भाजपचा मुख्यमंत्री होणार; फडणवीसांनी मित्राचं वक्तव्य खोडलं, म्हणाले – राज ठाकरेंचे आभार पण…

राज ठाकरेंचं मुख्यमंत्रीपदाबाबत मोठं वक्तव्य

यासर्वात महाराष्ट्र नवनिर्माण सेनेचे प्रमुख राज ठाकरे यांनी एका कार्यक्रमात याबाबत धक्कादायक वक्तव्य केलं. राज्यात भाजपचं सरकार येणार आणि मुख्यमंत्रीही भाजपचाच असेल, असं ते म्हणाले. यावेळी त्यांचा रोख हा उपमुख्यमंत्री देवेंद्र फडणवीसांकडे होता. त्यामुळे राजकीय वर्तुळात चर्चांना उधाण आलं. याबाबत आता देवेंद्र फडणवीसांनी स्वत: प्रतिक्रिया दिली आहे.
Devendra Fadnavis: माहीमचा प्रश्न कसा सुटणार, चार दिवसात चमत्कार होणार? देवेंद्र फडणवीसांनी मनातलं बोलून दाखवलं

काँग्रेसचे रवी राजा यांचा भाजपात प्रवेश

विधानसभा निवडणुकीच्या तोंडावर भाजपने काँग्रेसला मोठा धक्का दिला. काँग्रेसचे मुंबईतील ज्येष्ठ नेते रवी राजा यांनी काँग्रेसला राम राम करत भाजपचं कमळ हाती घेतलं. त्यांनी आज फडणवीसांच्या उपस्थितीत भाजपात प्रवेश घेतला. या पक्ष प्रवेशानंतर भाजपची पत्रकार परिषद झाली. या पत्रतकार परिषदेत फडणवीसांनी राज ठाकरेंच्या वक्तव्यावर प्रतिक्रिया दिली.

राज ठाकरेंचे आभार पण…, फडणवीस काय म्हणाले?

देवेंद्र फडणवीसांनी प्रतिक्रिया देत म्हटलं की, मी त्यांचा (राज ठाकरे) आभारी आहे. मी त्यांच्या शुभेच्छा अत्यंत आदराने स्विकारतो. पण, राज्यात भाजपचं नाही तर महायुतीचं सरकार येणार. राज्यात मुख्यमंत्रीही महायुतीचाच होणार ही काळ्या दगडावरची पांढरी रेख आहे, असं म्हणत फडणवीसांनी राज ठाकरेंचं वक्तव्य खोडून काढलं आहे.

माहीमच्या प्रश्नावरही फडणवीसांची प्रतिक्रिया

माहीम मतदारसंघात मनसेच्या अमित ठाकरे विरोधात शिंदेंचे सदा सरवणकर असल्याने भाजपसमोर मोठा पेच निर्माण झाला आहे. त्यामुळे फडणवीसांवर यावर तोडगा काढण्याची मोठी जबाबदारी आहे. त्याबाबत बोलताना फडणवीस म्हणाले की, याबाबत चर्चा सुरु आहे. आमचा प्रयत्न हाच आहे की आम्ही सगळे सोबत राहावे.