‘सरवणकर बंगलेच बदलायचे, अमित ठाकरे बिचारा..’; ठाकरेंच्या शिलेदाराने सांगितलं विजयामागचं गुपित

मी हिंदूहृदयसम्राट बाळासाहेब ठाकरे आणि पक्षप्रमुख उद्धव ठाकरे यांच्या आशीर्वादाने मला उमेदवारी मिळाली. या लढाईध्ये सर्व शिवसैनिक, सर्व पदाधिकारी आणि मायबाप जनतेने मला पहिल्या दिवसापासून मला सपोर्ट केला. दोन्ही तगड्या उमेदावारांसमोर एक सामान्य गिरणी कामगाराचा चाळीत राहणारा मुलगा होता. सामान्य जनतेला हाक मारली की, तुमच्यातीलच मी एक असून पुढील पाच वर्षे तुमच्या सेवेसाठी अर्पण करणार आहे. त्यांनी माझी हाक ऐकली आणि मला जनतेने विजयापर्यंत पोहोचवल्याचं महेश सावंत म्हणाले.

दोन बलाढ्यांविरोधात जिंकण्याच्याच इराद्याने मी आखाड्यात उतरलो होतो. मला माहित होतं की मी जिंकणार कारण माझा जनतेवर विश्वास होता. सदा सरवणकर तीनवेळा आमदार राहिले मात्र ते वरच्या लेव्हलचे झालेले माणूस होते. जर कोणाच्या घरी काही घडलं तर ते टाळायचे. लोकांच्या घरातील गणपतीच्या पूजेलाही जायचं टाळायचे, त्यांनी फक्त बंगलेच बदलल्याचं म्हणत सावंत यांनी सरवणकरांवर निशाणा साधला.

मला माहिती होतं अमित ठाकरे बिचारा नवखा होता. राजकारणाची माहिती नव्हती की कसं काम करायचं होतं. राज ठाकरे होते पण ते महाराष्ट्राचं व्हिजन पाहत होते. विभागात कसं काम करायचं हे माहित नव्हतं. त्यांची पारंपारिक ४०-४२ हजार मते होती त्याती आम्ही १३ हजार पहिलेच वजा केले होते. महाराष्ट्रात जरी शिवसेनेच्या कमी जागा आल्या असल्या तरी उद्धव ठाकरेंना माहिम दादरचा गड राखल्याचा आनंद असल्याचं महेश सावंत म्हणाले.