मुंबई कोस्टल रोड नव्या वर्षात; अंतिम टप्प्याच्या विस्तारातील शेवटचा गर्डर जोडण्याचे काम पूर्ण

लोटस जंक्शनहून सी लिंकला जाण्यासाठी आंतरबदलातील एक मार्गिकाही सुरू झाली. हे तीन मार्ग खुले झाल्याने वाहनचालकांना मरिन ड्राइव्ह ते खान अब्दुल गफार खान मार्गावरून मुख्य मार्गाने सी लिंकला जाता येत आहे. त्यानंतर १३ सप्टेंबरला वांद्रे-वरळी सी लिंकला जोडणारा दक्षिण दिशेकडील मार्गही जोडला गेला. या मार्गावरून मुख्यत्वे वांद्रे ते मरिन ड्राइव्ह असा प्रवास होणार होता. मात्र वांद्रे-वरळी परिसरातील वाहतूककोंडी पाहता, वाहतूक पोलिस आणि मुंबई महापालिका यांनी दक्षिण दिशेकडील हा मार्ग मरिन ड्राइव्ह ते वांद्रे-वरळी सी लिंक दिशेने जाण्यासाठी तात्पुरता खुला केला.

आता अंतिम टप्प्यातील सी लिंक विस्तारासाठी उत्तरेकडील गर्डरची उभारणीही बुधवारी सकाळी पूर्ण करण्यात आली. यानंतर काँक्रीटीकरण, विद्युत खांबांची उभारणी यांसह अन्य तांत्रिक कामे पूर्ण केली जातील. ही कामे डिसेंबरअखेर पूर्ण करून वाहनचालकांसाठी संपूर्ण मार्ग खुला केला जाणार होता. आता हे काम जानेवारी २०२५च्या पहिल्या आठवड्यात पूर्ण करून अंतिम टप्पाही खुला केला जाणार असल्याचे सांगण्यात आले.

प्रवास काही मिनिटांवर
उत्तरेकडील या मार्गावरून मरिन ड्राइव्ह ते वांद्रे-वरळी सी लिंकपर्यंत जाण्यासाठीचा मार्ग वाहनचालकांसाठी खुला केला जाईल. तर दक्षिण दिशेकडील मार्गावरून तात्पुरता होणारा मरिन ड्राइव्ह ते सी लिंकपर्यंतचा प्रवास बंद करून, त्यावरून वांद्रे-वरळी सी लिंकपासून मरीन ड्राइव्ह दिशेने प्रवासासाठी वापर केला जाणार आहे. संपूर्ण मार्ग उपलब्ध झाल्यामुळे मरिन ड्राइव्ह ते वांद्रे-वरळी सी लिंकवरून पुढील प्रवास काही मिनिटांत करणे शक्य होणार आहे. सागरी किनारा मार्गाचे एकूण ९५ टक्के काम पूर्ण झाले आहे.