Tej Police Times, The first and leading Marathi news web portal of Maharashtra, provides the hard core news to Maharashtrians in their own language. It also has a varied programming mix having Politics, Sports, Entertainment news coverage
Maharashtra Election 2024 : महाविकास आघाडीत बिघाडी ? मुख्यमंत्रिपदासंदर्भात ठाकरे गटाची मोठी मागणी
मुंबई : आगामी विधानसभा निवडणुकीला काही दिवसच शिल्लक राहिले आहेत. सर्वच राजकीय पक्षांकडून या संदर्भातील तयारी सुरू करण्यात आली आहे. राज्यातील विविध मतदारसंघांवर पक्षांकडून दावे प्रतिदावे सुरू झाले आहे. तसेच महायुती आणि महाविकासआघाडी या दोन्ही आघाड्यांकडून मुख्यमंत्री पदाचा चेहरा कोण असेल? याबाबतची चर्चा सुरू झाली आहे. अशातच आता महाविकास आघाडीमध्ये मुख्यमंत्रिपदावरून वाद होण्याची शक्यता वर्तवण्यात आली आहे. विधानसभा निवडणुकीपूर्वी किमान चार भिंतीच्या आड तरी मुख्यमंत्रीपदाचा चेहरा ठरवण्यात यावा, शिवसेना ठाकरे गटाने मागणी केली आहे. ठाकरे गटाच्या या मागणीमुळे महाविकास आघाडीत बिघाडी होण्याची शक्यता आहे.
उद्धव ठाकरे यांनी केली होती घोषणा
16 ऑगस्ट रोजी षण्मुखानंद सभागृहात महाविकास आघाडीचा निर्धार मेळावा पार पडला. या मेळाव्यात उद्धव ठाकरे यांनी कॉंग्रेस आणि शरद पवारांच्या राष्ट्रवादीला मुख्यमंत्रीपदाचा चेहरा जाहीर करण्याचे आवाहन केलं होतं. परंतु दोन्ही पक्षांनी त्याला उत्तर दिलं नाही. यावरून ठाकरे गट नाराज झाल्याची माहिती आहे. त्यामुळे आता किमान चार भिंतीच्या आड तरी मुख्यमंत्रीपदाचा चेहरा ठरवण्यात यावा, शिवसेना ठाकरे गटाने मागणी केली आहे.
लोकसभेची लढाई हे देशाचे संविधान वाचवण्यासाठी होते. आता विधानसभेची महाराष्ट्र धर्म, महाराष्ट्र संस्कृती वाचवायची आहे. महाविकास आघाडीच्या दूतांनी गावागावात जावून आपल्या कामांचा प्रचार करावा. असं उद्धव ठाकरे म्हणाले होते.
उद्धव ठाकरेंना मुख्यमंत्री म्हणून पसंती
ठाकरे गटाचे खासदार संजय राऊत यांनी देखील महाविकास आघाडीकडून उद्धव ठाकरे मुख्यमंत्री असतील याबाबतचे संकेत दिले होते. मुख्यमंत्रिपदाचा चेहरा जाहीर केल्याशिवाय निवडणुकीला सामोरं जाणं धोक्याचं ठरू शकतं. असे संजय राऊत म्हणाले होते. उद्धव ठाकरे हे महाराष्ट्राचे मुख्यमंत्री होते त्यांचे काम जनतेने पाहिले आहे. असं संजय राऊत म्हणाले.
दरम्यान, नुकत्याच झालेल्या लोकसभा निवडणुकीत उद्धव ठाकरे यांच्याकडे पाहून महाविकास आघाडीला मतं मिळाली आहेत. त्यामुळे राज्यात जर महाविकास आघाडीचे सरकार आले तर उद्धव ठाकरेच पुन्हा मुख्यमंत्री होऊ शकतात अशी चर्चा सुरू आहे.