मेहंदी क्लास संपवून घरी जात होती, भरधाव कारने चिरडलं, मालाडमध्ये २७ वर्षीय महिलेचा मृत्यू

या घटनेने परिसरात एकच खळबळ माजली असून नागरिकांनी कारचालकाला बेदम मारहाण केली. यामुळे कारचालकही जखमी झाल्याची माहिती आहे. तर त्याच्या कारचीही तोडफोड केल्याचं दिसून आलं.

मेहंदी क्लास संपवून घरी परतत असताना भरधाव कारची धडक

मिळालेल्या माहितीनुसार, २७ वर्षीय महिला शहाना काझी या मेहंदी क्लास संपवून घरी परतत होती. तेव्हा तिच्यासोबत ही भयानक घटना घडली. मंगळवारी रात्री उशिरा ही घटना घडल्याची माहिती आहे. मेहंदी क्लास संपवून ती घरी परतत असताना एका आलीशान भरधाव कारने तिला जोरदार धडक दिली. त्यानंतरही तो थंबला नाही तर महिलेला डिव्हायडरपर्यंत फरपटत नेलं. अपघात घडताच परिसरातील नागरिकांनी तात्काळ धाव घेतली. त्यानंतर प्रत्यक्षदर्शी आणि कार चालकाने महिलेला रुग्णालयात दाखल केले, पण उपचारापूर्वीच महिलेचा मृत्यू झाला होता.

कारचालकाला नागरिकांकडून बेदम मारहाण

महिलेच्या मृत्यूनंतर नागरिकांमध्ये संतापाची लाट उसळली आणि त्यांनी कारचालकाला बेदम मारहाण केली. त्यानंतर त्याला पोलिसांच्या हवाली करण्यात आले. नागरिकांनी मारहाण केल्याने कारचालकही गंभीररित्या जखमी झाल्याची माहिती आहे. कारचावक हा मर्चंट नेव्हीमध्ये सेवेला असल्याची माहिती आहे. सध्या पोलीस याप्रकरणाचा तपास करत आहेत. पोलिसांनी कारचालकाला ताब्यात घेतलं आहे.

गाडी चालवत असताना चालक शुद्धीत होता की मद्यधुंद अवस्थेत होता हे अद्याप स्पष्ट झालेलं नाही. मालाड पोलिसांनी चालकाचे रक्ताचे नमुने तपासणीसाठी पाठवले आहेत. त्याचा अहवाल आल्यानंतरच याबाबतची माहिती मिळेल. पण, या घटनेने महिलेच्या कुटुंबीयांवर दु:खाचा डोंगर कोसळला आहे.