Jitendra Awhad Audio Clip : राज ठाकरेंनीच माझा आवाज काढला, व्हायरल क्लिपवरून जितेंद्र आव्हाडांचा गंभीर आरोप

मुंबई : राष्ट्रवादी कॉंग्रेस शरदचंद्र पवार आणि मनसे या दोन्ही पक्षांमध्ये वाद होण्याची शक्यता आहे. राष्ट्रवादी कॉंग्रेस शरदचंद्र पवार पक्षाचे आमदार जितेंद्र आव्हाड यांची एक ऑडिओ क्लिप सध्या सोशल मिडियावर प्रचंड व्हायरल होत आहे. या क्लिपवरुन मनसे आणि जितेंद्र आव्हाड यांच्यात जुंपली आहे. मनसेचे नेते संदीप देशपांडे यांनी ऑडिओ क्लिप ट्विट केली आहे. या वरून जितेंद्र आव्हाड संतप्त झाले असून त्यांनी थेट राज ठाकरे यांच्यावर हल्लाबोल केला आहे.

ऑडिओ क्लिप ४ वर्षापूर्वीची आहे

आमदार जितेंद्र आव्हाड म्हणाले की, ” व्हायरल झालेली ऑडिओ क्लिप ४ वर्षांपूर्वीची असल्याचे बोलले जाते. त्यामुळे आता तुम्ही चार-पाच वर्षांपूर्वीच्या ऑडिओ क्लिप काढून चालवणार असाल तर अशा खूप साऱ्या क्लिप मिळतील. आता सुपारी घ्यायचीच म्हटल्यावर सुपारी घेणारच ना. तुमचं नावच सुपारी ठाकरे आहे.” असं म्हणत जितेंद्र आव्हाड यांनी राज ठाकरेंवर हल्लाबोल केला आहे.
बलात्कार करणाऱ्याचा सत्कार होत असेल तर…; महिला अत्याचारांवरुन खासदार प्रणिती शिंदे कडाडल्या

राज ठाकरेंनी माझा आवाज काढला

जितेंद्र आव्हाड पुढे म्हणाले की, ” राज ठाकरे बदलापूरला का गेले नाही? माणुसकीच्या नात्याने त्यांनी २४ तासांच्या आत पोहोचायला हवं होतं. मराठी मनाचा अभिमान असणाऱ्या राज ठाकरे यांचा हात त्या मुलीच्या आणि तिच्या बापाच्या डोक्यावरून फिरायला हवा होता. परंतु ते माझ्या विरोधात प्रेस कॉन्फरन्स घेत आहेत. मी जर म्हणालो की हा माझा आवाजच नाही तर हे लोक काय तपासायला जाणार आहेत? हा माझा आवाज नाही तो राज ठाकरे यांनीच काढला असेल. ते कोणाचाही आवाज काढतात. ते मोठे मिमिक्री आर्टिस्ट आहेत”. असं जितेंद्र आव्हाड म्हणाले.

दरम्यान, या ऑडिओ क्लिपमध्ये जितेंद्र आव्हाड हे मल्लिकार्जुन पुजारी यांच्याशी संवाद साधताना दिसत आहेत. जाऊ दे, मरु दे तिला, तू कशाला बदनाम होतो? असा संवाद यात ऐकायला मिळाला आहे. त्यामुळे जितेंद्र आव्हाड आणि मनसेच्या आरोप प्रत्यारोपांमुळे दोन्ही पक्षांमध्ये मोठा वाद होण्याची शक्यता आहे.