Tej Police Times
Latur : लातूर हादरलं! ७० वर्षीय महिलेवर आधी ४ दिवस अत्याचार, नंतर केला खून
लातूर : मागील काही दिवसांपासून महाराष्ट्रात एकानंतर एक विकृत मनोवृत्तीच्या घटना घडण्याचं सत्र काही केल्या थांबण्याचे नाव घेत नाही. अशातच एक धक्कादायक घटना लातूरमधून समोर आली आहे. एका ३१ वर्षीय व्यक्तीने ७० वर्षीय महिलेवर चार दिवस बलात्कार करून तिचा खून केल्याची घटना घडली आहे. सदर घटना लातूर जिल्ह्यातील भेटा या गावात घडली आहे. या घटनेतील आरोपीला भादा पोलिसांनी अटक केली असून पुढील तपास करत आहेत.
नेमकं काय घडलं ?
मन्सूर सादिक होगाडे (वय 31 वर्ष) असं आरोपीचं नाव असून तो भेटा येथे शेतमजूर म्हणून काम करत होता. बायकोबरोबर पटत नसल्याने बायको आणि मुलगा त्याला सोडून लातूरला राहत होते. तो आईबरोबर भेटा येथील घरी राहत होता. त्याची आई काही दिवसांपूर्वी पुण्याला गेली होती. त्यानंतर त्याची आई पुण्यावरून परत आल्यानंतर घरातील दृश्य बघून तिला धक्का बसला. सत्तर वर्षाची एक महिला घरात मृत अवस्थेत कपाटाला बांधून ठेवण्यात आली होती. भीतीने थरकाप उडालेल्या मन्सूरच्या आईने गावातील काही लोकांना घटना सांगितली. गावातील लोकांनी तात्काळ भादा पोलीस स्टेशनला संपर्क केला. भादा औसा आणि लातूर या ठिकाणावरून पोलिसांची पथके भेटा या गावात दाखल झाली. महिलेचा मृतदेह उत्तरीय तपासणीसाठी भादा येथील प्राथमिक आरोग्य केंद्रात पाठवण्यात आला आहे.
मृत महिलेचे नाव अनुसया पांढरे असून ती ७० वर्षाची आहे. अनुसया या मूळच्या बोरगाव येथील रहिवासी होत्या. छोटी मोठी काम करून त्या आपला उदरनिर्वाह करत होत्या. शुक्रवारपासूनच ती गायब होती. घटनेतील आरोपीला तात्काळ अटक करण्यात आली आहे. मन्सूर हा हिस्ट्री सीटर गुन्हेगार आहे असून त्याच्यावर मोबाईल शॉपी फोडणे, दुचाकी चोरणे, सोयाबीन चोरणे अशा स्वरूपाची गुन्हे दाखल आहेत.
दरम्यान, काही दिवसांपूर्वी बदलापूरमध्ये घडलेल्या घटनेमुळे अवघा देश हादरून गेला आहे. अशातच राज्यातील अनेक भागांमधून अत्याचाराच्या घटना समोर येऊ लागल्या आहेत.