महाराष्ट्रातला तरुण गुजरातमध्ये डिलिव्हरी बॉय; कुटुंबातील एकमेव कमावता, तरुणावर काळाचा घाला

महेश पाटील, नंदुरबार : महाराष्ट्रातला रहिवासी असलेल्या तरुणाला हाताला काम नाही. त्यामुळे तो जवळील गुजरात राज्यात कुरिअर कंपनीत डिलिव्हरी बॉय म्हणून काम करत होता. तो घरातील एकमेव कमवता पुरुष होता. मात्र काळाने या तरुणाला हिरावून घेतलं आहे. नवापूरहून आपल्या गावी परतताना धुळे सुरत राष्ट्रीय महामार्गावर नवी सावरट गावाजवळील पेट्रोल पंपसमोर भीषण अपघात झाला. ट्रकने दुचाकीचा भीषण धडक दिली. या अपघातात दुचाकीस्वार तरुणाचा मृत्यू झाल्याची घटना घडली आहे. १९ ऑगस्ट रोजी, सोमवार संध्याकाळी ७:३० वाजेच्या सुमारास हा अपघात झाला.

नवापूर तालुक्यातील आमलाण कोकणीफळी येथील रहिवासी रवींद्र दयलु कोकणी (वय ३६) हे गुजरात राज्यातील उच्छल इथे एका कुरिअर कंपनीत डिलिव्हरी बॉय म्हणून काम करत होते. ते घरातील एकमेव कमावणारे होते. रवींद्र कोकणी हे क्र. एम. एच.३९, एस. ८८६१ या दुचाकीने नवापूर कडून विसरवाडीकडे जात होते. महामार्गावर एकता हॉटेल जवळ पेट्रोल पंपा समोरील रस्त्यावर विसरवाडीहून नवापूरच्या दिशेने जाणाऱ्या ट्रकने (क्र. एम.एच.२३, ए. आर. ५९००) दुचाकीला धडक दिली. या अपघातात तरुणाचा मृत्यू झाला.
Dhule News : फिरायला गेले, पाण्यात उड्या; अंदाज चुकला आणि…तरुणाचा लळींग धबधब्यात बुडून मृत्यू
अपघातादरम्यान दुचाकीस्वार रवींद्र कोकणी यांच्या डोक्याला आणि हाताला गंभीर दुखापती झाली होती. अपघातानंतर राष्ट्रीय महामार्गावर काही काळ वाहतूक विस्कळीत झाली होती. घटनेची माहिती मिळताच स्थानिक ग्रामस्थ आणि चिंचपाडा दूरक्षेत्र केंद्राचे पोलीस घटनास्थळी दाखल झाले होते. अपघातात जखमी झालेल्या रवींद्र कोकणी यांना नवापूर उपजिल्हा रुग्णालयात उपचारासाठी दाखल केले. मात्र वैद्यकीय अधिकाऱ्यांनी त्यांना मृत घोषित केलं.

या अपघाताची नवापूर पोलीस ठाण्यात नोंद करण्यात आली आहे. पुढील तपास सहाय्यक पोलिस उपनिरीक्षक प्रमोद वंजारी करत आहेत. या घटनेत त्यांचा अपघाती मृत्यू झाल्याची माहिती मिळताच नातेवाईक, मित्रपरिवार त्या ठिकाणी दाखल झाले. परिसरात रवींद्र कोकणी यांच्या अपघाती मृत्यूमुळे सर्वत्र हळहळ व्यक्त करण्यात येत आहे.