जामखेडमध्ये पैसे वाटप प्रकरणावर रोहित पवार यांची पहिलीच प्रतिक्रिया, पाहा काय म्हणाले…

फेसबुक लाईव्हमध्ये काय म्हणाले रोहित पवार?

‘काही वेळापूर्वी टीव्हीवर एक बातमी आली की, माझ्या कंपनीचा एका कर्मचारी पकडला गेला, त्याच्याकडे खूप सारी रोकड सापडली असल्याचं कळालं. जो व्हिडिओ समोर आला आहे, त्यात दिसणारा केस काहीसे कमी असणारा व्यक्ती माझ्या कंपनीचा कृषी अधिकारी आहे. आता तिथे कारखाना सुरू आहे. कारखाना ज्यावेळी सुरू असतो, त्यावेळी कृषी अधिकाऱ्याचं काम असतं, की शेतकऱ्यांकडे जायचं आणि ऊस तोडणाऱ्या टोळ्या, त्याचे मुकादम असतात त्यांच्याशी संवाद साधून कोणत्याही शेतकऱ्याला अडचण येऊ नये याची जबाबदारी कृषी अधिकाऱ्याची असते. कारखाना सुरळितपणे चालला पाहिजे. आता कारखाना जामखेड तालुक्यात आहे. खळगाव गावाचं नाव आहे. त्याच्या अवतीभोवती, जामखेड, कर्जत, करमाळा या गावातून शेतकऱ्यांकडून ऊस घेतला जातो. अशात कृषी अधिकारी नेहमी फिरतीवर असतो. महाराष्ट्रातल्या कृषी अधिकाऱ्याला किंवा एखाद्या फॅक्टरी मालकाला विचारलं तरी तिथे पण अशीच गोष्ट कळेल. आता एक व्हिडिओ आला समोर. त्याच्या खोलात गेलो नाही, कारण या विषयाकडे लक्ष देण्यासारखं काही नाही. हा विषय सेटअप केल्याप्रमाणे आहे. व्हिडिओद्वारे मी खरी माहिती देतो आहे, कारण काही लोक जितका उशीर होईल तितका त्याचा फायदा घेतात. राजकीय नेत्यांनीही खरं समजल्याशिवाय काही विधानं करू नये’, अशी माहिती रोहित पवार यांनी फेसबुक लाईव्हद्वारे दिली.

फेसबुक लाईव्हमध्ये बोलताना रोहित पवारांनी त्यांच्या विरोधात उभ्या असलेल्या राम शिंदे यांच्या निवटवर्तीयाचे फोटो शेअर करत त्यांची माहिती दिली. फोटोतील व्यक्तीवर अनेक गुन्हे दाखल असून ते तडीपार झाले होते. मात्र निवडणुकीच्या तोंडावर तीन महिने आधी भाजपच्या सरकारमध्ये त्यांचं तडीपार रद्द झालं. तीन महिन्यांपूर्वी महायुती, भाजप सत्तेत होते. आज अनेक तडीपार असलेले लोक भाजपचा प्रचार करत आहेत. आज तडीपार रद्द केलेले हे फोटोतील व्यक्ती राम शिंदेंचा प्रचार करत असल्याचं, पवार म्हणाले.

‘महेंद्र मोहोळकर या व्यक्तीची खासियत आहे ते म्हणजे दबावतंत्र. एखाद्या गाडीवर पैसे ठेवायचे, पुड्या ठेवायच्या किंवा इतर काही ठेवायचं आणि ज्या मालकीची ती गाडी आहे त्या मालकावर केस करण्याचा किंवा धमकी देण्याचं त्यांचं काम आहे. आमचे मोहिते त्यांच्याकडे रोकड सापडली नाही, आता पोलीस तपास करत आहेत. आम्हाला लोकांकडून कळतंय की मोहोळकर यांच्यासह त्यांच्या साथीदारांनी मोहिते यांच्यावर दबाव टाकला. त्यांचे कपडे फाडले, त्यांना मारहाण झाली, त्यांना कोणाची तरी नावं घेण्याचं सांगण्यात आलं, त्यांना कागदावर लिहिण्याचं सांगण्यात आलं, मात्र अद्याप आमची मोहितेंशी चर्चा झाली नसल्याचं’, रोहित पवार म्हणाले.

‘आम्ही या मतदारसंघात एका बलाढ्य शक्तीच्या, म्हणजे भाजपच्या विरोधात लढत आहोत. त्यांचा प्रचार करणारे सर्व गुंड तिथे आहेत. माझ्या मतदारसंघात सर्वसामान्यांना प्रश्न पडला आहे, की गुंडगिरी अशीच वाढली तर आज कुटुंबातील मुली, महिला बिन्धास्त जाऊ शकतात, कारण गेल्या पाच वर्षात या मतदारसंघात चांगली शिस्त आणली आहे. पण गेल्या दोन-तीन महिन्यात तडीपार असलेल्या गुंडांना मतदार संघात आणलं आहे, त्यामुळे अनेकांना भीती वाटू लागली आहे, पण मी माझ्या कार्यकर्त्यांसोबत आहे, तसंच मतदारांना सांगायचं आहे की गुंडांचं ऐकू नका. तसंच अशा प्लांट केलेल्या गोष्टी धमकी, दडपशाही करुन काही व्यक्तींकडून गोष्टी करुन घेतल्या जातात आणि दाखवताना वेगळ्या पद्धतीने दाखवलं जातं, याची शहानिशा करावी लागेल. कोणीही दडपशाहीला , गुंडागर्दीला घाबरू नका, असं ते फेसबुक लाईव्हमध्ये म्हणाले.