Tej Police Times
विरोधकांना चारी मुंड्या चित करणारे खासदार वसंतराव चव्हाण मात्र मृत्यूच्या झुंजीत हरले…!
अर्जुन राठोड, नांदेड : माजी मुख्यमंत्री अशोक चव्हाण भाजपावासी झाल्यानंतर जिल्ह्यातील काँग्रेसवर अवकळा आली होती. लोकसभेची उमेदवारी घेण्यासाठी कुणीही पुढे धजावत नव्हते. काँग्रेस पक्षाच्या पडत्या काळात लोकसभेची उमेदवारी कोण घेणार असा यक्ष प्रश्न असताना वसंतराव चव्हाण यांनी जनतेच्या मतरुपी आशीर्वादाच्या बळावर विरोधकांना चारीमुंड्या चित केले आणि नांदेडची निवडणूक देशात गाजवली. विरोधकांशी झुंज देऊन यशस्वी ठरलेले खासदार वसंतराव चव्हाण हे मात्र मृत्यूच्या झुंजीत हरले. सोमवारी पहाटे त्यांचे हैदराबाद येथील किम्स हॉस्पिटलमध्ये उपचारादरम्यान मृत्यू झाला. सरपंच ते खासदार असा त्यांचा प्रवास होता. त्यांच्या जाण्याने संपूर्ण नांदेड जिल्ह्यावर शोककळा पसरली, शिवाय काँग्रेसला मोठा धक्का बसला.
नांदेड लोकसभा निवडणुकीपूर्वी काँग्रेसचे माजी मुख्यमंत्री अशोक चव्हाण यांनी भाजपमध्ये प्रवेश केला होता. अशोक चव्हाण यांच्या प्रवेशामुळे काँग्रेस पक्षाची जिल्ह्यात पडझड झाली. अनेक नेते कार्यकर्ते पदाधिकारी यांचा ओढा भाजपकडे वाहत असताना काँग्रेसचा कसा टिकाव लागणार? उमेदवार कोण असणार? असे अनेक प्रश्न विचारले जात होते. काँग्रेस पक्षाने अनुभवी नेते म्हणून वसंतराव चव्हाण यांना लोकसभेच्या रिंगणात उतरवले होते.
अशोकराव भाजपमध्ये गेले पण वसंतरावांनी काँग्रेसचा गड राखला!
एकीकडे लोकसभा निवडणुकीत भाजपने मोठी ताकद लावत प्रताप पाटील चिखलीकर यांच्या प्रचारासाठी पंतप्रधान नरेंद्र मोदी, गृहमंत्री अमित शहा, नितीन गडकरी, देवेंद्र फडणवीस यांच्यासह अनेक दिग्गज नेत्यांच्या सभा घेतल्या. दुसरीकडे काँग्रेसकडून केंद्रातील एकाही बड्या नेत्याची सभा झाली नाही. सोपी वाटणारी निवडणूक काँग्रेसच्या राज्य पातळीवरील नेत्यांनी चुरशीची केली होती. अंतिम टप्प्यात ही निवडणूक अटीतटीची होईल, असा अंदाज राजकीय जाणकारही लावत होते. पण वसंतराव चव्हाण यांनी तब्बल ५९ हजार इतक्या मताधिक्याने लोकसभा निवडणुकीत विजय मिळवला. त्यांचा हा विजय देशात लक्षवेधी ठरला.
Vasant Chavan: ”आज मी सच्चा मित्र गमावला”, वसंत चव्हाण यांच्या निधनाने प्रताप पाटील चिखलीकर हळहळले
काँग्रेसचे ते अधिवेशन शेवटचे ठरले
वसंतराव चव्हाण यांना प्रकृती अस्वास्थ्यामुळे नियमित उपचार घ्यावे लागत होते. अशातच ११ ऑगस्ट रोजी नांदेडमध्ये आगामी विधानसभा निवडणुकीच्या अनुषंगाने काँग्रेसची विभागीय बैठक पार पडली होती. काँग्रेसचे राज्याचे प्रभारी चेन्नीथला, प्रदेशाध्यक्ष नाना पटोले, विरोधी पक्षनेते वडेट्टीवार यांच्यासह काँग्रेसचे राज्याचे दिग्गज नेते या बैठकीला उपस्थित होते. बैठकीचे नियोजन आणि धावपळीमुळे खासदार वसंतराव चव्हाण यांची दगदग झाली होती. १३ ऑगस्ट रोजी त्यांना श्वसनाचा त्रास होत असल्याने एअर अॅब्युलन्सने हैद्राबादला रवाना करण्यात आले होते. दोन आठवडे त्यांच्यावर हैदराबाद येथील रुग्णालयात उपचार सुरू होते. मात्र त्यांची मृत्यूशी झुंज अपयशी ठरली. सोमवारी सकाळी उपचारादरम्यान त्यांची प्राणज्योत मालवली.
काँग्रेसचे बडे नेते अंत्यविधीला उपस्थित राहणार
वसंत चव्हाण यांचे पार्थिव सोमवारी दुपारी त्यांच्या मूळगावी म्हणजेच नायगाव शहरात दाखल झाले. यावेळी कुटुंबियासह नातेवाईकांना अश्रू अनावर झाले होते. मंगळवारी २७ ऑगस्ट रोजी सकाळी ११ वाजता नायगावमध्ये त्यांच्यावर शासकीय इतमामात अंतिम संस्कार करण्यात येणार आहेत. ज्या ठिकाणी त्यांच्या वडिलांची समाधी आहे, त्याच बाजूला अंत्यसंस्कार केले जाणार आहेत. अंत्यसंस्काराला विरोधी पक्षनेते विजय वडेट्टीवार, काँग्रेस प्रदेशाध्यक्ष नाना पटोले , बाळासाहेब थोरात आदी नेते येणार आहेत. त्यांच्या निधनाने काँग्रेस पक्षाला मोठा धक्का बसला आहे.