बंडाळीमुळे इगतपुरीत काँग्रेसपुढे आव्हान; २९ उमेदवारांचे ४३ अर्ज, प्रतिष्ठित पदाधिकाऱ्यांचे अस्तित्व पणाला

इगतपुरी-त्र्यंबकेश्वर या आदिवासी राखीव मतदारसंघात महाविकास आघाडी व महायुतीत बेबनाव झाल्याचे चित्र दिसून आले. महायुतीकडून अजित पवार गटाचे हिरामण खोसकर यांना उमेदवारी असताना शिंदे गटातील इच्छुक माजी आमदार काशिनाथ मेंगाळ यांना अचानक मनसेकडून उमेदवारी मिळाल्याने, तर त्र्यंबकेश्वरचे माजी सभापती रवींद्र भोये यांनी अपक्ष उमेदवारी दाखल केल्याने महायुतीत बंडखोरी झाली. महाविकास आघाडीकडून काँग्रेसला ही जागा असल्याने सर्वाधिक इच्छुक काँग्रेसकडे होते. मात्र, काँग्रेसने बहुतांश इच्छुकांना डावलत लकी जाधव या तरुणाच्या गळ्यात उमेदवारीची माळ घातल्याने अन्य इच्छुकांनी काँग्रेसकडे पाठ फिरवलीच; परंतु, मित्रपक्षांच्या पदाधिकाऱ्यांनीही बंडखोरांना बळ दिल्याचे दिसून आले.
विधानसभेचा रणसंग्राम! राज्यात PM मोदींच्या सलग ८ दिवस सभा; तर अमित शहांच्या २०हून अधिक सभा, कसा असेल दौरा?
शिवसेना ठाकरे गटाच्या उपनेत्या असलेल्या निर्मला गावीत या काँग्रेसकडून इच्छुक होत्या. त्यांनाच उमेदवारी मिळेल अशी चिन्हे असताना त्यांना टाळण्यात आले. त्यामुळे त्यांनी शिवसेना उबाठा गट, काँग्रेस तसेच अपक्ष म्हणून अर्ज दाखल केला. विशेष म्हणजे त्यांची उमेदवारी दाखल करताना शिवसेना उबाठा गटाचे पदाधिकारी उपस्थित होते, तसेच काँग्रेसचेही बहुतांश पदाधिकारी उपस्थित होते. तर, मनसेने ऐनवेळी माजी आमदार काशिनाथ मेंगाळ यांना गळाला लावल्याने त्यांचीही उमेदवारी कायम राहील, अशी स्थिती आहे. त्यामुळे महायुती व महाविकास आघाडी यांच्यापुढे बंडखोरीची डोकेदुखी कायम राहणार आहे. सुरुवातीला खोसकर यांना सहजसोपी वाटणारी निवडणूक आता अवघड वळणावरची वाटू लागली आहे.
बंडखोरांची मनधरणी! बंड शमविण्यासाठी दोन्ही आघाड्यांतील पक्षांचे बैठकसत्र, अपक्ष कुणाला घाम फोडणार?
यांचे अर्ज दाखल
हिरामण भिकाजी खोसकर (राष्ट्रवादी काँग्रेस, अजित पवार गट), अनिता रामदास घारे (अपक्ष), भगवान रामभाऊ मधे (अपक्ष), विकास मोहन शिंगाळे (अपक्ष), उषा हिरामण बेंडकोळी (अपक्ष), गोपाळ दगडू लहांगे (अपक्ष), निर्मला रमेश गावित (अपक्ष), जयप्रकाश शिवराम झोले (अपक्ष), काशिनाथ दगडू मेंगाळ (मनसे), भाऊराव काशिनाथ डगळे (वंचित बहुजन आघाडी), धनाजी अशोक टोपले (बसपा), किशोर अंबादास डगळे (अपक्ष), कांतिलाल किसन जाधव (भारत आदिवासी पार्टी), जीवनकुमार परशराम भोये (अपक्ष), वामन हिरामण खोसकर (अपक्ष), कैलास सदू भांगरे (अपक्ष), लक्ष्मण भिका जाधव,(अपक्ष), रवींद्र तुकाराम भोये (अपक्ष), बिबाबाई हरिश्चंद्र तेलम (बहुजन मुक्ती पार्टी), कावजी गंगाराम ठाकरे (अपक्ष), संदीप रघुनाथ जाधव (अपक्ष), अशोक वाळू गुंबाडे (अपक्ष), अनिल दत्तात्रय गभाले,(जन जनवादी पार्टी), शंकर दशरथ जाधव (अपक्ष), नरेश यशवंत घारे (अपक्ष), शरद मंगलदास तळपाडे (महाराष्ट्र स्वराज्य पक्ष), चंचल प्रभाकर बेंडकोळी (स्वाभिमानी पक्ष), वैभव विजयकुमार ठाकूर (अपक्ष), विष्णू मंगा दोबाडे (अपक्ष).