बंडखोर, गद्दारांना धडा शिकवू! गिरीश महाजन यांचा बंडखोरांसह पक्षातील फुटिरांनाही इशारा

राज्यात महायुतीत कुठेही बंडखोरी होणार नाही. तिकीट वाटपानंतर झालेली नाशिकमधील नाराजी दूर झाली असून, बंडखोर आणि नाराजांशी आपण वैयक्तिक चर्चा केली आहे. त्यामुळे ४ तारखेच्या माघारीनंतर नाराज, बंडखोर महायुतीच्या प्रचारासाठी एकत्रित येतील, असा दावाही त्यांनी केला. विधानसभा मतदारसंघासाठी अर्ज दाखल झाल्यानंतर आता सोमवारी (दि. ४) माघारी होणार आहेत. नाशिक जिल्ह्यात १५ विधानसभा मतदारसंघांमध्ये यंदा महायुतीत मोठ्या प्रमाणावर बंडखोरी झाली आहे. या बंडखोरांची मनधरणी करण्यासह नाराजांशी चर्चा करण्यासाठी महाजन हे स्वत: नाशिकमध्ये तळ ठोकून आहेत. महाजन यांनी नाराज आणि बंडखोरांशी चर्चा केल्यानतंर पत्रकारांशी बोलताना महायुती एकत्र असल्याचा दावा केला. दोन दिवसांत मी प्रत्येकाशी चर्चा केली असून, मागील काळामध्ये झालेला अन्याय व ज्या काही तक्रारी होत्या त्या ऐकून घेतल्या.

पुढील काळामध्ये प्रत्येकाला न्याय देण्याच्या आश्वासन दिले आहे. आता सर्व प्रचारामध्ये सक्रिय होतील. भाजप आमदारांनीही मागील काळात ज्या चुका झाल्या त्या दुरुस्त करून कार्यकर्त्यांना अधिक संधी मिळेल, अशा पद्धतीने कामकाज करावे, अशा सूचना केल्या आहेत. पक्षाला ज्यांनी मोठी पदे दिली त्यांनी गद्दारी केली, याबाबत विचारले असता, त्यांना येत्या काळामध्ये कार्यकर्ते-मतदार जागा दाखवून देतील, असे त्यांनी स्पष्ट केले. लोकसभेवेळी खोटे कथानक सांगितले गेले. त्यामुळे महायुतीला फटका बसला. मात्र, आता परिस्थिती तशी नसून, राज्य सरकारने आणलेल्या चांगल्या योजनांमुळे राज्यात पुन्हा महायुतीचे सरकार येईल आणि महायुतीचाच मुख्यमंत्री होईल, असा दावाही महाजन यांनी केला.

पक्षाच्या उमेदवारांनाच आशीर्वाद
महाजन यांचे निकटवर्तीय नाशिक पूर्वमध्ये गणेश गिते, चांदवडमध्ये केदा आहेर यांनी बंडखोरी केली असून, महाजन यांचा आशीर्वाद असल्याचा दावा करीत आहेत. परंतु, बंडखोरी करणाऱ्यांबाबतही महाजन यांनी स्पष्टीकरण दिले. मी माझ्या आयुष्यात कोणतीही तडजोड केली नाही. माझ्या मतदारसंघांमध्ये गिरीश महाजन येणार नाहीत, माझे बोलणे झाले आहे, असा कोणी अपप्रचार करीत असेल, तर लक्ष देऊ नका. पुढील काळामध्ये मी नाशिकमध्ये ज्या पद्धतीने काम करेन त्यावेळेस प्रत्येकाला प्रत्येकाची जागा दिसेल. माझा आशीर्वाद फक्त पक्षाच्या उमेदवारांना आहे, अन्य कोणी तसा प्रचार करीत असेल तर लक्ष देऊ नये, असेही महाजन यांनी स्पष्ट केले.
दिल्ली झाकोळली! फटाक्यांच्या आतषबाजीने हवेचा दर्जा ‘अत्यंत खराब’, ३ वर्षांतील सर्वाधिक प्रदूषित दिवाळीची नोंद
‘फेक व्हिडीओ’ची पोलिस चौकशी
नाशिक पूर्व मतदारसंघात भाजपकडून वीस लाख रुपयांची ऑफर देऊन उमेदवारीसंदर्भात जो ‘फेक व्हिडीओ’ आला त्या संदर्भातही महाजन यांनी स्पष्टीकरण दिले. याबाबत आमदार राहुल ढिकले यांनी आधीच पोलिस आयुक्तांकडे तक्रार केली आहे. लवकरच त्याची सखोल चौकशी होणार आहे. या प्रकरणामध्ये जे असतील त्यांच्यावर लवकरच कारवाई होईल, असेही महाजनांनी सांगितले.

मैत्रीपूर्ण लढत कुठेच नाही
नांदगाव विधानसभा मतदारसंघात समीर भुजबळ यांनी अपक्ष अर्ज दाखल केला आहे, तर चांदवड विधानसभा मतदारसंघात केदा आहेर यांनी बंडखोरी केली आहे. याबाबत विचारले असता गिरीश महाजन म्हणाले, की जिल्ह्यात दोन ठिकाणी मैत्रीपूर्ण लढत होत असल्याचे दिसत आहे. मात्र, अशी कोणती लढत होणार नाही. माघार होईपर्यंत चित्र स्पष्ट होईल, चांदवडमधील केदा आहेर यांच्याशी चर्चा करणार आहे. समीर भुजबळ यांच्याबाबतीत तिन्ही पक्षांचे नेते चर्चा करून निर्णय घेतील.
काँग्रेसचे दोनच मराठी उमेदवार; मुंबईत ११ जागांमध्ये टक्का कमीच, फटका बसण्याची शक्यता
मोदींच्या सभास्थळांची चाचपणी
नाशिक : नाशिक जिल्ह्यातील विधानसभा मतदारसंघांतील महायुतीच्या उमेदवारांसाठी पंतप्रधान नरेंद्र मोदी यांची ८ नोव्हेंबर रोजी नाशिक शहरात सभा होण्याची शक्यता आहे. त्यासाठी पंचवटीतील तपोवन येथील मैदानाची चाचपणी सुरू असून, पोलिसांसह सुरक्षा यंत्रणांना ‘अॅलर्ट’ देण्यात आला आहे.

त्यामुळे दिवाळीपाठोपाठ आता शहर पोलिसांनी पंतप्रधान मोदी यांच्या दौऱ्यासह सभेसंदर्भातील बंदोबस्ताच्या नियोजनाला सुरुवात केली आहे. तपोवन येथील जागेची चाचपणी सुरू आहे. महायुतीच्या पदाधिकाऱ्यांनी सभास्थळांची पाहणी केल्यानंतर पोलिसांच्या विशेष शाखेनेही त्यासंदर्भातील कार्यवाही सुरू केली आहे.