वारं बदलतंय! पुण्यामध्ये निवडणुकीच्या शेवटच्या टप्यात शरद पवारांचा मास्टरस्ट्रोक, दादांना धक्का

विधानसभा निवडणुकीच्या शेवटच्या टप्प्यात शरद पवार पश्चिम महाराष्ट्रावर लक्ष केंद्रित करत आहेत. यावेळी सभा, रोड शो आणि पक्ष प्रवेशांवर भर दिला जात आहे. शरद पवारांनी आज पुण्यात आणि रायगडमध्ये काही पक्ष प्रवेश घडवले, ज्यामुळे विरोधकांना मोठा धक्का बसण्याची शक्यता आहे. पुण्यातील मोदी बागेतील निवासस्थानी वडगावशेरी मतदारसंघातील राष्ट्रवादीच्या माजी नगरसेविका रेखा टिंगरे आणि चंद्रकांत टिंगरे यांचा पक्ष प्रवेश केला आहे. तसेच, हडपसरमध्ये दिलीप तुपे आणि अनिल तुपे यांचा देखील पक्ष प्रवेश केला आहे, आणि धनकवडीचे समीर धनकवडे यांचाही पक्ष प्रवेश करून घेतला आहे.

वडगावशेरीतील रेखा टिंगरे यांनी शरद पवार यांच्या पक्षात प्रवेश केला आहे. रेखा टिंगरे यांनी २०२२ मध्ये भाजपात प्रवेश केला होता, परंतु चार महिन्यांपूर्वीच त्यांनी अजित पवार यांच्या राष्ट्रवादीत प्रवेश केला होता. आज, निवडणुकीच्या पार्श्वभूमीवर बाप्पू पठारे यांच्या मार्गदर्शनाखाली पक्ष प्रवेश झाला. वडगावशेरीमध्ये सुनील टिंगरे यांना मात देण्यासाठी हा पक्ष प्रवेश घडवून आणला गेला आहे, कारण रेखा टिंगरे यांनी पूर्वी सुनील टिंगरे यांच्या त्रासाला कंटाळून पक्ष सोडला होता.

दिलीप आबा तुपे हे पुणे महापालिकेचे माजी स्थायी समितीचे चेअरमन राहिले आहेत, त्यामुळे त्यांच्या भागात तुपे यांची मोठी ताकद आहे. हडपसरमध्ये तुपेवाडी किंवा तुपेगाव यामध्ये मोठा प्रभाव आहे. हा मतदारसंघ मोठा असल्यामुळे तुपे नावामुळे प्रतिस्पर्ध्यांना फटका बसू शकतो. प्रशांत जगताप यांना मोठा पाठिंबा मिळावा म्हणून तुपेंमध्ये फूट पाडण्यात आली आहे. तसेच, सचिन दोडके यांच्यासाठी समीर धनकवडी यांचा पक्ष प्रवेश घडवून आणला आहे.