ऑस्ट्रेलियात सर्वाधिक खर्च करणाऱ्यांत भारत पाचवा; अधिकाधिक भारतीयांना आकर्षित करण्याचे लक्ष्य

ऑस्ट्रेलिया टुरिझमच्या विविध राज्यांच्या शिष्टमंडळांनी नुकतीच मुंबईला भेट दिली. त्यावेळी त्यांनी सन २०३४मध्ये ब्रिस्बेनमध्ये होणाऱ्या ऑलिम्पिक स्पर्धेसाठी तसेच, पर्यटकांना आकर्षित करण्यासाठी देशात सुरू असलेल्या विविध सोयीसुविधांची, पर्यटनस्थळांची माहिती दिली. ऑस्ट्रेलियात सर्वाधिक खर्च करणाऱ्या देशांत भारत हा पाचव्या क्रमांकाचा देश ठरला आहे. सन २०१९मध्ये भारत यात सहाव्या क्रमांकावर होता. भारतीय पर्यटक प्रत्येक भेटीसाठी सरासरी तीन लाख १६ हजार रुपये खर्च करतो, असेही यावेळी सांगण्यात आले.
तुमच्या मतदारसंघात कोण विजयी झाले? महाराष्ट्रातील २८८ नवनिर्वाचित आमदारांची यादी एका क्लिकवर
करोनापूर्व काळातील पर्यटनसंख्या गाठणाऱ्या पहिल्या काही देशांमध्ये भारताचे स्थान होते. ऑस्ट्रेलियातील पर्यटन व्यवसायात भारत ही दुसऱ्या क्रमांकाची वेगाने वाढणारी बाजारपेठ आहे. या वर्षी जानेवारी ते ऑगस्टदरम्यान दोन लाख ८५ हजारांहून अधिक भारतीयांनी ऑस्ट्रेलियाला भेट दिली. सन २०२३ आणि २०१९च्या तुलनेत ही वाढ ११ टक्के आहे. तर, गेल्या वर्षी सप्टेंबरपासून यंदाच्या ऑगस्टपर्यंत चार लाख २३ हजार ४०० भारतीयांनी ऑस्ट्रेलियाला भेट दिली. यामध्ये आश्चर्याची बाब म्हणजे संपूर्ण वर्षभरात मित्र आणि नातेवाइकांना भेट देणाऱ्यांची संख्या सर्वाधिक दोन लाख ४९ हजार ६०० (५९ टक्के) असल्याची नोंद आहे.

अनेक भारतीय तरुण येथे शिक्षणासाठी येत असल्याने तसेच, अनेकांच्या नोकऱ्या येथे असल्याने ही संख्या अधिक असल्याचे सांगितले जाते. तर, त्याखालोखाल सुट्टीसाठी अवघे ६३ हजार ७०० जण (१५ टक्के) आल्याची नोंद आहे. त्यामुळे अधिकाधिक भारतीयांनी पर्यटनासाठी ऑस्ट्रेलियाला यावे. येथील सिडनी, मेलबर्न या नेहमीच्या शहरांसह टास्मानिया या बेटाच्या निसर्गसौंदर्याचा आस्वाद घ्यावा, वेस्टर्न कोस्टमधील निगालू रीफ येथील व्हेल शार्क माशांच्या सोबतीने पोहण्याची मजा लुटावी, गोल्ड कोस्टमधील जंगलसफारीचा अनुभव घ्यावा, असे लक्ष्य ऑस्ट्रेलिया टूरिझमने ठेवले आहे. ऑस्ट्रेलियाच्या क्रिकेटपटूंचे चाहते भारतातही आहेत. त्यामुळेच डेव्हिड वॉर्नरनेही देशातील पर्यटनाचे काही व्हिडीओ पोस्ट करून पर्यटकांना आकर्षित करण्याचा प्रयत्न केला आहे.