प्लायवूडचे छोटे-छोटे कम्पार्टमेंट, पडदे अन् अंधार; कॅफेत छापा टाकताच भलतंच दिसलं

अशाच एका कॅफेमध्ये तरुण-तरुणी अश्लील चाळे करत असल्याची माहिती कोतवाली पोलीस स्टेशनचे पोलीस निरीक्षक प्रताप दराडे यांना त्यांच्या सूत्रांकडून मिळाली. त्या अनुषंगाने त्यांनी अहिल्यानगर शहरामध्ये द परफेक्ट कॅफे कोर्ट गल्ली कर्डीले डायग्नोस्टीक समोर अहिल्यानगर या कॅफेवर छापा टाकला. यावेळी तेथे कॅफेच्या आतमध्ये प्लायवुडचे कंम्पार्टमेंट करुन पडदे लावून अंधार करण्यात आल्याचे दिसून आलं.

प्लायवुडच्या बोर्डने पार्टीशन करुन वेगवेगळे कंपार्टमेंट

पंचा समक्ष पथकाने छापा टाकला असता सदर ठिकाणी प्लायवुडचे बोर्डचे पार्टीशन करुन वेगवेगळे कंपार्टमेंट केलले दिसले. त्यात काही कॉलेजची मुलं व मुली अश्लील चाळे करताना दिसून आले. काउंटरवर असलेल्या इसमाला ताब्यात घेऊन त्याची चौकशी करण्यात आली. त्याचे नाव अनुज शिवप्रसाद कुमार (वय २० वर्षे रा. प्ररबुजुर्ग फतेहपुर उत्तर प्रदेश ह.रा. स्वामी शंकर हॉटेल कल्यान बायपास अहिल्यानगर) असे असल्याचे त्याने सांगितलं. तो सदर कॅफेचा मॅनेजर असून कॅफेचा मालक बाबत विचारना केली असता महेश पोपट खराडे (रा. रभाजी नगर केडगाव अहिल्यानगर) अशी माहिती मिळाली. सदर कॅफेचं कामकाज मॅनेजर पाहत असल्याची माहिती आहे.

ज्या तरुण-तरुणींना या कॅफेतून ताब्यात घेण्यात आलं, त्यांची चौकशी करुन, वय आणि ओळख पत्रांची पाहणी करण्यात आली. त्यानंतर त्यांना समज देऊन सोडण्यात आलं, अशी माहिती पोलिसांनी दिली. या प्रकरणी पोलिसांनी कॉफी शॉपचे चालक व मालक यांच्याविरोधात गुन्हा दाखल केला आहे.

अहिल्यानगर शहरांमध्ये अनेक कॅफेंमध्ये गैरप्रकार चालतात यावर देखील पोलीस प्रशासनाने कारवाई करणे गरजेचे आहे अशा कॅफेमुळे शाळा कॉलेजच्या तरुण-तरुणी कुठेतरी भरकटत चालल्याचं दिसतंय, अशी तक्रार नागरिकांमधून समोर येत आहे.