Tej Police Times, The first and leading Marathi news web portal of Maharashtra, provides the hard core news to Maharashtrians in their own language. It also has a varied programming mix having Politics, Sports, Entertainment news coverage
१० वर्षांच्या चिमुकलीची हत्या, बदलापूरची घटना ताजी असताना कोल्हापुरात धक्कादायक घटना
नयन यादवाड, कोल्हापूर : बदलापूरमध्ये चार वर्षांच्या चिमुकलीवर लैंगिक अत्याचार केल्याची घटना ताजी असतानाच कोल्हापुरात धक्कादायक घटना समोर आली आहे. दहा वर्षांच्या मुलीची हत्या झाल्याची खळबळजनक माहिती समोर आली आहे. कोल्हापूरच्या शिये गावातील राम नगर परिसरात ही घटना उघडकीस आली आहे. हत्या झालेली मुलगी बुधवारी, २१ ऑगस्टच्या दुपारपासून बेपत्ता होती. त्यानंतर मुलगी बेपत्ता असल्याची तक्रार करण्यात आली होती.
आज गुरुवारी २२ ऑगस्ट रोजी मुलीची हत्या झाल्याची माहिती समोर आली आहे. मुलीवर अत्याचार करुन तिची हत्या केल्याचा संशय स्थानिकांनी व्यक्त केला आहे. याप्रकरणी एका संशयिताला पोलिसांनी ताब्यात घेतलं असून पोलीस पुढील तपास करत आहेत.
१० वर्षीय मुलीच्या हत्येप्रकरणी बोलताना पोलीस अधिक्षक महेंद्र पंडित यांनी दिलेल्या माहितीनुसार, शिरोली एमआयडीसी हद्दीमध्ये रामनगर इथे तीन वर्षांपूर्वी बिहारमधून स्थलांतरित झालेलं कुटुंब राहतं. गुड्डू सिंह अग्रहरी असं या कुटुंबातील प्रमुखाचं नाव आहे. गुड्डू सिंह आणि त्यांची पत्नी दोघंही एमआयडीसी कंपनीत मजूर म्हणून काम करतात. बुधवारी सकाळी ८ वाजता दोघंही कामाला गेले. त्यांच्या घरात मुलांचा मामाही सोबत राहतो. त्यांना तीन मुली आणि दोन मुलं अशी एकूण पाच मुलं आहेत.
या मुलीचे आई – वडील शिरोली औद्योगिक वसाहतीमधील एका खासगी कंपनीत कामाला जातात. बुधवारी सायंकाळी ते कामावरुन घरी आल्यानंतर त्यांना मुलगी कुठेही दिसली नाही. त्यांनी तात्काळ आजूबाजूला तसंच नातेवाईकांकडे तिचा शोध घेतला. तरीही ती कुठेही दिसली नाही. मुलीच्या मामाला विचारणा केली असता त्याने सांगितलं, की मुलीने दुपारी जेवण केलं आणि ती मोबाईल घेऊन बसली होती. त्यानंतर मला कामावर जायचं असल्याने मी झोपलो. मात्र त्यानंतर ती मोबाईल ठेवून कधी घरातून निघाली हे माहित नसल्याचं त्याने सांगितलं. मुलगी बुधवारी दुपारपासून घरातून गायब झाली होती.
Badlapur Assault Case FIR : दादाने माझे कपडे काढले नि… घाबरलेल्या चिमुकलीने पालकांना सांगितलं, बदलापूर प्रकरणी FIR मध्ये काय?
शिये रामनगर येथील १० वर्षीय परप्रांतीय मुलगी गायब झाल्यानंतर तिच्या नातेवाईकांनी बुधवारी रात्री शिरोली पोलिसांत तक्रार दिली होती. त्यानंतर पोलिसांनी स्थानिक रहिवाशांसोबत शिये रामनगर परिसरातील सीसीटीव्ही कॅमेरे आणि परिसातील शेतातील विहिरी, ओढे, ऊसाच्या शेतात देखील तपास केला होता. पण कोणताच सुगावा पोलिसांच्या हाती लागला नव्हता. सकाळी चार वाजेपर्यंत पोलीस तपास घेत होते.
नंतर कोल्हापूर पोलिसांच्या श्वान पथकाने अल्पवयीन मुलीचा मृतदेह रामनगर येथील एका उसाच्या शेतामध्ये घरापासून अवघ्या अर्धा किलोमीटर परिसरात शोधून काढला. यावेळी प्राथमिक माहितीनुसार संबंधित मुलीच्या अंगावर ड्रेस होता, मात्र चप्पल आणि अंतर्वस्त्र बाजूला पडलेली पाहायला मिळाली. पोलिसांनी तपास सुरू केला असून सीसीटीव्हीच्या आधारे एका संशयीताला ताब्यात घेतलं आहे. दरम्यान स्थानिक नागरिकांनी मुलीवर अत्याचार झाल्याचा संशय देखील व्यक्त केला आहे. मुलीचा मृतदेह उत्तरीय तपासणीसाठी पाठवला असून ही तपासणी झाल्यानंतरच निष्कर्ष काढता येईल असं पोलीस अधीक्षकांनी सांगितलं आहे. फॉरेन्सिक टीमला बोलावून पुढील तपास सुरू आहे.
दरम्यान, ठाणे जिल्ह्यातील बदलापूरमध्ये चिमुकलीवर अत्याचार झाल्यानंतर शहरातील जनता रस्त्यावर उतरली होती. शहरात बंद पाळत तीव्र आंदोलन करण्यात आलं होतं. चिमुकलीवर दुष्कृत्य करणाऱ्या आरोपीला फाशीची शिक्षणा व्हावी यासाठी घटना घडली त्या शाळेसमोर तसंच, बदलापूरच्या रेल्वे ट्रॅकवर आंदोलन करण्यात आलं होतं. तब्बल १० तास रेलरोको करण्यात आला होता. ही घटना ताजी असतानाच कोल्हापूर चिमुकलीच्या हत्येने हादरलं आहे.