Badlapur News: बदलापुरात आंदोलनाला हिंसक वळण, आंदोलक संतप्त, नागरिकांकडून शाळेची तोडफोड

ठाणे (बदलापूर) : मुंबईमधील बदलापूरमध्ये एका नमांकित शाळेत झालेल्या संतापजनक घटनेबाबत आज जनता रस्त्यावर उतरली आहे. जनतेकडून तीव्र निदर्शने सुरु आहेत. आज बदलापूर बंदची हाक देण्यात आली आहे. त्याचदरम्यान, ज्या शाळेत ही घटना घडली होती. त्या शाळेत आता तोडफोड सुरु करण्यात आली आहे. या शाळेची तोडफोड करण्यामध्ये महिला आंदोलकही सहभागी आहेत. त्याचदरम्यान, आंदोलनकर्त्यांनी बदलापूर रेल्वे स्टेशन येथे दगडफेक सुरु केली आहे.या दगडफेकीत काही महिलांना दुखापत झाली आहे. तसेच काही पोलीसही जखमी झाले आहेत. दरम्यान, या आंदोलनाला आता हिंसक वळण लागत आहे. शाळेच्या आत काही आंदोलक शिरले आहेत. पोलिसांकडून शाळेमध्ये अश्रूधुराच्या नळकांड्या फोडल्या आहेत. बदलापुरात या घटेनमुळे अतिशय उद्रेक झाला आहे. पोलिसांना आंदोलनकर्त्यांना समजावण्याचा प्रयत्न केलाय. मात्र, आंदोलक हे ऐकण्याच्या भुमिकेत दिसत नाहीय. शाळा परिसरात आता आंदोलकांची धरपकड सुरु झाली आहे.
Breaking News : बदलापूर रेल्वे ट्रॅकवरून आंदोलकांना हटविण्याचा प्रयत्न, पोलिसांवर दगडफेक

मागील तीन तासांपासून उपनगरीय वाहतूक खोळंबली आहे. त्यामुळे बऱ्याच प्रवाशांना याचा त्रास होत आहे. सकाळी साडेनऊ वाजेपासून बदलापूर ते कर्जत दरम्यान लोकल सेवा ठप्प झाली आहे. बदलापूर रेल्वे स्थानकावर देखील पोलिसांवर दगडफेक करण्यात आली आहे. शाळा प्रशासनात्या विरोधात पालक तसेच आंदोलक आक्रमक झाले आहेत.

देवेंद्र फडणवीसांकडून SIT गठित करण्याचे आदेश

बदलापूर येथील दुर्दैवी घटनेची चौकशी करण्यासाठी उपमुख्यमंत्री देवेंद्र फडणवीस यांनी पोलिस महानिरीक्षक दर्जाच्या वरिष्ठ IPS अधिकारी आरती सिंग यांच्या अध्यक्षतेखाली SIT गठित करण्याचे आदेश दिले आहेत. दोषींवर कठोरातील कठोर कारवाई करण्यासाठी, हा खटला जलदगती न्यायालयात चालविण्यासाठी आजच प्रस्ताव सादर करण्याचे आदेश ठाणे पोलिस आयुक्तांना सुद्धा त्यांनी दिले आहेत.

सर्व शाळांमध्ये विशाखा समिती स्थापन

बदलापूरच्या कुळगाव येथील शाळेत अल्पवयीन विद्यार्थिनींवर झालेल्या लैंगिक अत्याचाराविरोधात बदलापूरात उद्रेक उसळल्यावर सरकारला जाग आली आहे. आता कॅार्पोरेट कार्यालयांच्या धर्तीवर सर्व शाळांमध्येही विशाखा समिती स्थापन होणार आहे. यात नववी-दहावीच्या विद्यार्थिनी प्रतिनिधी असतील, अशी घोषणा शालेय शिक्षणमंत्री दीपक केसरकर यांनी केली. तसेच या प्रकरणी तक्रार दाखल करण्यात दिरंगाई करणाऱ्या पोलीस निरीक्षकांना निलंबित करावे, अशी मागणीही आपण गृहमंत्र्यांकडे करणार असल्याचे केसरकर यांनी स्पष्ट केले. या प्रकरणातील शाळेत सीसीटीव्ही चालू अवस्थेत नसल्याचे आढळले आहे. त्यावरही कारवाई होईल, असेही केसरकर म्हणाले.