महिन्याच्या पहिल्याच दिवशी ग्राहकांच्या खिशाला कात्री, तर चेतन पाटीलला पोलीस कोठडी

१. सप्टेंबरमध्ये महाराष्ट्रासह देशाच्या बहुतांश भागांत सरासरीपेक्षा जास्त पावसाची शक्यता भारतीय हवामानशास्त्र विभागाने (आयएमडी) वर्तवली आहे. पुढील दोन आठवड्यांत लागोपाठ कमी दाबाच्या क्षेत्रांची शक्यता असल्याने मान्सूनचा परतीचा प्रवास काहीसा उशिरा सुरू होऊ शकतो, असे ‘आयएमडी’ने म्हटले आहे. बातमी वाचा सविस्तर…

२. सिंधुदुर्ग जिल्ह्यातील मालवणच्या राजकोट किल्ल्यावरील छत्रपती शिवाजी महाराज यांचा पुतळा कोसळण्याच्या घटनेवरून आक्रमक झालेल्या महाविकास आघाडीतर्फे महायुतीविरोधात आज, रविवारी ‘जोडे मारो’ आंदोलन करण्यात येणार आहे. या आंदोलनात शिवसेनेचे उद्धव ठाकरे, राष्ट्रवादीचे शरद पवार आणि काँग्रेसचे नाना पटोले आदी नेते सहभागी होणार आहेत.

३. ‘आगामी विधानसभा निवडणूक गांभीर्याने घ्या, कुठलीही हलगर्जी करू नका. हलगर्जीची किंमत आपण लोकसभा निवडणुकीत मोजली. कुठलेही वागणे, बोलणे चुकीचे झाले, तर त्याची जबरदस्त किंमत पक्षाला मोजावी लागेल,’ असा इशारा राष्ट्रवादी काँग्रेसचे राष्ट्रीय अध्यक्ष अजित पवार यांनी दिला.

४. कोकणात सिंधुदुर्ग जिल्ह्यात मालवण राजकोट येथे छत्रपती शिवाजी महाराजांचा पुतळा उभारताना कन्सल्टंट म्हणून काम करणारा चेतन पाटील याला पोलिसांनी मालवण न्यायालयात हजर केल्यानंतर न्यायालयाने ५ सप्टेंबरपर्यंत पोलीस कोठडी सुनावली आहे. बातमी वाचा सविस्तर…

५. राज्यात महिला आणि मुलींवरील अत्याचाराच्या घटना दिवसेंदिवस वाढत चालल्या आहेत. आता रायगडमध्ये अशीच एक धक्कादायक घटना घडली आहे. येथे एका तरुणीने शेजाऱ्याच्या त्रासाला कंटाळून आत्महत्या करण्याचा प्रयत्न केल्याची धक्कादायक घटना घडली आहे. महाड एमआयडीसी पोलीस ठाण्याच्या हद्दीत ही घटना घडली आहे. या तरुणीने हाताची नस कापून आत्महत्येचा प्रयत्न केल्याची माहिती आहे. सध्या तिची प्रकृती गंभीर असल्याचं सांगितलं जात आहे.

६. आजपासून सप्टेंबर महिना सुरू झाला आहे आणि १ सप्टेंबर २०२४ रोजी पहाटे एलपीजी गॅस सिलिंडरवर महागाईचा (एलपीजी दरवाढ) धक्का बसला आहे. ऑगस्टनंतर सप्टेंबरमध्ये पुन्हा एकदा तेल विपणन कंपन्यांनी एलपीजी सिलिंडरच्या दरात वाढ केली आहे. मात्र, यावेळी १९ किलोच्या व्यावसायिक एलपीजी गॅस सिलिंडरच्या दरातही बदल झाला आहे, तर १४ किलोच्या घरगुती गॅस सिलिंडरच्या किमतीत बदल झाला आहे. रविवार १ पासून मुंबईत व्यावसायिक एलपीजी सिलिंडर ७ रुपयांनी महाग झाला आहे. बातमी वाचा सविस्तर…

७. हवामानातील अनुकूल घडामोडींमुळे यंदाच्या ऑगस्टमध्ये पुण्यामध्ये दहा वर्षांतील सर्वाधिक पावसाची नोंद झाली. पावसाळी हंगामात सलग तिसऱ्या महिन्यात पुणे शहरात सरासरीपेक्षा जवळपास दुप्पट पाऊस पडला. ऑगस्ट महिन्यात शहरात २७९ मिलिमीटर पावसाची नोंद झाली आहे. घाटमाथा, जिल्हा आणि धरणक्षेत्रांतही समाधानकारक पाऊस पडल्याने धरणेही पूर्ण क्षमतेने भरली.

८. किनाऱ्यावरून जहाजांना वीजपुरवठा करण्यासाठी बंदर प्राधिकरणाकडून जोमाने प्रयत्न सुरू आहेत. याअंतर्गत मुंबई बंदर प्राधिकरणाने प्रायोगिक तत्त्वावर स्वत:च्या बोटींसाठी ही सेवा सुरू केली आहे. तर, जवाहरलाल नेहरू बंदर प्राधिकरणही (जेएनपीए) यासाठी प्रयत्नरत आहे. यामुळे समुद्रात किनाऱ्याजवळ होणारे डिझेलचे प्रदूषण नियंत्रणात येऊ शकेल.

९. बिग बॉस मराठीचं पाचवं पर्व अल्पावधीतच लोकप्रिय झालं आहे. बिग बॉसचा पाचवा आठवडा सरत आला आणि आता सदस्यांचे खरे चेहरे दिसू लागले आहेत. बिग बॉसच्या घरात पहिल्या दिवसापासून दोन टीम तयार झाल्या होत्या. मात्र, आता या दोन्ही टीममध्ये फूट पडली असून निक्की विरुद्ध इतर सदस्य असा खेळ पाहायला मिळतो आहे. अशातच काल भाऊच्या धक्क्यावर रितेश देशमुखने याच मुद्द्याला अनुसरून घरातील सदस्यांची कानउघडणी केलीच त्याचबरोबर अरबाजचा खरा चेहरासुद्धा सर्वांसमोर आणला.

१०. ठाणे एक्सप्रेसमध्ये बसण्याच्या जागेवरून झालेल्या वादाला वेगळे वळण लागून, गोमांस बाळगल्याचा आरोप करत एक ज्येष्ठ व्यक्तीस मारहाण झाल्याची घटना नुकतीच घडली असून या प्रकरणी ठाणे रेल्वे पोलिस ठाण्यात पाच ते सहा जणांविरुद्ध विविध कलमांतर्गत गुन्हा दाखल झाला आहे. या प्रकरणी धुळ्याहून तिघांना ताब्यात घेतले असल्याची माहिती रेल्वे पोलिसांनी दिली.