ईव्हीएमवर संशय, मारकडवाडी बॅलेट पेपरवर मतदानासाठी ठाम; जानकर विजयी, तरी समर्थक आक्रमक का?

विशेष म्हणजे, राष्ट्रवादी काँग्रेस : शरदचंद्र पवार पक्षाकडून महाविकास आघाडीतर्फे उमेदवार असलेले उत्तमराव जानकर येथे भाजप उमेदवाराचा पराभव करुन विजयीही झाले. मात्र बहुतांश महाविकास आघाडी समर्थक असल्यामुळे हजारोंचं मतदान अपेक्षित असलेल्या आपल्याच गावात मतांची संख्या रोडावल्याने गावकरी आक्रमक झाले. त्यामुळे ईव्हीएमवर संशय व्यक्त करत त्यांनी मतपत्रिकांवर मतदान घेण्याचा नारा दिला. जनआंदोलनानंतर प्रशासनाने मारकडवाडीत ५ डिसेंबरपर्यंत जमावबंदीही लागू केली. परंतु तीही झुगारत मतदार भूमिकेवर ठाम आहेत.

मारकडवाडी सोलापूर जिल्ह्यातील माळशिरस विधानसभा मतदारसंघांतर्गत येते. तिथे शरद पवार गटाच्या उत्तमराव जानकर यांनी भाजपचे माजी आमदार राम सातपुते यांचा पराभव केला. जानकर विजयी झाले, पण त्यांच्या गावातील महाविकास आघाडी समर्थकांनी निवडणूक आयोगाने जाहीर केलेल्या ईव्हीएम मोजणीच्या आकड्यांवर आक्षेप घेतला आहे. कारण त्यांच्या गावात चक्क भाजप उमेदवाराला आघाडी मिळाल्याचे दिसत आहे. त्यामुळे ‘पुनर्मतदाना’चा घाट घालण्यात आला आहे.

लाठीचार्ज करा किंवा गोळीबार करा

मारकडवाडी गावातील ग्रामस्थांनी जिल्हा प्रशासन आणि तालुका प्रशासनाकडे रीतसर निवेदन देत, फक्त मारकडवाडी गावापुरते बॅलेट पेपरवर मतदान घ्या अशी मागणी केली होती. सोलापूर जिल्हाधिकारी आणि प्रांत अधिकारी यांनी विधानसभा निवडणूक प्रक्रिया संपन्न झाली असून आता कोणत्याही प्रकारची निवडणूक प्रक्रिया राबविता येत नाही असे जाहीररीत्या सांगितले आहे. ईव्हीएममध्ये गैरप्रकार होत आहे ही बाब प्रशासनाच्या निदर्शनास आणून देण्यासाठी आम्ही मतपत्रिकेवर मतदान घेणारच, लाठीचार्ज करा किंवा गोळीबार करा, परंतु आम्ही बॅलेट पेपरवर मतदान घेणारच अशी भूमिका ग्रामस्थांनी मांडली आहे.

पोलिसांकडून खबरदारी

सोलापूर जिल्हा प्रशासनाने काही गावकऱ्यांना नोटिसा बजावल्या आहेत. सोमवारपासूनच गावात मोठा पोलिस बंदोबस्त तैनात करण्यात आला आहे. सोलापूरचे पोलीस अधीक्षक अतुल कुलकर्णी यांनी सांगितले की, कोणताही अनुचित प्रकार घडू नये म्हणून आम्ही खबरदारीसाठी नोटीस बजावली आहे. कायदा व सुव्यवस्था बिघडवणारे कोणतेही पाऊल टाळण्यासाठी प्रशासन ग्रामस्थांशी बोलून त्यांचे मन वळवत आहे.
Ajit Pawar : अमित शाहांच्या भेटीला अजित पवार सुपुत्रासह, शिंदेंच्या नाराजीकडे डोळेझाक करत सत्तास्थापना?

गावकऱ्यांचं म्हणणं काय?

येथील गावकऱ्यांपैकी एक रणजीत मारकड यांनी टाईम्स ऑफ इंडियाला सांगितले की, “आमच्या गावात २००० हून अधिक पात्र मतदार आहेत. ज्यापैकी १९०० जणांनी २० नोव्हेंबर रोजी मतदान केले. आमच्या गावाने उत्तमराव जानकर आणि मोहिते पाटील कुटुंबाला पाठिंबा दिला आहे. मात्र या निवडणुकीत जानकर यांना ८४३, तर आमच्या गावातून सातपुते यांना १००३ मतं मिळाली आहेत. आम्ही निवडणूक आयोगाच्या डेटावर विश्वास ठेवत नाही. मतवाटपाचा पुरावा मिळवण्यासाठी आम्ही ३ डिसेंबर रोजी बॅलेट पेपरवर मतदान आयोजित केले आहे.

“आम्ही गावात एका मोकळ्या जागेवर व्यवस्था केली आहे, तिथे एक मंडप उभारला आहे. संपूर्ण प्रक्रियेचे पालन करण्याचा आमचा मानस आहे आणि आम्ही सर्व गावकऱ्यांना या प्रक्रियेत सहभागी होण्याचे आवाहन केले आहे” असे अन्य एक रहिवासी अमित वाघमोरे म्हणाले. आम्ही प्रशासनाला सहकार्य करत आहोत,कायदा व सुव्यवस्था बिघडेल अशी कृती करणार नाही असे सांगितले असतानाही प्रशासन आमच्यावर दबाव आणून आम्हाला नोटिसा देत आहेत,अशी संतप्त प्रतिक्रिया ग्रामस्थांनी दिली आहे.

महाविकास आघाडी समर्थकांनी सांगितले की त्यांनी लोकवर्गणीद्वारे प्रत्यक्ष निवडणुकीत माळशिरस मतदारसंघातून लढलेल्या सर्व उमेदवारांची नावे आणि छायाचित्रांसह मतपत्रिका छापल्या आहेत. त्यांनी सर्व ग्रामस्थांना ‘मतदान करा’ असे आवाहन करणारे बॅनर लावले आहेत.
Raj Thackeray : मला अमान्य आहे, पुन्हा जबाबदारी घे; राज ठाकरेंनी फोन फिरवला, अविनाश जाधवांनी राजीनामा फिरवला

प्रशासनाने विनंती फेटाळली

या प्रक्रियेवर देखरेख ठेवण्यासाठी काही सरकारी अधिकाऱ्यांची नियुक्ती करण्याबाबत गावकऱ्यांनी तहसीलदारांकडे विनंती केलेली होती, परंतु ती फेटाळण्यात आली आहे. माळशिरस मतदारसंघाचे रिटर्निंग अधिकारी विजय पांगारकर म्हणाले, “२३ नोव्हेंबर रोजी निकाल जाहीर झाल्यानंतर मतमोजणी प्रक्रिया संपली. मारकडवाडीतील तीनही बूथमधील प्रक्रिया पारदर्शक असून, आकडेवारीत तफावत आढळून आली नाही. बॅलेट पेपरवर पुन्हा निवडणूक घेण्याची तरतूद नाही. त्यामुळे त्यांची विनंती फेटाळण्यात आली आहे.”

भाजपचा बहिष्कार

दुसरीकडे, भाजप समर्थकांनी मतदानावर बहिष्कार टाकणार असल्याचे सांगितले. अविनाश कोडिलकर म्हणाले, “बॅलेट पेपर वापरुन मतदान करण्याचा निर्णय काही जणांनी घेतला आहे. मात्र निवडणूक संपली आहे आणि या प्रकाराची गरज नाही.”

मतपत्रिकेवरील मतदानाला पाठिंबा देण्यासाठी आमदार उत्तमराव जानकर यांनी गावाला भेट दिली. “मराठा आरक्षण आंदोलकांविरुद्ध पोलिसांनी बळाचा वापर केल्याची आंतरवाली सराटीसारखी परिस्थिती उद्भवण्याचा आम्हाला संशय आहे. मात्र, खरी आकडेवारी उघड करण्यासाठी मतदान केले जाईल. मारकडवाडी एक उदाहरण रचेल” असेही ते म्हणाले.