हुडहुडी भरविणारा गारठा! तापमानाचा पारा १२.९ अंशावर

विधानसभा निवडणुकीमुळे राज्यातील वातावरण सध्या गरम असताना, वातावरणातील अनुकूल घडामोडींमुळे मंगळवारी तापमानाचा पारा घसरला. पुण्यामध्ये या हंगामातील नीचांकी १२.९ अंश सेल्सिअस किमान तापमानाची नोंद झाली. हुडहुडी भरविणारा गारठा अनुभवत पुणेकरांची सकाळ झाली. शहराच्या काही भागात पारा ११ अंशापर्यंत खाली आला होता.

नोव्हेंबरचा दुसरा आठवडा संपला तरी दुपारी उन्हाचे चटके जाणवत असल्याने पुणेकरांना आता कडाक्याच्या थंडीचे वेध लागले आहेत. गेल्या दोन दिवसांत शहरात किमान तापमान घट झाल्याने सकाळी गारवा जाणवायला सुरुवात झाली आहे. रात्री दुकानांच्या बाहेर, सोसायट्यांमधील सुरक्षारक्षक शेकट्यांचा आसरा घेत आहेत. पहाटे फिरायला जाणारे नागरिकांनी स्वेटर, मफलर वापरायला सुरुवात केली आहे.

जमेची बाजू म्हणजे मंगळवारी कमाल तापमानातही दोन अंशाने घट झाली, त्यामुळे दिवसा उन्हाचा तीव्रता जाणवली नाही. पुण्यात मंगळावारी दिवसभरात कमाल २९.४ आणि किमान ११.३ अंश सेल्सियस तापमान नोंदवले गेले. एनडीए, हवेली, कोथरूड परिसरात थंडीचा कडाका अधिक नोंदवला गेला. तर हडपसर, कोरेगाव पार्क भागात कमाल आणि किमान तापमान अधिक होते. पुणे शहरासह जिल्ह्याच्या बहुतांश भागांमध्ये तापमानात झाली. पश्चिम महाराष्ट्र आणि मराठवाड्यातही थंडीचा कडाका वाढल्याची दनोंद झाली. पुढील दोन दिवस पुण्यात आकाश निरभ्र आणि सकाळच्या वेळेत काही भागात धुके असेल. तापमान स्थिर राहणार असल्याची शक्यता भारतीय हवामानशास्त्र विभागाने व्यक्त केली आहे.

शहराच्या वेगवेगळ्या भागातील नीचांकी तापमान (अंश सेल्सिअस)

शिवाजीनगर १२.९, हवेली ११.९, बारामती ११.८,एनडीए ११.६, पाषाण १३. ३,हडपसर १५.२, कोरेगाव पार्क १७.३, मगरपट्टा १८.६

राज्याचा आढावा (अंश सेल्सिअसः

अहिल्यानगर ११.६ (नीचांकी तापमान )

नाशिक १२.७

महाबळेश्वर १३.८

सातारा १४.७

कोल्हापूर १७.३

सोलापूर १६.८