काँग्रेसवर उमेदवार बदलण्याची वेळ; राजू लाटकर यांना विरोध झाल्याने मधुरीमाराजे छत्रपतीना उमेदवारी

मधुरिमा राजे छत्रपती यांच नाव जाहीर

कोल्हापूर उत्तर विधानसभेच्या रिंगणात महाविकास आघाडी आणि महायुतीकडून उमेदवार कोण असणार याचा प्रश्न निवडून जाहीर झाल्यापासून होता. रविवारी 27 (ऑक्टो) ला शिवसेना शिंदे गटाने माजी आमदार राजेश क्षीरसागर यांची उमेदवारी घोषित झाली. तर दुसरीकडे काँग्रेसने राजेश लाटकर यांना उमेदवारी दिल्याने राजेश विरुद्ध राजेश असा सामना कोल्हापूर उत्तर मध्ये रंगणार होता. मात्र या उमेदवारीवरुन काँग्रेस निष्ठावंत कार्यकर्त्यांनी आणि नगरसेवकांनी उगड-उघड नाराजी व्यक्त दर्शवली. काँग्रेस जिल्हा कार्यालयावर दगडफेक झाली तर 26 नगरसेवकांनी सतेज पाटील यांना पत्र लिहीत हा लादलेला उमेदवार असल्याचा आरोप करत उमेदवार बदलण्याची मागणी केली होती. त्याचबरोबर पक्षाचे सदस्य नसतानाही त्यांना उमेदवारी देण्यात आली आणि निष्ठावंतांना डावलण्यात आले असा आरोप केला होता. यालाच पकडून विरोधात असलेले उमेदवार राजेश क्षीरसागर यांनी देखील काँग्रेसवर जोरदार टीका केली.
भाजपकडून आणखी एक यादी, पण यावेळी स्वत:ची नाही तर मित्रांसाठी सोडल्या इतक्या जागा; आठवलेंना मिळाली एक जागा
कार्यकर्त्यांचा व नगरसेवकांचा रोष पाहता आज सकाळपासून उमेदवार बदलाच्या घडामोडींना वेग आला. आमदार सतेज पाटील यांच्या अजिंक्यतारा कार्यालय तसेच नवीन राजवाडा येथे बैठकांचा सत्र सुरू झाले यामध्ये खासदार शाहू महाराज छत्रपती, मालोजीराजे छत्रपती, मधुरिमा राजे छत्रपती, आमदार सतेज पाटील, सचिन चव्हाण, शारंगधर देशमुख यांच्यासह निष्ठावंत व जुने विश्वासू कार्यकर्ते व पदाधिकाऱ्यांमध्ये दिवसभर झालेल्या घडामोडीनंतर अखेर आज नऊच्या सुमारास मधुरिमा राजे छत्रपती यांची उमेदवारी घोषित करण्यात आली. मधुरिमा राजे छत्रपती या माजी मंत्री दिग्विजय खानविलकर यांच्या कन्या आणि खासदार शाहू महाराज छत्रपती यांच्या सून आहेत. शिवाय छत्रपती घराण्यात उमेदवारी गेल्याने विरोधकांना देखील आता आरोप प्रत्यारोप करताना मर्यादा ठेवावी लागणार आहे. उद्या सकाळी दहा वाजता ते मोठ शक्ती प्रदर्शन करत आपला उमेदवारी अर्ज भरणार आहेत.
अजितदादांचा कंठ दाटून आला, अश्रू अनावर झाले; पक्ष सोबतच कुटुंबात पडलेल्या फुटी बाबत केले जाहीर भाष्य
नवीन राजवाड्यात वर्षभरात दुसरी उमेदवारी

विधानसभा निवडणुकीत कोल्हापूर उत्तर मधून मधुरिमा राजे छत्रपती यांनी निवडणुकीच्या रिंगणात उतरावे असे काँग्रेस मधून अनेक नगरसेवकांची इच्छा होती. मात्र आपण निवडणूक लढवण्यास इच्छुक नसल्याचे म्हणत नकार दिला तर मालोजीराजे छत्रपती यांनी देखील निवडणूक लढण्यास नकार दिल्याने येथून उमेदवार कोण असणार याच्या चर्चा सुरू होत्या. राजेश लाटकर यांना उमेदवारी जाहीर झाल्यानंतर नगरसेवकांमधून तीव्र नाराजी व्यक्त करण्यात आली. यामुळे मधुरिमाराजे छत्रपती यांना निवडणूक लढण्यास तयार करण्यात आले असून माजी आमदार मालोजीराजे छत्रपती यांनी उद्या दहा वाजता काँग्रेस कडून मधुरीमाराजे छत्रपती उमेदवारी अर्ज दाखल करणार असल्याचे जाहीर केले आहे. तसेच ही उमेदवारी कोणाला शह देण्यासाठी किंवा कमी लेखण्यासाठी झालेले नाही.आम्ही राजेश लाटकर यांची मनधरणी करणार आहोत असेही मालोजीराजे छत्रपती यावेळी म्हणाले आहेत. मधुरिमाराजे छत्रपती यांच्या उमेदवारीमुळे एक वर्षाच्या आतच छत्रपती घराण्यात दुसरी काँग्रेसची उमेदवारी मिळाली आहे.