छत्रपती शिवेंद्रराजे भोसले रेस्क्यू टीमचे सदस्य संतोष पवार यांचा अपघाती मृत्यू

संतोष पवार यांना सामाजिक कार्याची आवड असल्याने ते गेली १० वर्ष छत्रपती शिवेंद्रराजे रेस्क्यू टीमचे सदस्य होते. रेस्क्यू टीम करीत असताना त्यांनी अनेक जणांचे जीव वाचवले होते. रेस्क्यू टीमच्या एका जवानाचा मृत्यू झाल्याने रेस्क्यू टीममध्ये मोठी पोकळी निर्माण झाली आहे. त्यांच्या या अकाली मृत्यूमुळे सर्वत्र हळहळ व्यक्त होत आहे. ते पाखरू नावाने मित्रपरिवारात परिचित होते. रुग्णवाहिका सेवा देताना रुग्णाकडे पैसे असो अथवा नसो ते जनसेवा म्हणून काम करत होते. रुग्णांच्या अडचणी जाणून घेऊन ते नेहमीच मदतीला धावणारे रुग्णवाहिका चालक म्हणून ते प्रसिद्ध होते. त्यांच्या या स्वभावामुळे मोठा मित्रपरिवार होता. त्यांच्या पश्चात आई-वडील, पत्नी, दोन लहान मुले आहेत. पवार यांच्या वडिलांचा रुग्णवाहिका सेवा देण्याचा व्यवसाय आहे. संगम माऊली येथील कैलास स्मशानभूमीत त्यांच्यावर दुपारी अंत्यसंस्कार करण्यात आले. या घटनेची नोंद सातारा तालुका पोलीस ठाण्यात झाली आहे.