Pune Porsche Car Update : आधी निबंध लिहून जामीन, नंतर रक्ताचे नमुने बदलले; आता पोर्श कार प्रकरणात मोठी अपडेट

‘मद्याच्या नशेत असलेल्या आरोपी अल्पवयीन मुलांना वाचवण्यासाठी त्यांच्या पालकांनी ससून रुग्णालयातील डॉक्टरांना लाच देऊन मुलांचे रक्ताचे नमुने अन्य व्यक्तींच्या नमुन्यांसोबत बदलले आणि त्यामुळे आरोपी मुलांनी मद्यप्राशन केले नसल्याचे विश्लेषण अहवालात समोर आले’, असा आरोप आहे. पोलिसांनी या संपूर्ण कटाबद्दल अरुणकुमार सिंग यांच्याबरोबरच मद्याच्या नशेत पोर्शे कार चालवणाऱ्या मुख्य अल्पवयीन आरोपीच्या पालकांना, डॉक्टरांना व अन्य अनेकांना आरोपी केले आहे. पोलिसांनी अन्य आरोपींना अटक केली असताना अरुणकुमार फरार होते. त्यांनी अटक टाळण्यासाठी पुण्यातील सेशन्स कोर्टात केलेला अर्ज ९ सप्टेंबर रोजी फेटाळण्यात आला होता. त्यानंतर त्यांनी हायकोर्टात अर्ज केला होता. त्याविषयीच्या सुनावणीअंती न्यायमूर्ती मनीष पितळे यांनी बुधवारी त्यांचा अर्ज फेटाळून लावला. त्यामुळे अरुणकुमार सिंग यांच्यावर आता अटकेची टांगती तलवार आहे.
Thane News : ठाण्यात हिट अँड रन, कारने दुचाकीस्वाराला उडवले; तरुणाचा मृत्यू, आरोपी वाहनचालक घटनास्थळावरुन फरार
१९ मे रोजीच्या पहाटे मद्याच्या नशेत भरधाव कार चालवून अनीश अवधिया व अश्विनी कोष्ठ यांच्या मृत्यूसाठी कारणीभूत ठरलेल्या अल्पवयीन मुलाला बालन्यायमंडळाने केवळ रस्ते सुरक्षेवर निबंध लेखनासह अन्य अटी घालून जामीन मंजूर केल्याने मोठा वाद निर्माण झाला होता.

त्या अपघातग्रस्त कारमध्ये अरुणकुमार यांचा अल्पवयीन मुलगा हा मागच्या आसनावर बसला होता. त्यांनी अन्य आरोपींसह डॉक्टरांशी संगनमत करून त्याचे रक्ताचे नमुने आशिष मित्तल नावाच्या व्यक्तीच्या रक्ताच्या नमुन्यासोबत बदलले. ‘रक्ताचा नमुना म्हणजे कागदपत्र नाही. त्यामुळे कागदपत्राच्या फसवणुकीचा गुन्हा लागू होत नाही’, अशा स्वरुपाचा युक्तिवाद अरुणकुमार यांच्यातर्फे करण्यात आला.

तर ‘अरुणकुमार यांनी आशिष मित्तल या सहआरोपीच्या रक्ताच्या नमुन्याच्या लेबलवर आपल्या अल्पवयीन मुलाचे नाव लावले. त्यामुळे ते पूर्ण कटाचा भाग आहेत आणि त्यांनी लबाडी करून महत्त्वाच्या कागदपत्राविषयी फसवणूक करण्यात सहभाग घेतल्याचे स्पष्ट दिसते’, असा युक्तिवाद विशेष सरकारी वकील शिशिर हिरे यांनी मांडला. न्यायमूर्तींनी हिरे यांचा युक्तिवाद ग्राह्य धरला. तसेच अरुणकुमार यांच्याविरोधात प्रथमदर्शनी गुन्हा स्पष्ट होत असल्याने अर्ज फेटाळत असल्याचे आदेशात स्पष्ट केले.