अश्लिल व्हिडिओ दाखवत शिक्षकाकडून सहा विद्यार्थीनींचा विनयभंग, अकोल्यातील संतापजनक घटना

अक्षय गवळी, अकोला : बदलापुरच्या शाळेत लैगिंक अत्याचारानंतर शहरात संतप्त नागरिकांनी आंदोलन करत रेलरोका केला. आरोपीला फाशीची शिक्षा देण्याच्या घोषणा करण्यात आल्या. हे प्रकरण निवळत नाही, तोपर्यंत अकोला जिल्ह्यातल्या बाळापूर तालुक्यात हा संतापजनक प्रकार समोर आला आहे. तालुक्यातल्या काजीखेड येथे जिल्हा परिषदेच्या उच्च माध्यमिक शाळेत एका शिक्षकाने अश्लिल व्हिडिओ दाखवत सहा विद्यार्थीनींचा छळ केल्याची घटना समोर आली आहे. ही खळबळजनक घटना आज मंगळवारी संध्याकाळी उघडकीस आली. याप्रकाराने जिल्हाभरात सर्वत्र संताप व्यक्त होत आहे.

काजीखेड येथे जिल्हा परिषदच्या उच्च माध्यमिक शाळेतील प्रमोद सरदार नावाच्या शिक्षकाने मुलींच्या असहाय्यतेचा फायदा घेत आठव्या वर्गात शिकणाऱ्या विद्यार्थीनींना अश्लिल व्हिडिओ दाखवत त्यांचा छळ केल्याचा आरोप या शिक्षकावर आहे. चित्रफित दाखवत असताना त्याने मुलींना वाईट पद्धतीने स्पर्श करत अश्लिल संभाषण केले. हा प्रकार मागील चार महिन्यांपासून सुरू असल्याचा आरोप या शिक्षकांवर विद्यार्थीनींनी केला आहे.
Who is Akshay Shinde : कोण आहे अक्षय शिंदे, ज्या नराधमाने बदलापुरात चिमुकल्यांसोबत केलं दृष्कृत्य
आज मंगळवारी पीडित विद्यार्थिनींनी या घटनेसंदर्भात पालकांना सांगितल्यानंतर त्यांना धक्का बसला आहे. त्यानंतर संतप्त झालेल्या पालकांनी उरळ पोलिसांकडे धाव घेत शिक्षकांविरोधात तक्रार दाखल केली. या प्रकरणी उरळ पोलिसांनी शिक्षकाच्या विरोधात गुन्हा दाखल करण्याची प्रक्रिया सुरू केली आहे. दरम्यान विद्यार्थिनीचा विनयभंग करणारा शिक्षक प्रमोद सरदार याला पोलिसांनी ताब्यात घेतले आहे. दरम्यान या संपूर्ण प्रकारावर राज्य महिला आयोगाच्या माजी सदस्य आशा मिरगे यांनी या शिक्षकांवर कठोर कारवाईची मागणी केली आहे.
Raj Thackeray : संताप आणणारा प्रकार, गुन्हा दाखल करुन घेण्यातच पोलिसांनी १२ तास का लावले? राज ठाकरेंचा सवाल

दरम्यान, बदलापुरात दोन चिमुकलींवर लैंगिक अत्याचार केल्यानंतर शहरात आंदोलनाला हिंसक वळण लागलं. तब्बल दहा तास रेल्वे सेवा बंद होती. त्यामुळे रेल्वे रुळावर उतरलेल्या आंदोलकांना पांगवण्यासाठी पोलिसांनी लाठीचार्ज करण्यात आला. दुसरीकडे पुण्यातही धक्कादायक घटना समोर आली. १५ ऑगस्ट रोजी शाळेतील एका १९ वर्षीय मुलाने सातवीत शिकणाऱ्या अल्पवयीन मुलीवर अत्याचार केला. आरोपी शाळेतील विद्यार्थी आहे. एकामागे एक घडलेल्या या घटनांनी राज्यभरात संताप व्यक्त होत आहे.