Tej Police Times
दहा दिवसांत मुंबई होणार खड्डेमुक्त; गणरायाच्या आगमनासाठी BMCकडून जोरदार तयारी
मुंबई:गणेशोत्सव सुरू होण्यापूर्वी मुंबई खड्डेमुक्त होण्याची सुचिन्हे आहेत. महापालिकेने येत्या दहा दिवसांत युद्धपातळीवर रस्तेकामे करून सर्व रस्त्यांवरील खड्डे बुजवण्याचे आदेश दिले आहेत. यानुसार रस्त्यांची दुरुस्ती हाती घेतली जाणार असून, त्यासाठी मास्टिक पद्धतीचा वापर केला जाणार आहे.
गणेश आगमनापूर्वी रस्त्यांवरील खड्डे बुजवण्याची कार्यवाही युद्धपातळीवर करावी, दुरुस्तीयोग्य रस्त्यांची डागडुजी करावी, असे स्पष्ट निर्देश मुंबई महापालिका आयुक्त भूषण गगराणी यांनी दिले आहेत. या निर्देशांच्या काटेकोर अंमलबजावणीसाठी अतिरिक्त महापालिका आयुक्त (प्रकल्प) अभिजीत बांगर यांनी गुरुवारी महापालिका मुख्यालयात रस्ते विभागातील अभियंत्यांची बैठक घेतली. यावेळी प्रमुख अभियंता (रस्ते) गिरीश निकम उपस्थित होते. गणेशोत्सवादरम्यान रस्त्यासंबंधित कोणत्याही समस्येला नागरिकांना सामोरे जावे लागू नये, यासाठी उपाययोजनांवर यावेळी चर्चा झाली.
रस्ते नादुरुस्त होण्याची शक्यता
महापालिकेच्या रस्ते आणि वाहतूक विभागामार्फत खड्डेमुक्त रस्त्यांसाठी एकूण २२७ प्रभागांसाठी प्रत्येकी एक याप्रमाणे दुय्यम अभियंत्यांची नेमणूक करण्यात आली आहे. हे अभियंते आपल्या विभागात दररोज रस्त्यांची प्रत्यक्ष पाहणी करून खड्डे आढळल्यास ते मास्टिक पद्धतीने तत्काळ बुजवत आहेत. आता दुय्यम अभियंत्यांसोबतच सहायक अभियंता, कार्यकारी अभियंता आणि उपप्रमुख अभियंता यांनीही स्वत: रस्त्यांची पाहणी करावी, असे निर्देश बांगर यांनी बैठकीत दिले. दहा दिवसांत खड्डे दुरुस्तीची कार्यवाही पूर्ण करायची असली तरीही गणेश विसर्जनापर्यंत पुन्हा जोरदार पावसाने हजेरी लावल्यास रस्ते नादुरुस्त होण्याची शक्यता आहे. या पार्श्वभूमीवर सर्व यंत्रणांना दक्षतेच्या सूचना देण्यात आल्या आहेत.
बळीराजाचे होत आहेत हाल;८२ हजार शेतकरी पीककर्जापासून वंचित….
मास्टिक मिश्रणाचाच वापर
खड्डे दुरुस्तीसाठी मास्टिक मिश्रण पद्धतीचा अवलंब करण्यात आला असून, त्याचे सकारात्मक परिणाम दिसून आले आहेत. त्यामुळे मास्टिक पद्धतीनेच रस्ते दुरुस्ती करण्याचे आदेश देण्यात आले आहेत. सर्व विभागातील मास्टिक कुकर हे सुस्थितीत आणि वापरासाठी उपलब्ध असावेत, त्यांची खातरजमा विभागीय पातळीवर करावी, कंत्राटदारांकडून मास्टिकची वेळेत व पुरेशी उपलब्धता होईल, याकडे लक्ष द्यावे, अशा सूचनाही बैठकीत करण्यात आल्या.