लष्करात भरती होण्याचं स्वप्न अधुरं; पहाटे व्यायाम करताना भरधाव कारची धडक अन्…

सेनगाव तालुक्यात असलेल्या पान कनेरगाव येथे २६ नोव्हेंबर रोजी सकाळी पाच वाजताच्या सुमारास कार्तिक प्रल्हाद डोंगरे (वय वर्षे २१) हा आर्मी भरतीची तयारी करत असताना रोजच्या प्रमाणे हिंगोली रिसोड रस्त्यावर व्यायाम करण्यासाठी गेला होता. काही वेळ त्याने आपली व्यायामाची तयारी केली. व्यायाम करत असताना रस्त्यावर अंधार असल्याने भरगाव वेगात येत असलेल्या वाहनाने कार्तिकला जोरदार धडक दिली. या धडकेत कार्तिक गंभीर जखमी झाला आणि त्याचा मृत्यू झाला. या घटनेने पानकनेरगाव परिसरामध्ये एकच शोककळा पसरली आहे.

कार्तिक हा लहानपणी अंदाजीत दोन वर्षाचा असताना २००६ मध्ये आपल्या परिवारासोबत गावाला जात असताना आई, भाऊ आणि बहीण यांच्या वाहनाचा अपघात झाला होता. त्यावेळी दैव बलवत्तर म्हणून कार्तिक या अपघातामधून वाचला होता. पण, या अपघातात त्याची आई, भाऊ आणि बहीण असे तिघांचा मृत्यू झाला होता. या दुःखामधून परिवार कसाबसा सावरला. आता मात्र आपलं स्वप्न पूर्ण करण्यासाठी कार्तिक खूप मेहनत करत होता. आर्मीमध्ये जाऊन देश सेवा करायची हे स्वप्न उराशी बाळगत असलेला कार्तिक जिद्दीने भरतीची तयारी करत होता. या दरम्यान, त्याला देखील काळाने हिरावून घेतले आहे. या घटनेने त्याची सावत्र आई व वडील तसेच, नातलगांनवर दुःखाचा डोंगर कोसळला आहे.

रिसोड येथील शासकीय सामान्य रुग्णालयात कार्तिक याच्या मृतदेहावर शवविच्छेदन करण्यात आले व पानकनेरगाव गावी रात्री अंत्यविधी करण्यात आला आहे. अज्ञात वाहन चालका विरोधात अजून तक्रार दाखल करण्यात आली नसल्याचं यावेळी सेनगाव पोलीस स्टेशनचे पोलीस निरीक्षक संतोष तांबे यांनी फोनवरून माहिती दिली आहे. तरी, या प्रकरणाचा पुढील तपास सध्या सुरु आहे.