MH Election 2024 : भाजपच्या राहुल कुल यांचं टेन्शन वाढलं, दौंडच्या जागेवर अजित पवार गटाचा दावा

वीरधवल जगदाळे यांच्याकडून दावा

उपमुख्यमंत्री तसेच राष्ट्रवादी कॉंग्रेसचे अध्यक्ष अजित पवार यांचे निकटवर्तीय म्हणून वीरधवल जगदाळे यांची ओळख आहे. वीरधवल जगदाळे हे दौंड साखर कारखान्याचे संचालक असून त्यांनी दौंड विधानसभा मतदार संघावर दावा केला आहे. भाजपचे नेते राहुल कुल यांचा हा मतदारसंघ आहे . परंतु अशातच आता जगदाळे यांनी केलेल्या मागणीमुळे भाजप आणि अजित पवारांच्या राष्ट्रवादीमध्ये वाद होण्याची शक्यता आहे.

बारामती लोकसभेला सुनेत्रा पवार यांनी निवडणूक लढवावी अशी पहिली मागणी वीरधवल जगदाळे यांनी केली होती. आणि ती मागणी मान्य देखील झाली होती.
दौंड विधानसभेची जागा राष्ट्रवादी पक्षाकडे गेल्यास आमदार राहुल कुल यांना मोठा राजकीय धक्का बसण्याची शक्यता वर्तवण्यात आली आहे.

इंदापूरमध्ये ही नाराजीचा सुर

दरम्यान, भाजपचे नेते माजी मंत्री हर्षवर्धन पाटील यांनी इंदापूरमधून निवडणूक लढवण्याची तयारी सुरू केली आहे. परंतु या जागेवर देखील अजित पवारांकडून दावा करण्यात आला आहे. इंदापूरचे आमदार दत्तात्रय भरणे यांनाच पुन्हा उमेदवारी मिळणार असल्याची चर्चा सुरू आहे. यावरून हर्षवर्धन पाटील यांच्यामध्ये नाराजी तयार झाली आहे. तीन चार दिवसांपूर्वी हर्षवर्धनल पाटील यांनी शरद पवारांची भेट घेतली होती. या भेटीवरून ते शरद पवार गटात प्रवेश करणार असल्याच्या चर्चा सुरू झाल्या आहे. देवेंद्र फडणवीस यांनी लवकरात लवकर इंदापूरच्या जागेचा निर्णय घ्यावा असं म्हणत हर्षवर्धन पाटील यांनी आपल्या निर्णयाचा चेंडू देवेंद्र फडणीस यांच्या कोर्टात टोलावला आहे. इंदापूरचा तिढा अद्याप सुटलेला नसतानाच दौंडच्या जागेवरून महायुतीमध्ये वाद होण्याची शक्यता वर्तवण्यात आली आहे.