Tej Police Times
दादाने माझे कपडे काढले नि… घाबरलेल्या चिमुकलीने पालकांना सांगितलं, बदलापूर प्रकरणी FIR मध्ये काय?
बदलापूर : बदलापुरमध्ये दोन चिमुकलींवर शाळेतील सफाई कर्मचाऱ्याने लैंगिक अत्याचार केल्याचा धक्कादायक प्रकार उघडकीस आला. चिमुकलीने शूच्या जागी मुंग्या आल्यासारखं होत असल्याचं सांगितल्यानंतर पालकांनी खोलवर चौकशी केली आणि भयंकर प्रकार समोर आला. पालकांनी मुलीला डॉक्टरकडे नेलं असता, संपूर्ण प्रकार उघड झाला. आपल्या लेकीसोबत धक्कादायक प्रकार घडल्याचं समोर आल्यानंतर पालकांनी पोलीस तक्रार करण्यासाठी पोलीस स्टेशन गाठलं, मात्र त्यांची लैंगिक अत्याचाराची तक्रार दाखल करुन घेण्यास पोलिसांनी तब्बल १२ तास लावले. तसंच शाळा प्रशासनानेही याप्रकरणाकडे दुर्लक्ष केलं.
आरोपीविरोधात पोलीस तसंच शाळेकडूनही कोणतीही दखल घेतली न गेल्याने शहरात संतापाची लाट उसळली. नागरिक आरोपीला फाशीची शिक्षा व्हावी यासाठी रस्त्यावर उतरले, तीव्र आंदोलन केलं. आता याप्रकरणी एफआयआरमध्ये नेमकं काय नोंदवण्यात आलं, याबाबत माहिती समोर आली आहे.
दोन चिमुकल्यांवर एकाच आरोपीने लैंगिक अत्याचार केले. १३ ऑगस्ट रोजी ही घटना सकाळी ९ ते १२ च्या दरम्यान घडली होती. चिमुकलीने तिच्या पालकांना दादाने तिचे कपडे काढल्याचं सांगितलं. तसंच तिच्या गुप्तांगाला स्पर्श केल्याचं चिमुकली म्हणाली. या प्रकरणानंतर चिमुकली अतिशय घाबरलेल्या अवस्थेत होती. दुसऱ्या चिमुकलीवरही अत्याचार केल्याचं समोर आलं. या मुली शाळेत जाण्यासाठी नकार देत होत्या.
याप्रकरणी १६ ऑगस्ट रोजी पालक पोलीस तक्रार दाखल करण्यासाठी पोहोचले होते. मात्र तब्बल १२ तासांनी १२ ऑगस्टच्या रात्री ९ वाजता त्यांची तक्रार दाखल करुन घेण्यात आली. पालकांनी एफआयआरमध्ये शाळेतील शिपाई, सफाई कर्मचारी म्हणून काम करत असलेल्या आरोपीने मुलीवर लैंगिक अत्याचार केल्याचं एफआयआरमध्ये म्हटलं आहे.
२४ वर्षीय आरोपी अक्षय शिंदेला अटक करण्यात आली असून त्याला २६ ऑगस्टपर्यंत पोलीस कोठडी देण्यात आली आहे. या आरोपीसाठी कोणत्या वकीलाने वकीलपत्र घेऊ नये, अशी मागणी करण्यात आली आहे. तसंच आरोपीला फाशीच्या शिक्षेची मागणी संतप्त नागरिकांकडून होत आहे. तसंच सरकारी वकील उज्ज्वल निकम चिमुकलीला न्याय देण्यासाठी लढणार आहेत. २४ ऑगस्ट रोजी महाराष्ट्र बंदची हाक देण्यात आली आहे.