता काळे यांनी धैर्याने सामना केल्यानेच त्यांचे प्राण वाचू शकले.